ދެކުނު ރަށެއްގެ ދެ ކުއްޖަކަށް ޖިންސީ ގޯނާ ކުރި މައްސަލައެއްގައި މީހަކު ހައްޔަރުކޮށްފި އެވެ.
ފުލުހުން މިއަދު ބުނީ ސައުތު ޕޮލިސް ޒޯން (ގއ، ގދ، ޏ، އަދި އައްޑޫ) ގައި ހިމެނޭ ރަށެއްގައި ފެންމަތިވި މި މައްސަލާގައި ހައްޔަރުކުރީ 56 އަހަރުގެ ދިވެހި ފިރިހެނަކު ކަމަށެވެ. އޭނާ ހައްޔަރުކުރީ ކޯޓު އަމުރެއްގެ ދަށުންނެވެ.
އިތުބާރު ކުރެވޭ މަގާމެއްގައި ހުރެ، އޭނާ ޖިންސީ ގޯނާ ކުރީ 11 އަހަރު އަދި 7 އަހަރުގެ ދެ އަންހެން ކުދިންނަށެވެ.
ފުލުހުން ބުނީ މި މައްސަލަ ރިޕޯޓުކޮށްފައިވަނީ މި މަހު ހަތަރެއްގައި ކަމަށެވެ. ކުޑަކުދިންނާ ގުޅޭ ސީރިއަސް މައްސަލަތަކުގައި އަމަލުކުރާ އުސޫލުގެ ދަށުން މި މައްސަލާގައިވެސް އެ ކުދިންގެ އަދި ހައްޔަރުކުރި ފަރާތުގެ ތަފުސީލެއް ހާމައެއް ނުކުރެ އެވެ.
ކުޑަކުދިންނަށް ޖިންސީ ގޯނާ ކުރާ އެތައް މައްސަލައެއް ރާއްޖޭގައި ކޮންމެ އަހަރަކުވެސް ފެންމަތިވެ އެވެ. އޭގެ ތެރެއިން ގިނަ ބަޔަކު ހައްޔަރުވެ އަދަބު ލިބޭއިރު މަދުން ނަމަވެސް އެފަދަ މީހުންނަށް އަދަބު ނުލިބި ދޫވެފައިވެ އެވެ.
މީގެ ތެރޭގައި އަމިއްލަ ދަރިންނާއި އާއިލީ ގޮތުން ގުޅުން އޮންނަ ކުދިންނަށް ޖިންސީ ގޯނާ ކުރާ މީހުންވެސް ހިމެނެ އެވެ.
