"އަދަދު" އިން ހެދި ތަހުގީގީ ޑޮކިއުމެންޓަރީ "ޖީ ސްކީލާން" އަށް އިނާމު ލިބުނު މަންޒަރު ޕީއެސްއެމް އިން ލައިވް ކުރުމުން، މީޑިއާ ކައުންސިލުގައި ޕީއެސްއެމް ތަމްސީލު ކުރާ އެ ކައުންސިލުގެ ރައީސް އަހުމަދު މުސްތަފާ ވަޒީފާއިން އިއްޔެ ކަނޑާލުމަށްފަހު އަނެއްކާ މިއަދު އަލުން ވަޒީފާ ދީފި އެވެ.
މުސްތަފާއަށް ވަޒީފާ ދިނީ އޭނާ ވަކި ކުރުމުން ކުންފުންޏަށް ވަރަށް ބޮޑަށް ފާޑުކިޔުން އަމާޒުވި ފަހުންނެވެ. އެގޮތުން އިދިކޮޅު ޕީއެންއެފް، އެމްޑީޕީ އަދި ޖަމިއްޔާތަކުގެ ފާޑުކިޔުން ވެސް އެކަމާ ގުޅިގެން ސަރުކާރަށް އަމާޒުވި އެވެ.
ޕީއެސްއެމް އިން ބުނީ މުސްތަފާއަށް އަލުން ވަޒީފާ ދިނީ އޭނާ ވަކި ކުރަން ނިންމި ނިންމުން ބޯޑަށް އެޕީލް ކުރުމުން އެކަން ބެލުމަށްފަހު ކަމަށެވެ. އަދި އެ ކުންފުނިން ބުނީ މުސްތަފާއަށް އަލުން ވަޒީފާ ދިނީ، އިއްޔެ ވަޒީފާއިން ވަކި ކުރިއިރު، ނޭނގޭ ކަންތައްތައް އެނގުމުން ކަމަށެވެ.
ސިޔާސީ ޕާޓީތަކުންނާއި އެހެނިހެން ފަރާތްތަކުން ބުނެފައި ވަނީ ޕީއެސްއެމްގެ ވަޒީފާއިން މުސްތަފާ ވަކި ކުރީ މީޑިއާއަށް ނުފޫޒު ފޯރުވައި، މިނިވަން މީޑިއާއެއް ހިންގުމުގެ ފުރުސަތު ނުދިނުމަށް ކަމަށެވެ.
"މީޑިއާގެ އަޑު ކެނޑުމަށް ނުވަތަ ފަރުދުންގެ ޕްރޮފެޝަނަލް ނަޒާހަތްތެރި ކަމަށް އަދަބު ދިނުމަކީ މި ޑިމޮކްރެޓިކް ތަނބުތައް ބަލިކަށިކުރާނޭ ކަމެއް. މިނިވަން ނޫސްވެރިކަމާއި ނޫސްވެރިކަމުގެ މިނިވަންކަން ހިމާޔަތްކުރުމަށް އަޅުގަނޑުމެން އެންމެން ހިތްވަރާއެކު ތެދުވަން ޖެހޭ،" މާލޭގެ މޭޔަރު އާދަމް އާޒިމް މިއަދު ވިދާޅުވި އެވެ.
ޕީއެސްއެމް އިން ވަކި ކުރިއިރު، މުސްތަފާ ހުންނެވީ ނިއުސް އޮޕަރޭޝަންސް މެނޭޖަރުގެ މަގާމުގަ އެވެ. އިއްޔެ ވަޒީފާއިން ވަކި ކުރިއިރު، ޕީއެސްއެމްގައި އޭނާ 30 އަހަރު ވަނީ ހިދުމަތްކޮށްދީފަ އެވެ.
"ޖީ ސްކީލާން" އަކީ މިހާރުގެ ރައީސް ޑރ. މުހައްމަދު މުއިއްޒުގެ ބައްޕާފުޅު އަވަހާރަވި ފަހުން ބައްޕާފުޅުގެ އަނބިކަނބަލުން މާލެ ވަޑައިގަތުމަށް މަސައްކަތް ކުރުމުން ރާއްޖެ ނާރުވައި ޑީޕޯޓްކޮށްލި މައްސަލައަށް ތައްޔާރުކޮށްފައިވާ ތަހުގީގީ ޑޮކިއުމެންޓަރީއެކެވެ.
