މާލެ ސިޓީ ކައުންސިލުން ހުޅުމާލޭގައި ތަރައްގީ ކޮށްފައިވާ އޮޅު ހިޔާއަށް މާލޭގައި އުޅޭ ބުޅާތައް ގެންދެވޭނީ ކައުންސިލާ ހިއްސާކޮށްފައި އޮތް އެސްއޯޕީގައި ބަޔާން ކޮށްފައިވާ އިންތިޒާމުތައް އެތަނުގައި ހަމަޖެހުމުން ކަމަށް މިނިސްޓްރީ އޮފް އެގްރިކަލްޗާ އެންޑް އެނިމަލް ވެލްފެއާ އިން ބުނެފި އެވެ.
ކައުންސިލުން އޮޅު ހިޔާއަށް ބުޅާތައް ގެންދަން މަސައްކަތް ކުރުމުން އެކަން މިނިސްޓްރީން ހުއްޓުވާފައި އަދި އެތަން އަތުލުމަށް ކެބިނެޓުން ނިންމުމަށް ފަހު، މިނިސްޓްރީން ނެރުނު ނޫސް ބަޔާނެއްގައި ބުނީ އެސްއޯޕީތަކަށް ރިއާއަތް ނުކޮށް އޮޅު ހިޔާއަށް ބުޅާތައް ގެންދަން ފަށައިފިނަމަ ބުޅާތަކުގެ ސިއްހަތަށާއި ދުޅަހެޔޮ ކަމަށް ނޭދެވޭ އަސަރުތައް ކުރުން އެކަށީގެންވާ ކަމަށެވެ.
"ކައުންސިލުން މިހާރު ރާވާފައި އޮތް ގޮތަށް މަގުމަތީގައި ވީއްލިގެން އުޅޭ ބުޅާތައް އޮޅު ހިޔާއަށް މިވަގުތު ގެންދިއުމަކީ ފެންނަ ކަމެއް ނޫން. އެސްއޯޕީގައި ބަޔާން ކޮށްފައިވާ އިންތިޒާމުތައް ހަމަ ނުޖައްސައި އޮޅު ހިޔާއަށް ބުޅާތައް ގެންދިޔުމުން ބުޅާތަކަށް އަޅާލުމަށް ބޭނުންވާ މިންގަނޑުތައް ކަށަވަރު ނުވުމުގެ ނުރައްކާ އެބަ އޮތް،" މިނިސްތްރީން ބުންޏެވެ.
މިނިސްޓްރީން ބުނީ އޮޅު ހިޔާއަށް ބުޅާތައް ގެންދިއުމުގައި އަމަލު ކުރާނެ ގޮތުގެ އެސްއޯޕީތަކާއި، ޕްލޭންތަކާއި، ލަފާތައް ކައުންސިލާ ހިއްސާ ކުރި ނަމަވެސް، މިހާތަނަށް އެއްވެސް ހިޔާލެއް ލިބިފައި ނުވާ ކަމަށެވެ.
އޮޅު ހިޔާގައި ބުޅާތަކަށް ލިބެން ޖެހޭ ގިނަ ހިދުމަތްތަކެއް އަދި ބޭނުންވާ ވަރަށް މުވައްޒަފުންނެއް ވެސް މިނިސްޓްރީން ފާހަގަ ކުރެ އެވެ.
އޮޅު ހިޔާއިން ހިދުމަތް ދޭން ފެށުމުގެ ކުރިން ގިނަ މައްސަލަތަކެއް ހައްލު ކުރަން ޖެހޭކަން ފާހަގަކޮށް މިނިސްޓްރީން ބުނީ ކައުންސިލުން ހޯދަން ބޭނުންވާ އެއްވެސް މައުލޫމާތެއް މިހާތަނަށް ނުލިބޭ ކަމަށެވެ.
