ހައުސިން މިނިސްޓްރީ އާއި ޕްލޭނިން އަދި އެންވަޔަރަމަންޓް މިނިސްޓްރީ ހިންގި އިމާރާތުގައި ރޯވި ބޮޑު އަލިފާނުގެ ހާދިސާގެ ތަހުގީގު ނިމިފައިވާ ކަމަށް ހޯމް މިނިސްޓަރު އަލީ އިހުސާން ވިދާޅުވި ނަމަވެސް، އެކަމުގެ ތަފްސީލުތައް ހާމަކުރުމަށް ދިން މުހުލަތު ފާއިތުވެގެން ދިޔައިރުވެސް އެއްވެސް މައުލޫމާތެއް ހާމައެއް ނުކުރިއެވެ.
އެޕްރީލް 23 ވަނަ ދުވަހު ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި މިނިސްޓަރު އިހުސާން ވިދާޅުވީ، ޑިސެމްބަރު 12، 2024 ގައި ހިނގި އަލިފާނުގެ ހާދިސާގެ ތަހުގީގު ނިމިފައިވާ ކަމަށެވެ. އަދި ޖެހިގެން އައި ހަފްތާ ނިމުމުގެ ކުރިން ފުލުހުން މެދުވެރިކޮށް މައުލޫމާތުތައް އާންމުކުރާނެ ކަމަށް ވިދާޅުވިއެވެ.
"ތި މައްސަލައިގެ ތަހުގީގު ވަނީ އަޅުގަނޑަށް މައުލޫމާތު ލިބިފައި އިން ގޮތުގައި ނިމިފައި. އަޅުގަނޑު ބަލާނަން މި ފެށޭ ހަފުތާގައި ނޫސްވެރިންނާ ހިސާބަށް ޕޮލިސްގެ ބްރީފިންއެއް ބާއްވާލެވޭތޯ މި މައްސަލައިގެ އަޕްޑޭޓެއް އަރުވަން އެނގޭތޯ،" ނޫސްވެރިންގެ ބައްދަލުވުމުގައި އިހުސާން ވިދާޅުވި އެވެ.
އެ ވިދާޅުވި މުހުލަތު ވަނީ ފާއިތުވެފަ އެވެ.
ތިން މިނިސްޓްރީ އަނދައިގެން ދިޔަ ހާދިސާގެ ތަހުގީގަށް އާންމުންގެ އެހީތެރިކަން ހޯދަން ޑިސެމްބަރު 17، 2024 ގައި ފުލުހުން އިއުލާނު ކުރި އެވެ. އޭގެފަހުން، އަލިފާނުގެ ހާދިސާގެ ތަހުގީގަށް އިންޑިއާގެ ތަޖުރިބާކާރުންގެ ޓީމަކުން ފަންނީ އެހީތެރިކަން ދެމުންދާ ކަމަށް ޑިސެމްބަރު 20، 2024 ގައި ފުލުހުން ބުނެފައިވެ އެވެ.
ފުލުހުންގެ ތަހުގީގަށް އެހީތެރިކަން ފޯރުކޮށްދޭން އައި އިންޑިއާގެ ޓީމު ރާއްޖޭގައި ދެ ދުވަހު ހަރަކާތްތެރިވުމަށްފަހު ފުރައިގެން ދިޔައީ ޑިސެމްބަރު 22، 2024 ގަ އެވެ. އެކަން ފުލުހުން ހާމަކުރީ މިދިޔަ އަހަރުގެ ޑިސެމްބަރު 27، ގަ އެވެ. ނަމަވެސް އެހާ އަވަހަށް އެ ޓީމު ފުރައިގެންދިޔައީ ކީއްވެގެން ކަމެއް ފުލުހުން އެ ދުވަހު ހާމައެއް ނުކުރެ އެވެ.
އަލިފާނުގެ ހާދިސާއާ ގުޅިގެން ނޫސްވެރިންނަށް މައުލޫމާތު ދިނުމަށް މިދިޔަ ޖޫން 24، ގައި ނޫސްވެރިންގެ ބައްދަލުވުމެއް ބާއްވަން ފުލުހުން މަސައްކަތްކުރި އެވެ. އެކަމަކު އެ ނޫސްވެރިންގެ ބައްދަލުވުން އެންމެ ފަހުވަގުތު ވަނީ ސަބަބު ވެސް ހާމަނުކޮށް ކެންސަލްކޮށްފަ އެވެ.
އަލިފާނުގެ ހާދިސާއާ ގުޅިގެން ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ އަދި އެންވަޔަރަމަންޓް މިނިސްޓްރީގެ އިމާރާތް އެއްކޮށް އަނދައި ހުލިވެ، އެ އިމާރާތްތަކުގައި ހުރި މުހިންމު ބައެއް ލިޔުންތަކާއި ބައެއް ސާވާތައް ސަލާމަތް ކުރެވިފައެއް ނުވެ އެވެ.
އެނދި މިނިސްޓްރީތަކުގެ ހިދުމަތް ވަގުތީ ގޮތުން ދަރުބާރުގެއަށް ބަދަލު ކޮށްފައިވާއިރު، ހައުސިން މިނިސްޓްރީ އާއި ކޮންސްޓްރަކްޝަން މިނިސްޓްރީ މިހާރު ވަނީ އެއްކޮށްލައިފަ އެވެ.
