ކުރެވުނު ތުހުމަތުތަކުގެ ސަބަބުން ފުލުހުންގެ އިކޮނޮމިކް ކްރައިމް އިންވެސްޓިގޭޝަންސްގެ ހެޑްގެ މަގާމުގެ މަސްއޫލިއްޔަތުތަކުން އެއްފަރާތް ކޮށްފައި ހުރި ސުޕްރިޑެންޓް އޮފް ޕޮލިސް، ރަޖުނީ ޝުއައިބަށް ފްލެޓު ލިބުމުގައި އުސޫލުން ބޭރުން ކަމެއް ހިނގާފައި ނުވާ ކަމަށް ފުލުހުން ބުނެފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ މަގާމުގެ މަސްއޫލިއްޔަތުތަކުން ރަޖުނީ އެކަހެރިކުރުމަށްފަހު ހިންގި ތަހުގީގުން އޭނާއަށް ފްލެޓެއް ލިބުމުގައި އުސޫލުން ބޭރުން ކަމެއް ހިނގާފައިވާކަން ފާހަގަ ނުވާ ކަމަށެވެ.
"ސުޕްރިންޓެންޑެންޓް އޮފް ޕޮލިސް ރަޖުނީ ޝުއައިބު މަސްއޫލިއްޔަތު ތަކުން އެކަހެރިކޮށް، ފްލެޓެއް ލިބުމުގައި އެއްވެސް އުސޫލަކާ ހިލާފު އަމަލެއް ހިނގާފައިވޭތޯ ކަމާބެހޭ އިދާރާތަކުން ހިއްސާކޮށްފައިވާ މައުލޫމާތައް ދިރާސާކޮށް ބެލިބެލުމުން އެފަދަ ކަމެއް ފާހަގަކުރެވިފައި ނުވާ ވާހަކަ ދަންނަވަން،" ފުލުހުންގެ މެސެޖުގައި ބުނެފައިވެ އެވެ.
އިކޮނޮމިކް ކްރައިމް އިންވެސްޓިގޭޝަންސްގެ ހެޑްގެ މަގާމުގެ މަސްއޫލިއްޔަތުން ރަޖުނީ އެކަހެރި ކުރީ ވިނަރެސްއިން ފްލެޓު ގަތް މައްސަލައިގައި ގޯހުން ކަމެއް ކޮށްފައިވޭތޯ ބެލުމަށް ފުލުހުން ތަހުގީގު ކުރަން ފެށުމަށްފަހު އެވެ.
އެ ބަދަލަކީ އިކޮނޮމިކް ކްރައިމް އިންވެސްޓިގޭޝަންސްއިން ކުރަމުންދާ ބިންވެރިޔާ އަދި ގެދޮރުވެރިޔާ ސްކީމާގުޅޭ ތަހުގީގުގެ ކްރެޑިބިލިޓީ ހިފެހެއްޓުމާއި އެ ތަހުގީގަށް އެއްވެސް ކަމަކުން ނުރަނގަޅު އަސަރެއް ނުފޯރާނެކަން ޔަގީންކުރުމަށްޓަކައި ގެނައި ބަދަލެއް ކަމަށް ފުލުހުންގެ ތަރުޖަމާނު އަހުމަދު ޝިފާން މީގެ ކުރިން ވިދާޅުވެފައިވެ އެވެ.
ރަޖުނީގެ މައްސަލަ ފުލުހުން ތަހުގީގު ކުރަން ފެށީ ސޯޝަލް މީޑިއާގައި ދައުރުވާން ފެށި މައުލޫމާތުތަކަކާ ގުޅިގެންނެނެވެ.
"ހަސަން ކުރުސީ" ގެ ނަމުގައި ހިންގާ އެކްސް އެކައުންޓުން މިދިޔަ ޑިސެމްބަރު 20، ގައި ލީކުކޮށްލި ވިނަރެސް ލިސްޓުގައި ރަޖުނީގެ އިތުރުން އެހެން ފުލުހުން ވެސް ހިމެނޭކަން އެނގިފައިވެ އެވެ. އެ ފުލުހުން ވެސް ފްލެޓު ގަތުގައި އުސޫލާ ހިލާފުން ކަމެއް ކޮށްފައިވޭތޯ، ފުލުހުން ބަލަމުންދާ ކަމަށް "އަދަދު" ނޫހަށް ވަނީ އެނގިފަ އެވެ.
އެޗްޑީސީގެ ކުރީގެ މެނޭޖުމެންޓާއި މިހާރުގެ މެނޭޖުމެންޓުން ބުނެފައިވާ ގޮތުން، ވިނަރެސްއިން ފްލެޓު ދޫކުރަން ކަނޑައެޅި އެންމެންނަށް ފްލެޓު ދޫކޮށް، ބާކީ 123 ފްލެޓެއް ހުއްޓެވެ. އެހެންވެ، އެ ފްލެޓުތައް ވިއްކަން ނޮވެމްބަރު 5، 2023، ގައި ހުޅުވައިލި އެވެ.
ކޮރަޕްޝަނާއި ހިޔާނާތުގެ ގިނަ މައްސަލަތަކެއް އެޗްޑީސީއަށް ވަނީ އަމާޒުވެފަ އެވެ. އޭގެތެރޭގައި ހިމެނެނީ ބިންވެރިޔާ ސްކީމުގެ ދަށުން ކަމަށް ބުނެ އުސޫލުން ބޭރުން ބިންތަކެއް ދިނުމާއި ނުއަގުގައި ސަރުކާރުގެ ވެރިންނާއި މަޖިލިސް މެންބަރުންނަށް ބިން ވިއްކުން އަދި މަޝްރޫއުތަކުގެ ނަމުގައި ގިނަ އަދަދެއްގެ ފައިސާ ދޫކުރުމެވެ.
ގޯތި ވައްކަމުގެ މައްސަލަ ފުލުހުންގެ އިތުރުން އޭސީސީން ވެސް ދަނީ ބަލަމުންނެވެ.
