ހައުސިން ޑިވެލޮޕްމެންޓު ކޯޕަރޭޝަން (އެޗްޑީސީ) ގެ މެނޭޖިން ޑިރެކްޓަރުގެ މަގާމަށް އިބްރާހިމް ފަޒުލް ރަޝީދު އައްޔަން ކުރެއްވުމާއެކު، އުސޫލުތަކާ ހިލާފަށް، އަދި ހިޔާނަތަށް ތުހުމަތު ކުރެވޭ ގޮތަށް އޭނާ ހިންގަމުން ދިޔަ މައްސަލަތައް ރައީސް ޑރ. މުހައްމަދު މުއިއްޒުގެ ސަމާލު ކަމަށް، ގެނެސްފައި އޮތްކަން އިއްޔެ ރިޕޯޓުކުރި އެވެ.
ފަޒުލްގެ މައްޗަށް ތުހުމަތު ކުރެވޭ މައްސަލަތައް ރައީސް މުއިއްޒުގެ ސަމާލު ކަމަށް މިދިޔަ ޖުލައިގައި ގެނައީ އެ ކުންފުނީގެ ކުރީގެ ޗެއާމަން އަހުމަދު ޒުހޫރެވެ. އޭނާ ރައީސްއަށް ފޮނުއްވި ހަތް ސަފުހާގެ ސިޓީގައި ކުންފުނީގެ އެތެރޭގެ މައްސަލަތަކާއި، ހިޔާނާތުގެ މައްސަލަތަކާއި ވިޔަފާރިވެރިންގެ ޝަކުވާތައް ހިއްސާކޮށްފައިވެ އެވެ.
"އަދަދު" އަށް މި ސިޓީގެ ކޮޕީއެއް ލިބިފައިވެ އެވެ. އެ ސިޓީގައި ޒުހޫރު ވިދާޅުވީ، ޗެއާމަންގެ މަގާމަށް އޭނާ އައްޔަން ކުރީ އުސޫލުތައް ބަދަލުކޮށް ތިލަފުށިން ބިމެއް ބަދަލު ކުރި ވާހަކާ އާއި ފަޒުލްގެ އަނބިކަނބަލުންނަށް ހުޅުމާލެއިން ބިމެއް ދިން ވާހަކަ އާއި ވިޔަފާރިވެރިންގެ ޝަކުވާ އެޗްޑީސީގެ މެނޭޖުމެންޓާ މެދު ގިނަވެފައިވާ ދުވަސްވަރެއްގައި ކަމަށް ވުމުން، އިސްކަމެއް ދެއްވީ އެ ކަންކަން ހައްލު ހޯދައިދޭން ކަމަށެވެ.
އެ ވާހަކަތައް ފަޒުލްއާ ހިއްސާކުރުމުން އޭނާ ރުޅި އިސްކުރައްވައި، ވިދާޅުވީ "ތިމަންނާ ކަންތައް ކުރާނެ ގޮތް އެނގޭނީ ތިމަންނާއަށް" ކަމަށް ވިދާޅުވި ކަމަށެވެ. އެކަމާއި ހިތްހަމަ ނުޖެހޭނަމަ ޗެއާމަންގެ މަގާމު ދޫކޮށްލުމަށް ފަޒުލް ވިދާޅުވި ކަމަށް ޒުހޫރު ފާހަގަ ކުރައްވާފައިވެ އެވެ.
