ހައުސިން މިނިސްޓްރީ އާއި އިންފްރާސްޓަރަކްޗާ މިނިސްޓްރީގައި ރޯވެ އަނދަމުންދާ އަލިފާނުގެ ސަބަބުން ގެދޮރުވެރިޔާ ސްކީމުގެ ދަށުން އެކުލަވާލާފައިވާ ފުލެޓު ލިސްޓާއި އެ ލިސްޓާ ގުޅުންހުރި މައުލޫމާތަށް އެއްވެސް އަސަރެއް ނުކުރާނެ ކަމަށް ހައުސިން މިނިސްޓްރީން ބުނެފި އެވެ.
އަލިފާނުގެ ހާދިސާއާ ގުޅޭގޮތުން ހައުސިން މިނިސްޓްރީން ނެރުނު ބަޔާނެއްގައި ބުނީ، ސިފައިންގެ ފަޔާ ޑިޕާޓްމަންޓުން އަދިވެސް އަލިފާންގަނޑު ނިއްވުމުގެ މަސައްކަތް ކުރަމުންދާ ކަމަށެވެ. ހާދިސާގައި އެއްވެސް މުވައްޒަފަކަށް އަނިޔާ ނުވާ ކަމަށްވެސް އެ ބަޔާނުގައިވެ އެވެ.
އޭގެއިތުރުން، ފުލެޓު ލިސްޓާ ބެހޭ މައުލޫމާތަކީ މިނިސްޓްރީގެ ކްލައުޑު ހޯސްޓިންގައި ޑިޖިޓަލްކޮށް ބަލަހައްޓާ މައުލޫމާތުތަކެއް ކަމުން މިއަދުގެ ހާދިސާއާ ގުޅިގެން އެއިން އެއްވެސް މައުލޫމާތަކަށް އަސަރެއް ނުކުރާނެ ކަމަށް ވެސް ހައުސިން އިން ބުންޏެވެ.
ހާދިސާއާ ގުޅިގެން ސަލާމަތީ ހިދުމަތްތަކާ ގުޅިގެން މަސައްކަތް ކުރަމުންދާ ކަމަށާއި އިތުރު ތަފުސީލު ކުރިއަށް އޮތްތަނުގައި ދެމުންދާނެ ކަމަށްވެސް ހައުސިން މިނިސްޓްރީން ބުންޏެވެ.
އަލިފާން ރޯވުމާއެކު އެ އިމާރާތާއި އިންވެގެން ހުރި އިމާރާތްތަކުގައި ތިބި މުވައްޒަފުން ވަނީ އެ ތަންތަނުން ނެރެފަ އެވެ.
އެ ސަރަހައްދުގައި ސަރުކާރުގެ އިސްވެރިންވެސް ދަނީ ހަރަކާތްތެރިވަމުންނެވެ.
އެ ސަރަހައްދުގައި ހަރަކާތްތެރި ވަމުންދާ "އަދަދު" ގެ ނޫސްވެރިޔަކު ބުނީ ބޮޑަށް ހުޅުގަނޑު ހިފާފައި ހުރީ ހައުސިން އާއި އިންފްރާސްޓްރަކްޗާ ހިންގާ ތަނުގައި ޓިނުން ހަދާފައި ހުރި އިމާރާތުގައި ކަމަށެވެ. އެ އިމާރާތް މިހާރު ބިމާހަމަވާން ކައިރިވެފައިވާ ކަމަށް ވެސް އޭނާ ބުންޏެވެ.
