ސަރުކާރުން ޓެކްސީގެ ހިދުމަތް ދިނުމަށް ތައްޔާރުވަމުންދާތީ އެކަމާ ދެކޮޅަށް މުޒާހަރާކޮށްގެން ކޯޓު އަމުރެއްގެ ދަށުން ހައްޔަރުކުރި ޓެކްސީ ޑްރައިވަރު ފަސް ދުވަހުގެ މުއްދަތަށް ބަންދުގައި ބެހެއްޓުމަށް ހުޅުމާލޭ މެޖިސްޓްރޭޓް ކޯޓުން އަމުރުކޮށްފި އެވެ.
ފުލުހުން ރޭ ކޯޓު އަމުރެއްގެ ދަށުން ހައްޔަރުކުރީ ޑްރައިވާސް އެސޯސިއޭޝަންގެ އިންތިޒާމް ސެކްރެޓަރީ މިސްބާހު ޝަރީފު އެވެ. މިސްބާހު ހައްޔަރު ކުރީ ރޭ ވެސް މުޒާހަރާކުރަން އިއުލާނުކޮށްފައި ވަނިކޮށެވެ.
ފުލުހުން ވަނީ އޭނާ ހައްޔަރުކުރިއިރު ކޯޓު އަމުރެއްގެ ދަށުން އޭނާގެ ފޯނުވެސް ހިފަހައްޓާފަ އެވެ. މިސްބާހު މުޖުތަމައު ތެރެއަށް ދޫވެފައި ހުރުމަކީ މުޖުތަމައުގެ ސަލާމަތަށް ނުރައްކާވެދާނޭކަމެއް ކަމަށް ފުލުހުން ކޯޓުގައި ބުނެފައި ވެއެވެ.
ޓެކްސީ ޑްރައިވަރުންގެ މުޒާހަރާއާ ގުޅިގެން ބުދަ ދުވަހުގެ ރޭ ހައްޔަރުކުރި ތިން މީހުންގެ ތެރެއިން ދެ މީހެއްގެ ބަންދަށް މީގެ ކުރިން ވަނީ ފަސް ދުވަސް ޖަހައިފަ އެވެ.
އެރޭ ފުލުހުންގެ ބެލުމުގެ ދަށަށް ގެންދިޔަ 21 ޓެކްސީގެ ތެރެގައި މިސްބާހުގެ ކާރު ވެސް ހިމެނެ އެވެ. ޓޯ ކުރި ބައެއް ޓެކްސީތައް މިހާރު ވަނީ ދޫކޮށްލައިފަ އެވެ. އެހެންނަމަވެސް ދޫކޮށްލީ ކިތައް ޓެކްސީ ކަމެއް ފުލުހުން ނުބުނެ އެވެ.
ޓެކްސީ ޑްރައިވަރުން ހައްޔަރު ކުރުމާއި 21 ޓެކްސީއެއް 30 ދުވަހަށް ހިފެހެއްޓުމުން، އެންމެ ބޮޑު އިދިކޮޅު ޕާޓީ، އެމްޑީޕީން ވަނީ ފުލުހުންގެ އެ އަމަލު ކުށްވެރިކޮށްފަ އެވެ.
ސަރުކާރުން ޓެކްސީ ލައިނެއް ތައާރަފުކޮށް ޓެކްސީގެ ހިދުމަތް ދިނުމަށް ނިންމާފައިވާކަން އެންމެ ފުރަތަމަ އިއުލާނު ކުރީ މިދިޔަ ޖުލައި 25، ގައި އޮތް ރަސްމިއްޔާތެއްގަ އެވެ. ނަމަވެސް އެކަމާ ދެކޮޅަށް ޓެކްސީ ޑްރައިވަރުން ނުކުމެ އިހުތިޖާޖު ކުރުމުން އޯގަސްޓު 4، ގައި ސަރުކާރުގެ ނިންމުން ބަދަލުކުރި އެވެ.
އެއަށްފަހު ޓެކްސީގެ ހިދުމަތް ދޭން ފަށަން އަލުން ނިންމައި ޓްރާސްޕޯޓު މިނިސްޓަރު، މުހައްމަދު އަމީން އެކަން ހާމަ ކުރެއްވީ ރައްޔިތުންގެ މަޖިލީހުގެ އިގުތިސާދީ ކޮމިޓީގައި ވާހަކަދައްކަވަމުން މިދިޔަ އޮކްޓޫބަރު 29 ގަ އެވެ.
އަމީން އެ ދުވަހު ވިދާޅުވީ ސަރުކާރުގެ ވިސްނުން ހުރީ ޓެކްސީ ހިދުމަތް ސަރުކާރު ހިއްސާވާ ކުންފުންޏެއް މެދުވެރިކޮށް ކުރުވުމަށް ކަމަށާއި އެ ހިދުމަތް ދޭން ފަށާނީ މިހާރު ޓެކްސީކަން ކުރާ ޑްރައިވަރުންގެ އެއްވެސް ބާރެއް ނުހިނގާ ގޮތަށް ކަމަށެެވެ.
އަމީން ވިދާޅުވީ ޓެކްސީ ހިދުމަތް ދޭން ފަށާނީ 50 ޕަސަންޓް ފުލްކޮށް މަސައްކަތް ކުރާ މުވައްޒަފުންނާއި އަނެއް 50 ޕަސަންޓް ޕާޓް ޓައިމްކޮށް މަސައްކަތް ކުރާ މުވައްޒަފުންނާ އެކުގައި ކަމަށާއި ރަނގަޅު ޝަރުތުތަކެއް އެކަމަށް ކަނޑައެޅިފައި ހުންނާނެ ކަމަށެވެ.
