ރާއްޖޭގެ ސިމްޑީ ގްރޫޕާއި ޔޫއޭއީގެ އަރަބެކްސް ގުޅިގެން އުފައްދާފައިވާ ދުނިޔޭގެ ފުރަތަމަ ޕްރިމިއަމް ލެއިޝާ އެއާލައިން "ބިއޮންޑް" އަށް ޑިޒައިންއެއާ އެވޯޑްސްގައި ދެ އެވޯޑެއް ލިބިއްޖެ އެވެ.
އެމެރިކާގެ ނިއުޔޯކުގައި ބޭއްވި އެ އެވޯޑް ހަފްލާގައި ބިއޮންޑަށް ލިބުނީ ބެސްޓް ނިއު ލިވަރީ އެވޯޑް އަދި މޯސްޓް އިމްޕްރޫވްޑް / ބެސްޓް ނިއު އެއާލައިން ބްރޭންޑް އެވޯޑެވެ.
ބިއޮންޑްގެ ސީއީއޯ ޓެރޯ ޓަސްކިލާ ވިދާޅުވީ އެއާލައިނަށް ލިބުނު ދެ އެވޯޑަކީ ބިއޮންޑުގެ ޓީމުގެ ހުނަރުވެރިކަމާއި ބުރަ މަސައްކަތުން ލިބުނު ދެ އެވޯޑު ކަމަށެވެ.
"ފުރަތަމަ ދުވަހުން ފެށިގެން އަހަރުމެން މަސައްކަތް ކުރަމުން ދިޔައީ އޭވިއޭޝަންގެ ވަރުގަދަ ޑިޒައިނަކާ އެކު ރަނގަޅު ހިދުމަތެއް ދިނުމަށް. ކުރި ބުރަ މަސައްކަތުގެ އަގު ވަޒަން ކުރެވުމަކީ ލިބުނު އުފަލެއް،" އޭނާ ވިދާޅުވި އެވެ.
ލަގްޒަރީ ޓޫރިޒަމް މާކެޓަށް އަމާޒުކޮށްގެން، އެންމެ މަތީ ފަންތީގެ ވައިގެ ދަތުރުފަތުރުގެ ހިދުމަތް ދޭ ބިއޮންޑުން ހަ މަންޒިލަކަށް އަންނަނީ ދަތުރުތައް ކުރަމުންނެވެ.
ބިއޮންޑްގެ ދަތުރުތަކަށް ބޭނުންކުރާނީ އެއާބަސް އޭ319، އޭ320 އަދި އޭ321 ގެ ބޯޓުތަކެވެ. މި ދަތުރުތަކުގައި ޕަސިންޖަރުންނަށް އެންމެ މަތީ ފެންވަރުގެ ހިދުމަތް ފޯރުކޮށްދީ ބޯޓުތެރޭގެ ޖާގަ ތަނަވަސްކުރުމުގެ ގޮތުން ބޯޓުތަކުގެ ސީޓްތައް ހުންނާނީ މަދުކޮށްފަ އެވެ.
"އޯލް ބިޒްނަސް ކްލާސް"ގެ ސީޓުތައް ހިމެނޭ މި ބޯތުތަކުގައި ހުންނާނީ 44-68 ސީޓެވެ. އަދި ބޯޓުގައި ބޭނުންކުރާ ގޮނޑި ތަކަކީ ފޯ ސީޒަންސް އޭ321 ޕްރައިވެޓް ޖެޓްތަކުގެ ސީޓްތައް ސަޕްލައިކުރި އިޓަލީގެ އޮޕްޓިމާސް ކުންފުނިން ޑިޒައިންކޮށްފައިވާ މަތީ ފެންވަރުގެ ސީޓްތަކެވެ.
