ހުޅުމާލޭގެ ހިޔާގެ ޓަވަރަކުން ކުއްޖަކު ވެއްޓި މަރުވެއްޖެ އެވެ.
ފުލުހުން ބުނީ މަރުވެފައި ވަނީ 16 އަހަރުގެ ދިވެހި ފިރިހެން ކުއްޖެއް ކަމަށެވެ. އެ ކުއްޖާ ހުޅުމާލޭ ހޮސްޕިޓަލަށް ގެންދިޔަ އިރު ވެސް އޮތީ މަރުވެފައި ކަމަށް ފުލުހުން ބުންޏެވެ.
އެއީ ހިޔާގެ 5 ވަނަ ޓަވަރުގެ 13 ވަނަ ފަންގިފިލާގެ އެޕާޓްމެންޓެއްގައި އާއިލާއާއެކު ދިރިއުޅެމުން ދިޔަ ތ. ތިމަރަފުށީ ކުއްޖެކެވެ.
އެ ކުއްޖާ ވެއްޓިފައި އޮތް ސަރަހައްދުގައި މިރޭ ފުލުހުން ހަރަކާތްތެރި ވަނީ. -- ފޮޓޯ: އަދަދު
މަންޒަރު ފެނުނު މީހަކު އަދަދު ނޫހަށް ބުނީ ހުޅުމާލޭގެ ސްކޫލެއްގައި ކިޔަވަމުން ދިޔަ އެ ދަރިވަރު ފުންމާލީ މެންދަމު 1:24 ހާއިރު އެވެ. އެ ކުއްޖާ ކިޔަވަމުން ދިޔައީ ގްރޭޑު 10 ގަ އެވެ.
އެ ކުއްޖާ ވެއްޓިފައި އޮތީ 5 ވަނަ ޓަވަރުގެ އުތުރު ފަޅިއަށެވެ.
"އަޅުގަނޑު ވެސް ހުރީ އެ ސަރަހައްދާ ވަރަށް ކައިރީގައި. ވެއްޓި ޖެހުނު އަޑަށް އެނގުނީ. އެމްބިއުލާންސް އައީ ގާތްގަނޑަކަށް 1:45 ހާއިރު،" އޭނާ ބުންޏެވެ.
ފަސް ވަނަ ޓަވަރުގައި ދިރިއުޅޭ ބައެއް މީހުންނާއި މަރުވި ކުއްޖާގެ އާއިލާގެ ބައެއް މީހުން ބުނީ މަރުވި ކުއްޖާއަކީ އަހުލާގު ރަނގަޅު، މަޑުމައިތިކޮށް ހުންނަ ކުއްޖެއް ކަމަށެވެ. އަދި އެފަދަ ކަމެއް ކުރަންޖެހޭ ސަބަބެއް ނުވިސްނޭ ކަމަށް ވެސް ބައެއް މީހުން ބުންޏެވެ.
ފުލުހުން ދަނީ މައްސަލަ ތަހުގީގު ކުރަމުންނެވެ.
