ރާއްޖޭގައި ފްލޯޓިން ބަންކަރިންގެ ހިދުމަތް ދޭން އުތުރުގައި ބާއްވާފައި އޮތް ދެ ބޯޓު މާލޭ ސަރަހައްދަށް އައިސް ބަނދަރުކޮށްފި އެވެ.
ކަނޑު އުޅަނދު ޓްރެކްކުރާ ވެސެލްފައިންޑާ އަދި މެރިން ޓްރެފިކް ފަދަ ސައިޓުތަކުން ދައްކާ ގޮތުގައި، 3258 ޓަނުގެ އެމްޓީ އޭންޖަލް އާއި 3939 ޓަނުގެ އެމްޓީ މެރިން ބެލާ މިހާރު އޮތީ ގުޅީފަޅު ބޭރުގަ އެވެ.
މެރިން އޭންޖެލް މާލެ އައީ އޮކްޓޯބަރު 27، ގަ އެވެ. މި ބޯޓު ކުޅުދުއްފުށީ ބޭރުގައި އޮތުމަށް ފަހު މާލެއަށް ފުރީ އޮކްޓޯބަރު 20، ގަ އެވެ.
މެރިން ބެލާ މާލެ ސަރަހައްދަށް އައީ ނޮވެމްބަރު 5، ގަ އެވެ. އެ ބޯޓު ވަނީ އޮކްޓޯބަރު މަހުގެ ވ. އަތޮޅަށް ވެސް ދަތުރެއް ކޮށްފަ އެވެ. އެ ދަތުރު ނިންމާލުމަށް ފަހު ނޮވެމްބަރު 4، ގައި މާލެ އައުމަށް ފަހު މާލެ އަތޮޅުގެ ދެކުނަށް ވެސް ވަނީ ދަތުރެއް ކޮށްފަ އެވެ.
މި ދެ ބޯޓު ގިނަ ދުވަސްތަކެއް ވަންދެން މާލޭ ސަރަހައްދުގައި ބަނދަރުކޮށްފައި އޮތީ ކީއްވެ ކަމެއް ނޭނގެ އެވެ. އެކަމާ ގުޅޭ ގޮތުން އެސްޓީއޯގެ ބަހެއް އަދި ނުލިބެ އެވެ.
ބަންކަރިންގެ ހިދުމަތަށް ގެނައި ދެ ބޯޓު މާލެ އަށް ގެނެސް ގުޅީފަޅު ބޭރުގައި ބަނދަރުކޮށްފަ --- ފޮޓޯ: މެރިން ޓްރެފިކް
ސިންގަޕޫރާއި ޔޫއޭއީގެ އިތުރުން މޮރިޝަސްގައި ވެސް ބަންކަރިންގެ ހިދުމަތް ދެމުންދާ ވިޓޯލް އާއި އެސްޓީއޯ ގުޅިގެން ރާއްޖޭގައި ބަންކަރިންގެ ހިދުމަތް ފެށީ ސެޕްޓެމްބަރު 19، 2024 ގަ އެވެ.
ބަންކަރިންގެ ހިދުމަތް އެ ދުވަހު ފެށިއިރު، އެންމެ ފުރަތަމަ ހިދުމަތް ދީފައި ވަނީ އެސްޓީއޯގެ ސަބްސިޑަރީ ކުންފުނި، މޯލްޑިވްސް ސްޓޭޓް ޝިޕިން (އެމްއެސްއެސް) އިން އޮޕަރޭޓު ކުރާ ވައިސީ ބެރިއާ އަށެވެ.
އެ ބޯޓު މީގެ ކުރިން ބަންކަރިންގެ ހިދުމަތް ހޯދަމުން ދިޔައީ ކޮލަމްބޯއިންނެވެ. 1100 ކޮންޓޭނަރު އުފުލުމުގެ ގާބިލުކަން ހުންނަ އެ ބޯޓުން މަހެއްގެ މައްޗަށް 200 ޓަނުގެ ތެޔޮ ބޭނުން ކުރާ ކަމަށް އެސްޓީއޯއިން ބުންޏެވެ.
ރާއްޖެ އާއި އިންޑިއާ ދެމެދު އޮންނަ 8 ޑިގްރީ ޗެނަލުން މަހަކު 300 އަށް ވުރެ ގިނަ އުޅަނދު ހުރަސް ކުރާއިރު، ބަންކަރިންގެ ހިދުމަތުން ރާއްޖޭގެ އިގުތިސާދަށް އަހަރަކު 400 މިލިއަން ވަންނާނެ ކަމަށް ސަރުކާރުން ބުނެފައިވެ އެވެ.
ނަމަވެސް ރާއްޖޭގައި ބަންކަރިންގެ ހިދުމަތް ފެށިތާ ދެމަސް ވުމަށް ގާތްވެފައިވާއިރު 8 ޑިގްރީ ޗެނަލުން ދަތުރުކުރި ބޭރުގެ އެއްވެސް ބޯޓަކަށް ތެލެއް ނާޅަ އެވެ.
