ރާއްޖޭގެ ޗެމްޕިއަން، މާޒިޔާ ސްޕޯޯޓްސް އެންޑް ރެކްރިއޭޝަން އާއި އެ ކްލަބްގެ މެއިން ސްޕޮންސަރުން ކަމަށްވާ އުރީދޫ މޯލްޑިވްސް އިން ގުޅިގެން އއ. އުކުޅަހުގައި ކިޑްސް ކޭމްޕެއް ކުރިއަށްގެންގޮސްފި އެވެ.
އިއްޔެ ހަވީރު އުކުޅަހު ޓާފް ދަނޑުގައި މާޒިޔާ އާއި އުރީދޫން ގުޅިގެން ކުރިއަށްގެންދިޔަ ކިޑްސް ކޭމްޕްގައި، 150 އަށް ވުރެ ގިނަ ކުދިން ބައިވެރިވިއިރު، މި އިވެންޓްގައި މާޒިޔާ ޓީމުގެ 11 ކުޅުންތެރިން ވެސް ވަނީ ބައިވެރިވެފަ އެވެ.
މާޒިޔާގެ ކުޅުންތެރިންނާއި ކޯޗިން ޓީމު އަދި މެނޭޖްމަންޓްގެ އެކި ފަރާތްތަކުން ވެސް ބައިވެރިވި މި އިވެންޓްގައި، މާޒިޔާ އިން ކޭމްޕްގައި ބައިވެރިވި ކުދިންނަށް ޑްރިލްތަކެއް ވެސް ކުރިއަށްގެންގޮސްފަ އެެވެ. މި ޑްރިލްތަކުގައި ކުދިންނާ އެކު، ކޯޗުންނާއި ކުޅުންތެރިން ވެސް ވަނީ ބައިވެރިވެފަ އެވެ.
މީގެ އިތުރުން، މާޒިޔާގެ ފަރާތުން ވަނީ، އުކުޅަސް ސްކޫލާއި އުޅުޅަސް ސްޕޯޓްސް އެކަޑަމީ އަށް ކުޅިވަރު ސާމާނު ހަދިޔާކޮށްފަ އެވެ.
މި އިވެންޓް ފުރިހަމަ ކުރުމުގެ ގޮތުން ރޮބޯމޭން ވެސް ވަނީ ބައިވެރިވެފަ އެވެ. ރޮބޯމޭން ކުރިއަށްގެންދިޔަ ފަން އިވެންޓުތަކުގައި ކުދިން ވަނީ ފޯރީގައި ބައިވެރިވެފަ އެވެ.
