އަންނަ އަހަރުން ފެށިގެން ދައުލަތުގެ ހުރިހާ އޮފީސްތަކެއް ޕްރޮކިއުމަންޓް ޕްލޭންތަކެއް އާންމުކުރަން ނިންމައި، އަންނަ މަހުގެ ތެރޭގައި އެ މައުލޫމާތުތައް ފިނޭންސް މިނިސްޓްރީއަށް ފޮނުވަން އެ މިނިސްޓްރީން ހުރިހާ އިދާރާތަކަށް އަންގައިފި އެވެ.
ފިނޭންސް މިނިސްޓްރީން އާންމުކޮށްފައިވާ ސާކިއުލާއެއްގައިވާ ގޮތުގައި އަހަރީ ޕްރޮކިޔުމަންޓް ޕްލޭންތައް އާންމުކުރާނީ އެ މިނިސްޓްރީގެ ވެބްސައިޓުގަ އެވެ. މި ޕްލޭންތަކަކީ މާލިއްޔަތު ގަވާއިދުގެ ދަށުން ދައުލަތުގެ ބަޖެޓުން ހިންގާ ހުރިހާ ތަނަކުން ތައްޔާރުކުރަންޖެހޭ ލިޔުމެކެވެ.
މިނިސްޓްރީން ވަނީ މި ސާކިއުލާއާއެކީ ދައުލަތުގެ ޕްރޮކިއުމަންޓް ކަންކަން ބަލަހައްޓާ ބަނޑޭރި ޕޯޓަލްއިން މި ޕްލޭންތައް ތައްޔާރުކުރާނެ ގޮތުގައި އިރުޝާދުތައް ހިމެނޭ ޔޫސާ ގައިޑްލައިނެއް ވެސް ހިއްސާކޮށްފަ އެވެ.
ސަރުކާރުގެ އޮފީސްތަކުގެ ޕްރޮކިއުމަންޓް ޕްލޭންތައް އާންމުކުރަން ފިނޭންސުން ނިންމާފައިވާއިރު، ދައުލަތުގެ ފައިސާއަށް ހިޔާނާތްތެރިވުމުގެ ގިނަ މައްސަލަތަކާއި ކޮރަޕްޝަންގެ މައްސަލަތައް ގިނައީ ޕްރޮކިއުމަންޓުގެ ތެރެއިން ހިންގާ ކަންކަމުގެ ތެރޭގަ އެވެ.
މި ގޮތުން މުދަލާއި ހިދުމަތް ހޯދުމުގެ ނަމުގައި، ބޮޑު އަގުގައި މާކެޓު ރޭޓަށް ވުރެ މަތިން މިފަދަ އެއްބަސްވުންތައް ހެދުމާއި ގުޅުންހުރި މީހުންނާއި ވިޔަފާރިތަކަށް ޕްރޮކިއުމަންޓު އެވޯޑުކުރާ މައްސަލަތަކާއި ޕްރޮކިއުމަންޓު އެވޯޑުކުރުމުގެ މުގާބިލުގައި ރިޝްވަތުގައި ހިފާ މައްސަލަތައް ގިނަ އެވެ. މިހެން ނަމަވެސް މި ފަދަ ކަމެއްގައި މައްސަލައެއް ސާބިތުވެފައި ވަނީ މަދު ބަޔެއްގެ މައްޗަށެވެ.
