މިދިޔަ ސަރުކާރުގެ ދުވަސްވަރު ފެނަކައާ ހަވާލުކޮށްގެން ރާއްޖޭގެ 20 ރަށުގައި ހިންގަމުންދަނިކޮށް މި ސަރުކާރުން ބާތިލު ކުރި މަޝްރޫއުތަކުގެ ތެރެއިން 19 ރަށެއްގެ މަސައްކަތް އެމްޑަބްލިއެއެސްސީއާ ހަވާލުކޮށްފައިވާ ކަމަށް ކޮންސްޓްރަކްޝްނަ މިނިސްޓަރު، އަބްދުﷲ މުއްތަލިބު ވިދާޅުވެއްޖެ އެވެ.
މަޖިލީހުގެ ކެންދޫ ދާއިރާގެ މެންބަރު، މައުރޫފް ޒާކިރު ކުރެއްވި ސުވާލަކަށް ޖަވާބު ދެއްވަމުން މުއްތަލިބު ވިދާޅުވީ މި ސަރުކާރުން ބާތިލު ކުރި 20 ރަށުގެ ތެރެއިން 19 ރަށުގެ މަޝްރޫއުތައް މާބޮޑު ރަސްމިއްޔާތުތަކެއް ނުބޭއްވި ނަމަވެސް އެމްޑަބްލިއެއެސްސީއާ މިހާރު ހަވާލު ކޮށްފައިވާ ކަމަށެވެ.
"އޭރުގައި އަޅުގަނޑުމެން ޓާމިނޭޓު ކުރި ރަށްތަކުގެ ތެރެއިން 19 ރަށެއް އަޅުގަނޑުމެން ސޮއިކޮށްފިން އެމްޑަބްލިއުއެސްސީއާ އެއްކޮށް، އެހެންވީމާ މަސައްކަތް މޮބިލިއައިޒް ކުރުމަށްޓަކައި ވާންޖެހޭ ތައްޔާރީތައް އެމްޑަބްލިއުއެސްސީ މިހާރު ދަނީ ކުރަމުން،" މުއްތަލިބި ވިދާޅުވި އެވެ.
އެއީ ސީދާ ކޮން ރަށްތަކެއްކަމެއް މުއްތަލިބު ވިދާޅެއް ނުވެ އެވެ.
ފެނަކައާ ހަވާލުކޮށްގެން ކުރިއަށް ގެންދިޔަ މަޝްރޫއުތައް ބާތިލު ކުރަން ނިންމާފައިވާކަން މުއްތަލިބި ހާމަކުރެއްވީ މިދިޔަ އޯގަސްޓު މަހު އެވެ. އޭރު މުއްތަލިބު ވިދާޅުވީ އެ މަޝްރޫއުތައް ފެނަކައިން އަތުލަނީ އެ ކުންފުންޏަކީ އެފަދަ ކޮންޓްރެކްޓު މަސައްކަތް ހިންގާ ކޮންޓްރެކްޓަރަކަށް ނުވާތީ ކަމަށެވެ.
"ފެނަކައަކީ މިކަހަލަ ކޮންޓްރެކްޓު މަސައްކަތް ހިންގާނެ ކޮންޓްރެކްޓަރަކަށް ނުވާތީ އާއި ހިދުމަތް ފޯރުކޮށްދޭ ސާވިސް ޕްރޮވައިޑާއަކަށް ވާތީ ސަރުކާރުން ނިންމީ އެ ޕްރޮޖެކްޓު މަސައްކަތް، އެގޮތަށް ހަވާލުކޮށްފައި، ފެނަކައާ ހަވާލުކޮށްފައި ހުރި ހުރިހާ މަޝްރޫއުތަކެއް، ކޮންޓްރެކްޓު ބާތިލުކުރުމަށް ފަހުގައި އެމްޑަބްލިއުއެސްސީއާ ވާހަކަދައްކައިގެން ޑައިރެކްޓު ނެގޯޝިއޭޝަނެއްގެ ތެރެއިން އެމްޑައިބްލިއުއެސްސީއާ ހަވާލު ކޮށްގެން ކުރިއަށް ގެންދިޔުން،" މުއްތަލިބު އޭރު ވިދާޅުވެފައިވެ އެވެ.
