މި މަހުގެ ކުރީކޮޅު އާޓިފިޝަލް ބީޗުގައި ހިންގި މާރާމާރީގައި އިސްކޮށް އުޅުނު ބިދޭސީ ހައްޔަރުކޮށް އިމިގްރޭޝަނުގެ ބެލުމުގެ ދަށަށް ގެންގޮސް، ޑީޕޯޓުކޮށްލަން ނިންމާފައިވާ ކަމަށް އެ އިދާރާއިން ބުނެފި އެވެ.
އެ މައްސަލައިގައި ހައްޔަރު ކޮށްފައި ވަނީ އަމްރިތު ސިންގު 25، އެވެ. އެއީ ކޮން ގައުމެއްގެ މީހެއްކަމެއް އިމިގްރޭޝަނުން ނުބުނެ އެވެ.
އެކްސްގައި އިމިގްރޭޝަނުން ކުރި ޕޯސްޓެއްގައި ބުނީ މި މަހު 6، ގައި އާޓިފިޝަލް ބީޗުގައި ހިންގި މާރާމާރީގައި އެންމެ އިސްކޮށް އުޅުނު ބިދޭސީ ހައްޔަރު ކުރީ ފުލުހުންގެ އެހީތެރިކަމާއެކު ކަމަށެވެ. އަދި އެ މީހާ ޑީޕޯޓު ކޮށްލުމުގެ މަސައްކަތް މިހާރު ކުރަމުންދާ ކަމަށް ވެސް އިމިގްރޭޝަނުން ބުންޏެވެ.
"އާޓިފިޝަލް ބީޗު ސަރަހައްދުގައި ހިންގި މާރާމާރީގައި އެންމެ އިސްކޮށް އުޅުނު ބިދޭސީ މީހާ ވަނީ ފުލުހުންގެ އެހީތެރިކަމާއެކު އިމިގްރޭޝަންގެ ބެލުމުގެ ދަށަށް ގެނެވިފައި، އަދި މި މީހާ ޑިޕޯޓުކޮށްލުމުގެ މަސައްކަތް މިހާރު ދަނީ ކުރަމުން،" އިމިގްރޭޝަނުގެ ޕޯސްޓުގައި ބުނެފައިވެ އެވެ.
މާރާމާރީއާ ގުޅިގެން ހައްޔަރު ކުރީ ކޮން ގައުމެއްގެ މީހެއްކަން އިމިގްރޭޝަނުން ހާމަ ނުކުރި ނަމަވެސް، އެ ދުވަހު މާރާމާރީ ހިންގިތަން ފެންނަ ވީޑީއޯތަކަށް ބަލާއިރު، ބޮޑަށް ބެލެވެނީ އެކަން ކުރީ އިންޑިއާ ބައެއް ކަމަށެވެ.
އެ މާރާމާރީ ހިންގީ އެ ދުވަހުގެ އިރުއޮއްސުނު ވަގުތު އެވެ. އެ މާރާމާރީގެ ތެރެއިން އެ ސަރަހައްދުގައި އެވަގުތު ހުރި ތުއްތު ކުއްޖަކަށް ވެސް ކޮންމެވެސް ވަރަކަށް އަނިޔާވި އެވެ.
ކޮންމެ ހަފުތާއެއްގެ ވެސް ހަފުތާ ބަންދުގައި އާޓިފިޝަލް ބީޗާއި ޖުމްހޫރީ މައިދާން ފަދަ ސަރަހައްދުތަކަށް ގިނަ އަދަދެއްގެ ބިދޭސީން ޖަމާވެ އެވެ. ނަމަވެސް މިފަދަ ހަމަނުޖެހުމެއް ހިނގާފައި ވަނީ ވަރަށް މަދު ފަހަރެއްގެ އެވެ.
