އެއާޕޯޓުން ނަގާ ޓެކުހާއި ޑިވެލޮޕްމެންޓު ފީތައް ބޮޑު ކުރުމުން މޯލްޑިވްސް އެސޯސިއޭޝަން އޮފް ޓްރެވެލް އޭޖެންޓްސް އެންޑް ޓުއާ އޮޕަރޭޓާސް (މަޓާޓޯ) އިން ކަންބޮޑުވުން ފާޅުކޮށް، މަޝްވަރާގެ މޭޒަށް އައުމަށް ޓްރާންސްޕޯޓު މިނިސްޓަރީއަށް ގޮވާލައިފި އެވެ.
ޓްރާންސްޕޯޓު މިނިސްޓަރު، މުހައްމަދު އަމީންއަށް މަޓާޓޯއިން މިއަދު ފޮނުވި ސިޓީއެއްގައި ބުނީ ޓެކުހާއި ފީތައް ބޮޑު ކުރަން ނިންމުމާ ގުޅިގެން ރާއްޖެއަށް ދަތުރު ކުރާ ދެ އެއާލައިނަކުން ކަންބޮޑުވުން ފާޅުކޮށްފައިވާ ކަމަށެވެ.
"ބަޖެޓު އެއާލައިންތަކަކީ ފަތުރުވެރިކަމުގެ ސިނާއަތުގައި މުހިންމު ދައުރެއް އަދާ ކުރާ ބައެއް، ހާއްސަކޮށް މެދު އަދި ދަށް ފަންތީގެ ރިސޯޓުތަކާއި ގެސްޓުހައުސްތަކަށް، ތަފާސްހިސާބުތަކުން ދައްކާ ގޮތުގައި އެ ކެރިއާތަކުގައި ގެންނަ 40 ޕަސެންޓު ފަސިންޖަރުންނަކީ ގެސްޓުހައުސްތަކަށް އަންނަ ފަތުރުވެރިން,”މަޓާޓޯގެ ބަޔާނުގައި ބުނެފައިވެ އެވެ.
އަނެއް 60 ޕަސެންޓު ފަސިންޖަރުންނަކީ މެދު އަދި ދަށް ފަންތީގެ ރިސޯޓުތަކަށް އަންނަ ފަތުރުވެރިން، މިއީ ރާއްޖޭގެ ފަތުރުވެރިކަން ސިންދަފާތު ކުރުމަށް މުހިންމު ކަމެއް،"
އެއާޕޯޓު ޓެކްސްތަކާއި ފީތައް ދެގުނަ ކުރުމުގެ ސަބަބުން ރާއްޖެއަށް ފަތުރުވެރިން އުފުލާ އެއާލައިންތަކުގެ ދަތުރުތައް ހުއްޓައިލަންޖެހޭ ފަދަ ހާލަތެއް އުފަންވެފައިވާ ކަމަށް ވެސް މަޓާޓޯއިން ބުންޏެވެ. އަދި އެފަދަ ނިންމުމެއް އެއާލައިނަކުން ނިންމައިފި ނަމަ ގެސްޓުހައުސްތަކާއި މެދު ފަންތީގެ ރިސޯޓު ވިޔަފާރިތަކަށް ގެއްލުންވެ ފަތުރުވެރިކަމުގެ ސިނާއަތަށް އޭގެ އަސަރު ކުރާނެ ކަމަށް މަޓާޓޯއިން ބުންޏެވެ.
ޓީޖީއެސްޓީ، ގްރީން ޓެކްސް، އަދި އެއާޕޯޓު ފީތައް ބޮޑުކުރަން މަޖިލީހުން ފާސްކުރީ އޮކްޓޫބަރު 31، ގަ އެވެ. އެ ބިލުތައް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ތަސްދީގު ކުރެއްވީ މިމަހުގެ 5 ވަނަ ދުވަހު އެވެ.
މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނަށް ގެނައި އިސްލާހާ އެކު ވަނީ ވަނީ ޖޫން، 2025، އިން ފެށިގެން ޓީޖީއެސްޓީ 16 ޕަސެންޓުން 17 ޕަސެންޓަށް ބޮޑު ކުރުމަށް ނިންމާފަ އެވެ. އަންނަ އަހަރު ޓީޖީއެސްޓީގެ ގޮތުގައި 9.9 ބިލިއަން ޑޮލަރު ލިބޭނެ ކަމަށް އަންދާޒާކޮށްފައިވާއިރު، ޑޮލަރުން ބަލާކަމުގައި ވަނީ ނަމަ އެއީ 642 މިލިއަން ޑޮލަރެވެ.
ޓޫރިޒަމް ގާނޫނުގެ އިސްލާހާއެކު ޖެނުއަރީ، 2025، އިން ފެށިގެން ގްރީން ޓެކްސް ހަ ޑޮލަރުން 12 ޑޮލަރަށް ބޮޑުވާނެ އެވެ. އަދި, 50 ކޮޓަރިއަށް ވުރެ މަދު ތަންތަނުން ދައްކަން ޖެހޭ ވަރު ތިން ޑޮލަރުން ހަ ޑޮލަރަށް ވަނީ ބޮޑުކޮށްފަ އެވެ.
އެއާޕޯޓު ޓެކްސް އަދި ފީ ބޮޑުކުރާނީ ޑިސެމްބަރު 1 އިން ފެށިގެންނެވެ. އިކޮނޮމީ ކްލާހުން ދަތުރު ކުރާ ދިވެހިންގެ އަތުން ނަގާ ފީ އާއި ޓެކްސް ނޫން އެހެން ހުރިހާ ފީއެއް އަދި ޓެކުހެއް އެ ދުވަހުން ފެށިގެން ބޮޑުވާނެ އެވެ.
މަޓާޓޯގެ ބަޔާނުގައި ވަނީ ބޮޑު ކުރަން ނިންމާފައިވާ ޓެކްސްތަކުގެ ސަބަބުން ފަތުރުވެރިކަމަށް ކުރާނެ އަސަރު ދެނެގަތުމަށް މަޝްވަރާގެ މޭޒަށް އައުމަށް ޓްރާންސްޕޯޓު މިނިސްޓަރީއަށް ގޮވާލައިފަ އެވެ.
"އުމްރާނީ ތަރައްގީ އާއި އާމްދަނީ އިތުރު ކުރުމުގެ މުހިންމުކަން ގަބޫލު ކުރާ ހާލު، ފަތުރުވެރިކަމަށް ދުރު ރާސްތާގައި ކޮށްފާނެ އަސަރަށް ވިސްނުމަކީ ވެސް ހަމަ އެހާމެ މުހިންމު ކަމެއް ކަމުގައި ދެކެން” މަޓާޓޯގެ ބަޔާނުގައި ބުނެފައިވެ އެވެ.
