ޓޫރިޒަމްގެ ބޭނުންތަކަށް ރަށްތަކާއި، ބިންތަކާއި، ފަޅުތައް ދޫކުރަން ލިބޭ ހުށަހެޅުންތައް އިވެލުއޭޓު ކުރާ ކޮމިޓީގައި ތިބީ ޓޫރިޒަމް ދާއިރާގައި އެއްވެސް އިރެއްގައި މަސައްކަތް ނުކުރާ، ދާއިރާގެ ތަޖުރިބާއެއް ނެތް ސިޔާސީ މީހުންކަން "އަދަދު" އަށް އެނގިފައިވާ ކަމަށް އިއްޔެ ރިޕޯޓުކުރި އެވެ.
ރިސޯޓު ބިޑުތައް ވަޒަންކުރާ ކޮމިޓީއަކީ ހުރިހާ ހުށަހެޅުންތަކެއް ވަޒަންކުރުމަށް ފަހު، ތަންތަން ދޫކުރަން ވަޒީރަށް ލަފާއަރުވާ ކޮމިޓީ އެވެ. މި ކޮމިޓީ އެކުލަވާލުމުގެ ބާރު އޮންނަނީ ޓޫރިޒަމް މިނިސްޓަރަށެވެ. މި ބާރުގެ ދަށުން މިހާރުގެ ޓޫރިޒަމް މިނިސްޓަރު އިބްރާހިމް ފައިސަލް އެކުލަވާލާފައިވާ ކޮމިޓީގައި ތިއްބަވަނީ:
- ޓޫރިޒަމްގެ ސްޓޭޓު މިނިސްޓަރު އަހުމަދު ނާޒިމް މުހައްމަދު
- ޓޫރިޒަމްގެ ސްޓޭޓު މިނިސްޓަރު މުންއިމް އަނީސް
- ފިނޭންސް މިނިސްޓްރީގެ ސީނިއާ ޕޮލިޓިކަލް ޑިރެކްޓަރު އާއިޝަތު ރިއުޝާނާ
ރިސޯޓު ބިޑުތައް އިވެލުއޭޓު ކުރާ ކޮމިޓީގައި މިހާރު ތިބި ތިން މީހުންގެ ޓޫރިޒަމް ދާއިރާގެ ތަޖުރިބާ ހުރިތޯ ބެލިއިރު އެ ދާއިރާގައި މަސައްކަތް ކޮށްފައިވާ ކަން އެނގޭނެ އެއްވެސް މައުލޫމާތެއް ނުފެނުނެވެ.
ކޮމިޓީގައި ތިއްބަވާ މީހުންގެ ތެރެއިން ނާޒިމްއަކީ ކޯޕަރޭޓް ލޯއަށް ހާއްސަަވާ ގާނޫނީ ވަކީލެކެވެ. އޭނާ ގިނަ ދުވަހު މަސައްކަތް ކުރެއްވީ ރައްޔިތުންގެ މަޖިލީހުގެ ލީގަލް އޮފިސަރެއްގެ ގޮތުގަ އެވެ. ޓޫރިޒަމް މިނިސްޓްރީއަށް ވަޑައިގެންނެވުމުގެ ކުރިން އެންމެ ފަހުން އޭނާ އަދާކުރެއްވި މަގާމަކީ މަޖިލީހުގެ ލީގަލް އެފެއާޒް ޑިރެކްޓަރު ކަމެވެ. އޭގެ އިތުރުން އޭނާއަކީ ސީއެލްއޭ ޕާޓްނާސް އެލްއެލްޕީގެ ޕާޓްނަރެއް ވެސް މެ އެވެ.
ކޮމިޓީގައި ދެން އިންނަވާ މުންއިމްއަކީ އިންޓީރިއާ އާކިޓެކްޗާ އާއި އިންފޮމޭޝަން ޓެކްނޮލޮޖީ އާއި މަލްޓިމީޑިއާ ކޮމްޕިއުޓިންގެ އިތުރުން އިންޓަނޭޝަނަލް ރިލޭޝަންސް އެންޑް އެފެއާޒްއިން މަތީ ތައުލީމު ހާސިލުކުރައްވާފައިވާ ޑިޕްލޮމެޓެކެވެ. އޭނާ ގިނަ ދުވަހު މަސައްކަތް ކުރެއްވީ ބޭރުގައި ހުންނަ އެމްބަސީތަކުގަ އެވެ. އެ ގޮތުން ފުރަތަމަ މަސައްކަތް ކުރެއްވީ ސިންގަޕޫރުގައި ހުންނަ ރާއްޖޭގެ އެމްބަސީގެ ޗާޖޭ ޑެފެއާއަކަށެވެ. ޓޫރިޒަމްގެ މަގާމާ ހަވާލުވެވަޑައިގެންނެވުމުގެ ކުރިން އޭނާ ހުންނެވީ މެލޭޝިއާގައި ހުންނަ ރާއްޖޭގެ ހައިކޮމިޝަންގެ ފަސްޓް ސެކެޓްރީއަކަށެވެ.
ކޮމިޓީ މެންބަރުންގެ ތެރެއިން ރިއުޝާނާއަކީ ވެސް ގާނޫނީ ވަކީލެކެވެ. އޭނާގެ މަސައްކަތު ތަޖުރިބާގެ މާ ގިނަ މައުލޫމާތެއް ނުލިބެ އެވެ. ނަމަވެސް މި ސަރުކާރާ ގުޅުން އޮތް ބަޔަކު ޕާޓްނާވާ ލޯ ފާމެއް ކަމުގައިވާ، އޯތު ލޯ ފާމް އެންޑް އެސޯސިއޭޓްސްގެ ލީގަލް ކައުންސިލެއްގެ ގޮތުގައި އޭނާ ރަޖިސްޓްރީވެފައިވާ ކަމަށް ބާ ކައުންސިލުގެ ރެކޯޑުތަކުން ދައްކަ އެވެ.
މި ކޮމިޓީއަށް ފަންނީ އެހީތެރިކަމާއި ގާނޫނީ އެހީތެރިކަން ދިނުމަށްޓަކައި، ސެކްޓެރޭޓިއަޓްގެ ގޮތުގައި މަސައްކަތް ކުރަނީ ޓޫރިޒަމްގެ ޑެޕިއުޓީ ޑިރެކްޓާ ޖެނެރަލް އަލީ ޝިނާން އާއި ލީގަލް އޮފިސަރު ޝުކުރާނާ މުހައްމަދެވެ.
ރިސޯޓު ތަރައްގީކުރަން ހުށަހަޅާ ބިޑުތައް އިވެލުއޭޓު ކުރާ ކޮމިޓީގައި ތިއްބަވާ މެންބަރުންގެ ތަޖުރިބާ ނެތް މައްސަލަ ފެންމަތިވީއިރު، ޓޫރިޒަމް މިނިސްޓްރީން ވަނީ މި އަހަރުގެ ތެރޭގައި 16 ތަނެއް ރިސޯޓު ތަރައްގީކުރަން ކުއްޔަށް ދޫކޮށްފަ އެވެ. މިހާރުގެ ކޮމިޓީ އެކުލަވާލީ ތާރީހާ އަޅައިބަލާއިރު، ގިނަ ތަަންތަން ދޫކޮށްފައި ހުރީ އެ ކޮމިޓީގެ ލަފާ ލިބިގެންނެވެ.
