ދުންފަތް ކޮންޓްރޯލް ކުރުމުގައި އެންމެ މުހިންމީ އަވަހަށް ޓައިމްލައިންތައް ކަނޑައަޅައި އެކަން ކަން ތަންފީޒު ކުރުން ކަމަށް ހެލްތު މިނިސްޓަރު އަބްދުﷲ ނާޒިމް މިއަދު ވިދާޅުވެއްޖެ އެވެ.
ހެލްތު މިނިސްޓްރީން ބޭއްވި ނޫސްވެރިންގެ ބައްދަލުވުމެއްގައި ނާޒިމް ވިދާޅުވީ ގިނަ ގައުމުތަކުން މަސައްކަތް ކުރަމުން ދަނީ ދިގު މުއްދަތެއްގައި ކަންކަން ކޮށްގެން ދުންފަތް ކޮންޓްރޯލް ކުރުމަށް ކަމަށެވެ.
ނަމަވެސް އެ ޕޮލިސީއަކީ ފެއިލްވެފައިވާ ޕޮލިސީއެއްކަން ފާހަގަކުރައްވާ ނާޒިމް ވިދާޅުވީ ދުންފަތް ކޮންޓްރޯލް ކުރުން ކާމިޔާބުވެފައި ހުރި ގައުމުތަކުގައި އެކަން ކުރެވިފައި ވަނީ އަވަސް ފިޔަވަޅުތަކާ އެކު ކަމަށެވެ.
އެގޮތުން އެ ތަޖުރިބާއަށް ބެލުމަށްފަހު މި ސަރުކާރުން ގެންގުޅޭ ޕޮލިސީއަކީ ވެސް އަވަސް ފިޔަވަޅުތައް އަޅައިގެން ދުންފަތް ކޮންޓްރޯލް ކުރުން ކަމަށް ނާޒިމް ވިދާޅުވި އެވެ.
"މިފަދަ ކަންކަމަކީ އަބަދުވެސް އަވަހަށް ޓައިމްލައިނެއް ކަނޑައަޅާ އެ ޓައިމަކަށް ތަންފީޒު ކުރަމުން ގެންދިޔުން އެންމެ މުހިންމު ގޮތަކީ. މާ ދިގު މުއްދަތެއް ތެރޭގައި ގިނަ ކަންތައްތަކެއް ކޮށްގެން މިކަން ނިންމޭނެ ކަމަށް،" ނާޒިމް ވިދާޅުވި އެވެ.
"އެއީ ދުނިޔޭގެ ގިނަ ގައުމުތަކުން ފެއިލް ވެފައި ޕޮލިސީއެއް. މިކަން ކާމިޔާބު ކުރެވިފައި ހުރި ގައުމުތަކުގައި މިކަން ކާމިޔާބު ކޮށްފައި ހުރީ ވަރަށް އަވަހަށް ފިޔަވަޅުތަކެއް އަޅައިގެން. އެހެންމަ އެ ތަރުޖިބާއަށް ބަލައި އަޅުގަނޑުމެން ކުރިއަށް މަސައްކަތް މި ގެންދަނީ."
ނާޒިމް ވިދާޅުވީ މިދިޔަ ދުވަސްތަކުގައި ދިވެހި ރައްޔިތުން ތިބީ ދުންފަތުގެ މައްސަލަ ހައްލު ކުރުމަށް ފިޔަވަޅުތައް އަޅާނެ ދުވަހަކާ މެދު އިންތިޒާރު ކުރަމުން ކަމަށެވެ. ނަމަވެސް އެކަމަށް މިއަދު ނިމެއް އައިސްފައިވާކަން އޭނާ ފާހަގަ ކުރެއްވި އެވެ.
ދުންފަތަށް ދެވި ހިފާފައިވާ މީހުން އެކަމުން ސަލާމަތް ކުރުމަށް ސެސޭޝަންގެ ފަރުވާ ނިކޮޓިން ރިޕްލޭސްމެންޓް ތެރަޕީ (އެންއާރްޓީ) ރާއްޖޭގެ އެކި ކަންކޮޅުގައި ހަމަޖެއްސުމަށް މަސައްކަތްކޮށް، އެ ހިދުމަތް އާސަންދައިގެ ދަށުން ލިބޭ ގޮތަށް ވަނީ ހަމަޖައްސާފަ އެވެ.
ސެސޭޝަންގެ ހިދުމަތް ފަސޭހަކަމާ އެކު 24 ގަޑިއިރު ލިބޭނެ ގޮތް ހަމަޖެއްސުމަށް ކުއިކްލައިން "1676" ވަނީ ހަމަޖައްސާފަ އެވެ. އަދި އެ ކުއިކްލައިނުން އަންނަ އާދީއްތަ ދުވަހުން ފެށިގެން ހިދުމަތް ދޭނެ އެވެ.
ދުންފަތް ކޮންޓްރޯލް ކުރުމަށް ހެލްތު މިނިސްޓްރީން ވަނީ "ދަފަރާ" ގެ ނަމުގައި ރަށު ފެންވަރުގައި ކެމްޕެއިނެއް ކުރިއަށް ގެންދަމުންނެވެ. އެ ކެމްޕެއިނުގެ ދަށުން އާންމުން ހޭލުންތެރިކޮށް، ސެޒޭޝަންގެ ފަރުވާ ދިނުމަށް މީހުން ތަމްރީން ކުރުން ހިމެނެ އެވެ.
މީގެއިތުރުން ކެމްޕެއިނުގެ ދަށުން މިހާތަނަށް ހޭލުންތެރި ކުރުވުމަށް 324 ޓީޗަރުންނާއި ބެލެނިވެރިންނަށް ދުންފަަތުގެ އިސްތިއުމާލު ކުރުމާ ގުޅޭ މައުލޫމާތު ވަނީ ފޯރުކޮށްދީފަ އެވެ. އަދި މިހާތަނަށް ސެޒޭޝަންގެ ފަރުވާ ދިނުމަށް 240 ސިއްހީ ހިދުމަތްތެރިން ރާއްޖޭގެ އެކި ސަރަހައްދުން ވަނީ ތަމްރީނު ކޮށްފަ އެވެ.
