އަދަދުގެ ސިޔާސީ ކާޓޫނު ދައުރު ނޫހުން ޝާއިއު ކުރުމުން ކުށްވެރިވެއްޖެ

އަދަދުގެ ސިޔާސީ ކާޓޫނު ދައުރު ނޫހުން ޝާއިއު ކުރުމުން ކުށްވެރިވެއްޖެ

އަދަދު ނޫހުގެ ސިޔާސީ ކާޓޫނުގެ ވޮލިއުމް 22 ދައުރު ނުކުރަން ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އަންގާފައި ވަނިކޮށް އެ ފޮޓޯ ދައުރު ނޫހުން ޝާއިއު ކުރުމުން ކުށްވެރިވެއްޖެ އެވެ.

ދައުރު ނޫހަށް ކޮމިޝަނުން ފޮނުވި ސިޓީއެއްގައި ބުނީ އަދަދު ނޫހުން ގެނެސްދިން ކާޓޫނުގެ މައްސަލަ އެ ކޮމިޝަނުން ބަލަމުންދާތީ، މައްސަލައިގެ ތަހުގީގު ނިމެންދެން ދައުރު ނޫހުގެ ހަބަރުގައި ޝާއިއުކޮށްފައިވާ ކާޓޫނުގެ ފޮޓޯ ރިމޫވް ކުރަން އިލްތިމާސްކުރާ ކަމަށެވެ.

"މި މައްސަލައިގެ ތަހުގީގު ނިމި، ކޮމިޝަނުން މައްސަލައާ ގުޅިގެން ވަކި ގޮތެއް ނިންމަންދެން، ތިފަރާތުން 25 ޖެނުއަރީ 2026 ގެ 17:30 ގައި ތިފަރާތުގެ ވެބްސައިޓް (https://dhauru.com/post/news/41210) އަދި އެކްސްގައި ޝާއިއުކޮށްފައިވާ އެ ފޮޓޯ ވަގުތީ ގޮތުން ރިމޫވް ކުރުމަށް ތިފަރާތަށް އިލްތިމާސްކުރަން،" ކޮންޓްރޯލް ކޮމިޝަނުން ފޮނުވި ސިޓީގައި ބުންޏެވެ.

ދައުރު ނޫހުން އަދަދު ނޫހުގެ ސިޔާސީ ކާޓޫނުގެ ފޮޓޯ ޝާއިއުކުރީ އެއްވެސް ބަޔަކު އެ ފޮޓޯ ޝާއިއު ނުކުރުމަށް ބުނުމާއެކު ލިޔުނު ހަބަރުގެ އެތެރޭގަ އެވެ. ނަމަވެސް އޭގެ ފަހުން ކޮމިޝަނުން ވަނީ ހަމައެކަނި މީޑިއާތަކުން އެ ފޮޓޯ ދައުރު ނުކުރުމަށް އަންގާފަ އެވެ.

ކޮމިޝަނުން ފޮޓޯ ރިމޫވް ކުރުމަށް ދައުރު ނޫހަށް އެންގުމުން އެ ފޮޓޯ މިހާރު ވަނީ ރިމޫވްކޮށްފަ އެވެ.

އަދަދު ނޫހުން ގެނެސްދިން ސިޔާސީ ކާޓޫނު ރިމޫވް ކުރުމުގެ އިތުރުން އެ ސެގްމަންޓް ހުއްޓާލަން ދެވަނަ ފަހަރަށް ކޮންޓްރޯލް ކޮމިޝަނުން މިއަދު ވަނީ އަންގާފަ އެވެ. ނަމަވެސް އެ ނޫހުން އެ ކާޓޫނު ރިމޫވް ނުކުރާއިރު، އެ ސެގްމަންޓް ވެސް ހުއްޓާލާފައެއް ނުވެ އެވެ.

އެ ކޮމިޝަނުން ބުނީ އަދަދުގެ ސިޔާސީ ކާޓޫނުގެ މައްސަލަ ބަލަމުންދަނީ މޯލްޑިވްސް ބްރޯޑްކާސްޓިން ރެގިއުލޭޝަންގެ ގާނޫނުގައި ހިމެނޭ މައްސަލަ ބެލުމުގެ ބާރުގައި ވަކި ކަންކަމާ ގުޅޭގޮތުން ހާއްސަ މައުލޫމާތެއް ދެވިދާނެ ކަމަށް ކޮމިޝަނަށް ފެންނަ ފަރާތްތަކުން، އެ މައުލޫމާތެއް ކޮމިޝަނަށް ދިނުމަށް އެންގިދާނެ ކަމަށް ބަޔާންކޮށްފައިވާތީ ކަމަށެވެ.

އަދަދު ނޫހުގެ ސިޔާސީ ކާޓޫނާ މެދު ގޮތެއް ނިމިގެންދާނީ، މައްސަލައާ ގުޅުންހުރި އެންމެހައި ފަރާތްތަކުން ހުށަހަޅާފައިވާ ލިޔެކިޔުންތަކާއި މައުލޫމާތުތަކުގެ މައްޗަށް ރިޔާޔަތްކޮށް ކަމަށް ކޮމިޝަނުން ބުންޏެވެ.

ނަމަވެސް އަދަދު އިން ގެނެސްދިން ސިޔާސީ ކާޓޫނުގެ ކޮންޓެންޓު އިސްލާމް ދީނުގެ އަސްލަކާ ހިލާފު ކަމަށް 'ތުހުމަތު ކުރެވި' އެ ގޮތަށް ނިންމި ގާނޫނީ ސަބަބުތައް ސާފުކޮށްދޭން އަދަދު ނޫހުން އެދިފައިވެ އެވެ.

އިންޓަނެޓުގައި ޝާއިއު ކުރާ ކޮންޓެންޓަށް އަމުރު ފޯރުވުމުގެ ބާރު ކޮމިޝަނަށް ނުލިބޭނެ ކަމަށް މީގެ ކުރިން ސަރުކާރުން ދިޔައީ ބުނަމުންނެވެ. އެކަމަކު، ނޫސްވެރިންގެ ޖަމިއްޔާ އާއި ނޫސްވެރިން އެއިރު ވެސް ބުނަމުންދިޔައީ ގާނޫނު ފަރުމާކޮށްފައި އޮތް ގޮތުން އިންޓަނެޓުގައި ޝާއިއު ކުރާ ކޮންޓެންޓަށް ވެސް ކޮމިޝަނަށް ބާރު ފޯރުވޭނެ ކަމަށެވެ.

މިއީ އަދަދު ނޫހުގައި ޝާއިއުކުރި ކޮންޓެންޓެއް ނެގުމަށް މީޑިއާ ނެތިކޮށްލާ ގާނޫނުގެ ދަށުން ކޮންޓްރޯލް ކޮމިޝަނުން އެންގި ފުރަތަމަ ފަހަރެވެ. އޭގެއިތުރުން މިއީ އާންމުން ކޮންޓެންޓެއް ދައުރު ނުކުރުމަށް ކޮމިޝަނުން އެންގި ވެސް ފުރަތަމަ ފަހަރެވެ.

ކޮމެންޓް

ފަހުގެ ޚަބަރު

ރަސްމާލޭގެ ބަދަލު ދޭނީ މެންބަރުންނާއި ވެރިންގެ މުދަލުން: ފައްޔާޒު

ފައްޔާޒު ވަނީ މި މަޝްރޫއަށް މަގުފަހިކުރަން ހުށަހަޅާފައިވާ ބިލަކީ ގާނޫނުއަސާސީއާ ހިލާފަށް، ބޭރުގެ ފަރާތްތަކަށް ރާއްޖޭގެ ބިންތައް ދާއިމީކޮށް މިލްކުވާ ގޮތަށް އޮތް ބިލެއް ކަމަށް ވިދާޅުވެފަ. އަދި މިނިވަން ކޯޓެއް އޮތް ނަމަ ވުޖޫދުކުރަން އުޅޭ ގާނޫނާއީ ބިލު ވެސް ބާތިލުކުރާނެ ކަމަށް އޭނާ ވިދާޅުވި.

ކްރެކް ނުކުރެވިގެން ޖުމާންގެ ފޯނު ރާއްޖެއިން ބޭރަށް ފޮނުވަނީ

ޓެރަރިޒަމްގެ ތުހުމަތުގައި ހައްޔަރުކުރި އަލީ ޖުމާންގެ ފޯނު ހުޅުވަން އޭނާ އިންކާރުކުރުމުން، އެ ފޯނު ތަހުލީލުކުރުމަށް ރާއްޖެއިން ބޭރަށް ފޮނުވުމުގެ މަސައްކަތް ފުލުހުން ދަނީ ކުރަމުން. ސޯޝަލް މީޑިއާގައި ހުޅުޖެހުމަށާއި މުދަލަށް ގެއްލުންދޭން ހިތްވަރުދިން ކަމުގެ ތުހުމަތު އޮތް ޖުމާން، ބަންދުގައި ބެހެއްޓުމަށް ކޯޓުން ވަނީ އިތުރު 15 ދުވަސް ދީފަ.

މިއީ މިހާރު ހަމަ ކާޓޫނަކަށް ވެއްޖެ: ނަޝީދު

ނަޝީދު ވަނީ މި މައްސަލައިގައި ސަރުކާރަށް ފާޑުވިދާޅުވަމުން ވެރިކަމަށް ވަޑައިގަތީ ރައީސް ޔާމީންގެ ނަންފުޅު ބޭނުންކުރައްވައިގެން ކަމަށާއި، ނަމަވެސް މިހާރު ޔާމީނާއި ތަޖުރިބާކާރު ބޭފުޅުން އެއްކައިރިކޮށްފައިވާ ކަމަށް ވެސް ތުހުމަތުކުރައްވާފަ.

ނުރައްކާވާ މިންވަރަށް އުތުރާއި މެދުރާއްޖެއަށް ދުންފުހުގެ އަސަރު

ސިއްހަތަށް ނުރައްކާވާ މިންވަރަށް މާލެއާއި ކުޅުދުއްފުއްޓަށް ދުންފުނީގެ އަސަރުކޮށް، ވައި ނުސާފުވެފައިވާތީ ރައްކާތެރިކަމުގެ ފިޔަވަޅުތައް އެޅުމަށް އެޗްޕީއޭއިން ވަނީ އިލްތިމާސްކޮށްފައި. މެޓް އޮފީހުން ލަފާކުރާ ގޮތުގައި ކުރިއަށް އޮތް ދުވަސްތަކުގައިވެސް ރާއްޖޭގެ އެކި ސަރަހައްދުތަކަށް ދުންފުނީގެ އަސަރު ފޯރާނެ.

އީގަލް ހިލްސްއާއެކު ސޮއިކުރި ކޮމާޝަލް ޓާމްސް އެގްރީމެންޓެއް ނެތް

މި މައުލޫމާތު ހޯދަން "އަދަދު" ނޫހުން އެދުމުން މިނިސްޓްރީން ޖަވާބު ދިނީ އެއީ އެ މިނިސްޓްރީން ބަލަހައްޓާ މައުލޫމާތު ނޫން ކަމަށާއި، މަޝްރޫއުގެ މައިގަނޑު އެއްބަސްވުމުގައި އަދި ސޮއިނުކުރާ ކަމަށް ބުނެ އެވެ.

ނޮވެމްބަރު 26، ގައި އެމްޑީޕީން މަގުމައްޗަށް ނުކުންނަނީ

ރަސްމާލެ މަޝްރޫޢުގެ ބޮޑު ބައެއް ބޭރު ކުންފުންޏަކަށް ދޫކޮށްލުމާ ގުޅޭގޮތުން ރައްޔިތުންގެ ފެންނަ ނުފެންނަ ވޯޓެއް ނެގުމަށް ގޮވާލައި، މި މަހުގެ 26 ގައި މަގުމައްޗަށް ނުކުމެ އިހުތިޖާޖުކުރަން އެމްޑީޕީން ވަނީ ނިންމާފައި. އެ ޕާޓީން ބުނާގޮތުގައި މި މަޝްރޫޢަކީ ރައްޔިތުންނަށް ސާފުނުވާ ގިނަ ކަންތައްތަކެއް ހުރި މަޝްރޫއެއް.

މުއިއްޒު އަންނަ މަހު ބަންގްލަދޭޝްއަށް ވަޑައިގަންނަވަނީ

ރައީސް މުޙައްމަދު މުޢިއްޒު އަންނަ ޑިސެމްބަރު މަހުގެ 13 ވަނަ ދުވަހު ބަންގްލަދޭޝްއަށް ފުރަމާނަ ދަތުރުފުޅެއް ކުރެއްވުމަށް ވަނީ ހަމަޖެހިފައެވެ. ތިން ދުވަހުގެ މި ދަތުރުފުޅުގައި ދެ ގައުމުގެ ގުޅުން ބަދަހިކުރުމަށާއި، ރާއްޖޭގައި އުޅޭ ބަންގްލަދޭޝް މަސައްކަތްތެރިންގެ ހައްގުތަކާ ގުޅޭގޮތުން މަޝްވަރާކުރުމަށް ވަނީ ރޭވިފައެވެ.

Newsletter

Get the latest news delivered straight to your inbox