ބިއޮންޑަށް ގައުމީ އެއާލައިނުގެ ދަރަޖަ ލިބިފައި ނުވާ ކަމަށާއި އެފަދަ މަޝްވަރާއެެއް އެއްވެސް އިދާރަކާއެކު ކޮށްފައި ނުވާނެ ކަމަށް އެ އެއާލައިނުން ބުނެފި އެވެ.
އެ އެއާލައިނުން މިއަދު ނެރުނު ނޫސްބަޔާނެއްގައި ބުނީ، ބިއޮންޑުގެ ހައިސިއްޔަތާ ގުޅުވައިގެން ސީއެންއެން ގެ އިންޓަވިއުގައި ދެކެވުނު ވާހަކަތަކަށް މައާފަށް އެދޭކަމަށެވެ.
ބިއޮންޑު އެއާލައިނަކީ ލަގްޒަރީ ޓޫރިޒަމް މާކެޓަށް އަމާޒުކޮށްގެން، އެންމެ މަތީ ފަންތީގެ ވައިގެ ދަތުރުފަތުރުގެ ހިދުމަތް ދިނުމުގެ މަގުސަދުގައި ފަށާފައިވާ މަސައްކަތެކެވެ. އެ އެއާލައިނުގެ އެއް ހިއްސާދާރު، ޔޫއޭއީގެ އަރަބެކްސްއަކީ އޭވިއޭޝަން ދާއިރާގެ ތަޖުރިބާކާރުން އުފައްދާފައިވާ އިންވެސްޓްމަންޓް ކުންފުންޏެކެވެ.
ބިއޮންޑުގެ ދަތުރުތައް މިއަހަރުގެ ތެރޭގައި ޗައިނާ، ޔޫއޭއީ، ސައުދީ އަރަބިއާ، ޔޫރަޕް ފަދަ މަންޒިލްތަކަށް ފެށުމަށް ދަނީ މަސައްކަތް ކުރަމުންނެވެ.
"މި އެއާލައިނުގެ ހައިސިއްޔަތާ ގުޅޭ ގޮތުން ފެތުރިފައިވާ ހަގީގަތެއް ނެތް ވާހަކަތަކަށް ބިއޮންޑުގެ މެނޭޖުމަންޓުން މައާފަށް އެދެން،" ބަޔާނުގައި ބުނެފައިވެ އެވެ.
އެ ނޫސް ބަޔާނުގައި ވަނީ ރާއްޖޭގެ އިގުތިސާދު ހަރުދަނާ ކުރުމަށާއި ފަތުރުވެރިކަން ކުރިއެރުވުމަށް ސަރުކާރާއި ފަތުރުވެރިކަމުގައި ހަރަކާތްތެރިވާ ކުންފުނިތަކުގެ އިތުރުން ކަމާގުޅުންހުރި އެހެން ފަރާތްތަކާ އެކު ގުޅިގެން މަސައްކަތް ކުރަން ބޭނުންވާ ކަމަށް ބުނެފަ އެވެ.
ރާއްޖޭގެ ފުރަތަމަ ގައުމީ އެއާލައިނަކީ އެއާ މޯލްޑިވްސް އެވެ. ނަމަވެސް 2000 ވަނަ އަހަރު އެ ކުންފުނި ބަނގުރޫޓުވުމާ ގުޅިގެން ހަމަ އެ އަހަރު، އައިލެންޑު އޭވިއޭޝަނުގެ ނަމުގައި ސަރުކާރުގެ 100 ޕަސެންތު ހިއްސާ އޮންނަ އާ އެއާލައިނެއް އުފައްދައި ގައުމީ ފްލެގް ކެރިއާގެ ޒިންމާ އެ ކުންފުންޏާ މަތި ކުރީ އެވެ.
އެ އެއާލައިނުގެ ނަން، މޯލްޑިވިއަންއަށް ބަދަލު ކުރީ 2008 ގަ އެވެ. މި އަހަރަށް ގައުމީ އެއާލައިނުގެ ގޮތުގައި މޯލްޑިވިއަނުން ދަތުރު ކުރަމުންދާތާ 23 އަހަރު ފުރޭނެ އެވެ.
މޯލްޑިވިއަންގެ ފަހުން ވެސް ދިވެހި އެކި އެއާލައިންތައް އުފައްދައި ދަތުރު ކޮށްފައިވެ އެވެ. އެހެންނަމަވެސް އެއިން އެއްވެސް ކުންފުންޏަކަށް ރާއްޖޭގެ ގައުމީ އެއާލައިނުގެލަގަު ދީފައެއް ނުވެ އެވެ.
