ރާއްޖޭގެ ސިމްޑީ ގްރޫޕާއި ޔޫއޭއީގެ އަރަބެކްސް ގުޅިގެން އުފައްދާފައިވާ ފުރަތަމަ ލަގްޒަރީ އެއާލައިން، "ބިއޮންޑް"ގެ މާލޭ އޮފީސް މިއަދު ހުޅުވައިފި އެވެ.
ހ. ސަންރޭ، ތިން ވަނަ ފަންގިފިލާގައި ހުންނަ ބިއޮންޑުގެ އޮފީސް ހުޅުވައި ދެއްވީ ޓްރާންސްޕޯޓު މިނިސްޓްރީގެ ސްޓޭޓް މިނިސްޓަރު އަހުމަދު ޒުހައިރު އާއި ސިމްޑީ ގްރޫޕުގެ ސީއީއޯ މަރިޔަމް ޝަކީލާ އަދި ބިއޮންޑުގެ ސީއީއޯ ޓެރޯ ޓަސްކިލާ އެވެ.
އެ ރަސްމިއްޔާތުގައި ޒުހައިރު ވިދާޅުވީ ބިއޮންޑަކީ ފަހުރިވެރިވާ ފަދަ އިންވެސްޓްމެންޓެއް ކަމަށާއި ވަރަށް އަވަހާ ބިއޮންޑުގެ އުދުހުންތައް ފެށޭނެ ކަމަށް އުއްމީދު ކުރައްވާ ކަމަށެވެ.
އާ އެއާލައިނެއްގެ އެންމެ މުހިންމު މަސައްކަތަކީ އަދި އެންމެ ބޮޑު ގޮންޖެހުމަކަށް ދިމާވާނީ އެއާލައިންގެ އޮޕަރޭޝަން ރަނގަޅަށް އޮމާންކޮށް ކުރިއަށް ގެންގޮސް ދެމެހެއްޓުން ކަމަށް އޭނާ ވިދާޅުވި އެވެ.
އާ އިންވެސްޓުމެންޓުތަކަށް މަރުހަބާ ކިޔާ ކަމަށާއި ވައިގެދަތުރުފަތުރުގެ ވިޔަފާރި ތަރައްގީކޮށް، ރާއްޖޭގެ އެތެރޭގެ އުދުހުންތަކާއި ރާއްޖެ އަށް އަންނަ ފްލައިޓުތައް އިތުރު ކުރުމަކީ މި ސަރުކާރުގެ ސިޔާސަތެއް ކަމަށް ޒުހައިރު ވިދާޅުވި އެވެ.
ބިއޮންޑުގެ އޮފީސް ހުޅުވުމުގެ ރަސްމިއްޔާތުގައި ޝަކީލާ ވާހަކަ ދައްކަވަނީ. -- ފޮޓޯ: މުހައްމަދު ޝާބިން/އަދަދު
ސިމްޑީ ގްރޫޕުގެ ސީއީއޯ، އަދި ކުރީގެ މިނިސްޓަރު މަރިޔަމް ޝަކީލާ ވިދާޅުވީ އެ ކުންފުންޏަކީ ޓޫރިޒަމް ދާއިރާއާ ވަރަށް ގާތް ގުޅުމެއް އޮތް ކުންފުންޏެއް ކަމަށާއި އަދި ސިމްޑީގެ ވެރިޔާ އިބްރާހިމް މުހައްމަދު ދީދީ އަކީ ބިއޮންޑު ގެނައުމުގައި އެންމެ ބޮޑު ހިއްސާ އޮތް ފަރާތް ކަމަށެވެ. މިފަދަ ލަގްޒަރީ އެއާލައިނެއް ރާއްޖެއަށް ތައާރަފު ކުރެވުމަކީ ދިވެއްސެއްގެ ހައިިސިއްޔަތުން ފަހުރުވެރިވާ ކަމެއް ކަމަށް އޭނާ ވިދާޅުވި އެވެ.
"ބިއޮންޑު ކާމިޔާބާ ހަމައަށް ދެވުމުން ރާއްޖޭގެ އިގުތިސޯދަށް ބޮޑު ބަދަލުތަކެއް އަންނާނެ. ކުރިއެރުން ފެންނާނެ. ޓޫރިޒަމަށް ވެސް އެހާމަ ބޮޑު ކުރިއެރުން އަންނާނެ،" އޭނާ ވިދާޅުވި އެވެ.
މި ޕްރޮޖެކްޓު ކާމިޔާބުކަމާއެކު ކުރިއަށް ގެންދެވުނީ މިނިސްޓްރީތަކާއި ގުޅުން ހުރި އެހެން އޮފީސްތަކުގެ އެއްބާރުލުމުގެ ސަބަބުން ކަމަށް ޝަކީލާ ފާހަގަ ކުރެއްވެވި އެވެ.
ބިއޮންޑުގެ އޮފީސް ހުޅުވުމުގެ ރަސްމިއްޔާތުގައި ބިއޮންޑާއި ސިމްޑީގެ ިއިސްވެރިން އަދި ބައިވެރިވެވަޑައިގެންނެވި ސަރުކާރުގެ އިސް ވެރިން. -- ފޮޓޯ: މުހައްމަދު ޝާބިން/އަދަދު
ބިއޮންޑް އެއާލައިނަކީ ލަގްޒަރީ ޓޫރިޒަމް މާކެޓަށް އަމާޒުކޮށްގެން، އެންމެ މަތީ ފަންތީގެ ވައިގެ ދަތުރުފަތުރުގެ ހިދުމަތް ދިނުމުގެ މަގުސަދުގައި ފަށާފައިވާ މަސައްކަތެކެވެ. އަރަބެކްސްކަކީ އޭވިއޭޝަން ދާއިރާގެ ތަޖުރިބާކާރުން އުފައްދާފައިވާ އިންވެސްޓްމަންޓް ކުންފުންޏެކެވެ.
ބިއޮންޑުގެ ދަތުރުތައް މިއަހަރުގެ ތެރޭގައި ޗައިނާ، ޔޫއޭއީ، ސައުދީ އަރަބިއާ، ޔޫރަޕް ފަދަ މަންޒިލްތަކަށް ފަށާނެ އެވެ.
