މާލެ-ހުޅުމާލެ ހައިވޭގައި ބާރު ސްޕީޑުގައި ދުއްވާފައި ގޮސް، ގަވާއިދާ ހިލާފަށް އޯވާޓެކް ކުރަނިކޮށް އެކްސިޑެންޓުވުމުން މަޑުނުކޮށް ފިލައިގެން ދިޔަ މީހަކު ހައްޔަރުކޮށްފި އެވެ.
ފުލުހުން ބުނީ އިއްޔެ މެންދުރު 14:43 ހާއިރު ހިނގި އެ ހާދިސާ ފުލުހުންނަށް ރިޕޯޓުކުރުމުން މައްސަލަ ތަހުގީގުކޮށް ތުހުމަތު ކުރެވޭ ބ. އޭދަފުށި، ފަސްމީރު، ޝުނާން މުހައްމަދު ޝާކިރު، 22 ހައްޔަރުކޮށްފައިވާ ކަމަށެވެ.
އޭނާގެ ބަންދާމެދު ގޮތެއް ނިންމުމަށް މިއަދު ކްރިމިނަލް ކޯޓަށް ހާޒިރު ކުރުމުން ފަސް ދުވަހަށް ބަންދު ކުރުމަށް އަމުރު ދިނެވެ.
އެ އެކްސިޑެންޓުގައި ޝުނާން ދުއްވި ސައިކަލު ގޮސް ޖެހުނު ސައިކަލުގައި ދެ މީހުންނަށް އަނިޔާވި ކަމަށާއި އޭގެ ތެރެއިން ހުރި ފިރިހެން މީހާއަށް ހުޅުމާލޭ ހޮސްޕިޓަލުން ފަރުވާ ދިނުމަށް ފަހު ދޫކޮށްލި ނަމަވެސް އަންހެން މީހާއަށް އަދިވެސް ދަނީ ފަރުވާ ދެމުން ކަމަށް ފުލުން ބުންޏެވެ.
