ބިންވެރިޔާ ސްކީމްގެ ދަށުން ގޯތި ނުލިބޭ މީހުންނަށް ގޯތި ލިބުނު ކަމަށް ވަގު ލިޔުންތަކެއް ތައްޔާރުކޮށް ވަގަށް ގޯތިތަކެއް ވިއްކި ކަމަށް ތުހުމަތުކުރެވޭ މައްސަލައިގައި ފުލުހުންނާއި އެންޓި ކޮރަޕްޝަން ކޮމިޝަން (އޭސީސީ) މިއަދު ބައްދަލު ކޮށްފި އެވެ.
ފުލުހުން ބުނީ އެ މައްސަލައިގައި ކޮމިޝަނާ އޮފް ޕޮލިސް އަލީ ޝުޖާއު އާއި އެންޓި ކޮރަޕްޝަން ކޮމިޝަންގެ މެންބަރުންނާ އެކު ފުޅާ ދާއިރާއެއްގައި މަޝްވަރާ ކޮށްފައިވާ ކަމަށެވެ.
އިއްޔެ ފެންމަތިވި ގޯތި ވައްކަމުގެ މައްސަލައާ ގުޅިގެން ފުލުހުން ރޭ ޖިނާއީ ތަހުގީގެއް ފެށިކަން އިއުލާން ކުރިތާ މާގިނަ އިރުތަކެއް ނުވަނީސް، އެ މުއައްސަސާއިން ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އަށް ވަނެވެ.
މީގެ އިތުރުން އޭސީސީން ރޭ ވަނީ އެ މައްސަލަ ތަހުގީގު ކުރަމުންދާކަން ހާމަ ކޮށްފަ އެވެ. އަދި އެކަމާ ގުޅިގެން އެޗްޑީސީއަށް ވަންނަން ޖެހޭނަމަ ވަންނާނެ ކަމަށް ވެސް އެ ކޮމިޝަނުން ބުންޏެވެ.
ގެދޮރުވެރިޔާ ސްކީމް އަދި ބިންވެރިޔާ ސްކީމަށް އެދި ފޯމް ބަލައިގަތުމާއި ގޯއްޗާއި، ފްލެޓް ލިބޭ ފަރާތްތައް ކަނޑައެޅުމުގައި އަދި ގޯއްޗާއި ފްލެޓް ދޫކުރުމުގައި، ކަނޑައެޅިފައިވާ އުސޫލުތަކާއި ގަވާއިދުތަކާ ހިލާފަށް އަމަލުކޮށްފައިވާ ކަމުގެ ކަންބޮޑުވުން ޕީޖީގެ ސަމާލުކަމަށް އައިސްފައިވާ ކަމަށް އެ އޮފީހުން މިއަދު ބުނެފައިވެ އެވެ.
"ގޯއްޗާއި ފްލެޓް ދޫކުރުމުގައި އަމަލުކޮށްފައިވާ ގޮތުގެ ތަހުގީގެއް ހިންގުމަށް ފަހު، މިކަމުގައި އެއްވެސް މީހެއްގެ މައްޗަށް ޖިނާއީ ތުހުމަތެއް ކުރެވޭނެމަ، އެކަން ތަހުގީގު ކުރުމަށް ފަހު ދައުވާ ކުރުމަށްޓަކައި މި އޮފީހަށް ހުށަހެޅުމަށް، ދިވެހި ފުލުހުންގެ ހިދުމަތަށާއި އެންޓި ކޮރަޕްޝަން ކޮމިޝަނަށް ޕްރޮސިކިއުޓާ ޖެނެރަލް އަމުރުކުރައްވައިފި," އެ އޮފީހުން މައުލޫމާތު ދީފައިވެ އެވެ.
މިދިޔަ ސަރުކާރުގެ ބޯހިޔާވަހިކަމުގެ ސްކީމުތަކާ ގުޅޭ ތަހުގީގެއް ހިންގަން އަމުރުކުރި ދަނޑިވަޅަކީ ސަރުކާރު ބަދަލުވުމަށް ފަހު އައި އެޗްޑީސީގެ މެނޭޖުމަންޓުން ވަގަށް ގޯތިތަކެއް ވިއްކާފައިވާ މައްސަލައެއް ފެންމަތިވެފައިވާ ދަނޑިވަޅެކެވެ.
ބިންވެރިޔާ ސްކީމުގެ ދަށުން މިދިޔަ ސަރުކާރުގައި މާލެ ރައްޔިތުންނަށް 9،003 ގޯތި ދޫކުރި އެވެ. ބިންވެރިޔާ ސްކީމުން ދޫކުރި ގޯތިތައް ހުންނަނީ ހުޅުމާލޭ އާއި ގުޅީފަޅާއި ގިރާވަރު ފަޅުންނެވެ. އެއީ ހުޅުމާލެއިން ދޫކުރާ 1407 ގޯއްޗާއި ގުޅީފަޅުން ދޫކުރާ 2219 ގޯއްޗާއި ގިރާވަރުފަޅުން ދޫކުރާ 5433 ގޯއްޗެވެ.
