އަންނަ ޖެނުއަރީ މަހު އާ ސީޒަން ފެށުމަށް ތާވަލުކުރުމާ އެކު މާޒިޔާ ސްޕޯޓްސް އެންޑް ރެކްރިއޭޝަނުން ފަރިތަކުރަން ފަށައިފި އެވެ.
ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން ފުރަތަމަ ޑިވިޝަން އެންމެ ފުރަތަމަ ފެށުމަށް ޑްރާފްޓް ކޮށްފައިވަނީ މިދިޔަ މެއި މަހު އެވެ. އެކަމަކު އެ އިދާރާ އަށް ދިމާވެފައިވާ މާލީ ގޮންޖެހުމުގެ ސަބަބުންނާއި, އެ އިދާރާ އިންޓަރިމަކަށް ދިޔުމާއެކު ފުޓުބޯޅަ ސީޒަން ލަސް ކުރަން ޖެހުނެވެ.
އެފްއޭއެމް އިން ކްލަބްތަކަށް ފޮނުވާފައިވާ ޑްރާފްޓް ކަލަންޑަރުގައިވާ ގޮތުން، ޖެނުއަރީ 24 ވަނަ ދުވަހު ކުޅޭނީ ސީޒަން ހުޅުވުމަށް ކުޅޭ ޗެރިޓީ ޝީލްޑް މެޗެވެ. އަދި ސީޒަނުގެ ފުރަތަމަ މުބާރާތް ޕްރެޒިޑެންޓްސް ކަޕް ފަށާނީ ޖެނުއަރީ 29 ގަ އެވެ. އަދި ދިވެހި ޕްރިމިއާ ލީގު ފަށަން ޝެޑިއުލްކޮށްފައިވަނީ، ފެބްރުއަރީ 25 ވަނަ ދުވަހު އެެެވެ.
މާޒިޔާއިން އިއްޔެ އާ ސީޒަނަށް ތައްޔާރުވުމަށް ފަރިތަކުރުންތައް ފަށާފައިވަނީ ކޯޗު ޑްރަގަން ޑުކަނޯވިޗްގެ އިރުޝާދުގެ ދަށުންނެވެ. އެންމެ ފަހުގެ ދިވެހި ލީގުގެ ޗެމްޕިއަން އަންނަ ސީޒަނަށް ފަރިތަކުރުންތައް ފަށާފައިވާއިރު, ބިދޭސީ ކުޅުންތެރިން އިއްޔެ ކުރިއަށްދިޔަ ފަރިތަކުރުންތަކުގައި ބައިވެރިނުވެ އެވެ.
