ދައުލަތަށް ލިބެން ޖެހޭ ފައިސާގެ ތެރެއިން ނުހޯދާ ހުރި ފައިސާގެ 3.7 ބިލިއަން ރުފިޔާ ހޯދައި، ސަރުކާރުން ކޮށްފައިވާ މަސައްކަތްތަކަށް ދޭން ޖެހޭ ފައިސާގެ ތެރެއިން ފަސް މިލިއަން ރުފިޔާއިން ދަށުގެ ހުރިހާ ބިލަކަށް ފައިސާ ދައްކާ ހަލާސްކޮށްފައިވާ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެ އެވެ.
ޖުމްހޫރި ދުވަހުގެ ޖަލްސާގައި ވާހަކަ ދައްކަވަމުން، ރައީސް ވިދާޅުވީ ނުހޯދި ހުރި ފައިސާތައް ހޯދީ، އެ ފައިސާ ހޯދަން ކުރެވުނު މަސައްކަތުގެ ދަށުން ގާނޫނުތަކާއި ގަވާއިދުތައް ވަރުގަދަކޮށް، ތަންފީޒީ އިދާރާތައް ވަރުގަދަކޮށްގެން ކަމަށެވެ. މި ފައިސާތައް ހޯދުމާއެކީ ދަރަނީގެ ގޮތުގައި ނަގަން ޖެހޭ ފައިސާގެ އަދަދު މަދުވެފައިވާ ކަމަށް ވެސް އެމަނިކުފާނު ވިދާޅުވި އެވެ.
"...ސަރުކާރަށް އެކި ފަރާތްތަކުން ދައްކަން ޖެހިފައި، ކުރީ ދުވަސްތަކުގައި ނުހޯދާ، ކުރީ ޒަމާންތަކުގައި، އަހަރުތަކުގައި، ނުހޯދާ ފަސޭހަކޮށްލާފައި ހުރި ފައިސާ. 3.7 ބިލިއަން ރުފިޔާ، ރައްޔިތުންގެ ފައިސާ ހޯދާ ވައްދައިފިން ދައުލަތުގެ، ރައްޔިތުންގެ އެކައުންޓަށް. އޭގެ ސަބަބުން އަޅުގަނޑުމެން ނަގަން ޖެހޭ ދަރަނި ވެސް ވަނީ މަދުވެފައި،" ރައީސް ވިދާޅުވި އެވެ.
ސަރުކާރުން ނުދައްކާ ހުރި ބިލުތައް ދެއްކުމާ ގުޅޭ ގޮތުން ދެއްކެވި ވާހަކައިގައި ރައީސް ވިދާޅުވި ސަރުކާރުން އެކިއެކި މަސައްކަތްތައް ކުރުވާފައި އެތައް މިލިއަން ރުފިޔާއެއް ނުދީ އެބަ ހުރި ކަމަށެވެ.
ނަމަވެސް މިދިޔަ ހަފުތާގެ ތެރޭގައި، ދެ ހަފުތާއަށް ވުރެ ގިނަ ދުވަސްވެފައި ހުރި ފަސް މިލިއަން ރުފިޔާއިން ދަށުގެ ހުރިހާ ބިލުތަކަށްވާ 501 މިލިއަން ރުފިޔާ ދަައްކާ ނިންމާފައިވާ ކަމަށް އެމަނިކުފާނު ވިދާޅުވި އެވެ. އަދި ވެރިކަމާ ހަވާލުވެގެން މިވީ ދުވަސްތަކުގެ ތެރޭގައި ނުދައްކާ ހުރި ބިލުތަކަށް 6.6 ބިލިއަން ރުފިޔާ ދައްކާފައިވާ ކަމަށް ވެސް ރައީސް ވިދާޅުވި އެވެ.
"މިއީ އެސްއޯއީތަކަކަށް ނޫނޭ. އާންމު ކުދިކުދި ވިޔަފާރިތައް، ކުދި މެދު ފަންތީގެ ވިޔަފާރިތައް ލައްވާ ސަރުކާރުން ކުރުވާފައި ހުރި މަސައްކަތްތަކަށް ދިން ފައިސާ، މިދިޔަ ހަފުތާގައި އެކަނި 501 މިލިއަން ރުފިޔާ ދޫކޮށްފިން. މިހާރު އެ ކުންފުނިތަކަށް އިންޑިވިޖުއަލް ފަރާތްތަކަށް އެކަން ވާނީ އެނގިވަޑައިގަންނަވާނެ އެއިން ކޮންމެ ބޭފުޅަކަށް،" އެމަނިކުފާނު ވިދާޅުވި އެވެ.
"އެހެން ވީމަ ރައްޔިތުން މުއްސަނދި ކުރަމުން، ރައްޔިތުންނަށް ދޭން ޖެހޭ ފައިސާ ދެމުން، ރައްޔިތުންގެ ފައިސާ މީހުންގެ އަތުގަ ފައިސާ ރައްޔިތުންގެ ފައިސާ ހޯދަމުން، އަދުލުވެރި ނިޒާމެއް ގާއިމުކުރަމުން އަޅުގަނޑުމެން ކުރިއަށް މި ގެންދަނީ،"
ދައުލަތަށް ލިބެން ޖެހި ނުލިބިވާ ފައިސާއާ ގުޅޭ ގޮތުން މިނިވަން ދުވަހުގެ ޖަލްސާގައި ވާހަކަ ދައްކަވަމުން ރައީސް ވިދާޅުވީ 13 ބިލިއަން ރުފިޔާ ނުހޯދައިވާ ކަމަށެވެ. އެ ދުވަހު ރައީސްގެ ވާހަކައިގައި، މި ފައިސާތައް ހޯދަން ހާއްސަ މަސައްކަތްތަކެއް ކުރައްވާނެ ކަމަށް ހާމަކުރައްވަމުން، ވިދާޅުވީ މިއީ މި ގައުމަށް ދިމާވެފައިވާ ދަރަނީގެ މައްސަލަ ހައްލުކުރަން ވެސް ކޮންމެހެން ކުރަން ޖެހޭ މަސައްކަތެއް ކަމަށެވެ.
