މާލޭގެ މޭޔަރުކަމަށް ވާދަކުރައްވާ ކެންޑިޑޭޓް އިސްމާއީލް ޒަރިޔަންދު، ސަރުކާރަށާއި އަލަށް އުފެއްދި މީޑިއާ އެންޑް ބްރޯޑްކާސްޓިންގ ކޮމިޝަނަށް ވަރަށް ބޮޑަށް ފާޑުވިދާޅުވެއްޖެ އެވެ.
އަދަދު ނޫހުގެ 22 ނަންބަރު ސިޔާސީ ކާޓޫނު ނޫސްތަކާއި އާންމުން ވެސް ފެތުރުން މަނާކޮށްފައި ވަނިކޮށް ޒަރިޔަންދު ރޭ އެކްސްގައި ކުރެއްވި ޕޯސްޓެއްގައި ވިދާޅުވީ، އެ ކުރެހުމުން ސަރުކާރު ކަންބޮޑުވާ ސަބަބަކީ ދައުލަތުގެ ހިންގުމުގެ ތެރޭގައި މިއަދު އާންމުވެފައިވާ ކޮރަޕްޝަންގެ ހަގީގަތް އެއިން ސިފަކޮށްދޭތީ ކަމަށެވެ.
މީޑިއާ ކޮމިޝަންގެ މަސައްކަތްތަކާ މެދު ސުވާލު އުފައްދަވަމުން އޭނާ ވިދާޅުވީ އެ ކޮމިޝަން އުފެދުނު ތަނުން މި ފެނުނީ ހިޔާލުފާޅުކުރުމުގެ މިނިވަންކަން ހަނިކުރުމުގައި ސަރުކާރުން ބޭނުންކުރާ ވަސީލަތަކަށް ވީތަން ކަމަށެވެ.
"މި ކުރެހުމަށް ސަރުކާރުން ކަންބޮޑުވާ ސަބަބެއްކަމަށް ފެންނަނީ؛ ދައުލަތުގެ ހިންގުމުގައި މިއަދު ޢާއްމުވެފައިވާ ރިޝްވަތާއި ކޮރަޕްޝަންގެ ހާލަތު ސިފަކޮށްދިނުމެވެ. މީޑިއާ އެންޑް ބްރޯޑްކާސްޓިން ކޮމިޝަންއުފެދުނު ތަނުން މިފެނުނީ ހިޔާލުފާޅުކުރުން ހުއްޓުވުމުގައި ސަރުކާރުގެ އަޅަކަށް ވީތަނެވެ،" އޭނާ ވިދާޅުވި އެވެ.
އަދަދު ނޫހުގެ އެކްސް އަދި ފޭސްބުކްގައި ޝާއިއުކުރި މި ކާޓޫނު ނެގުމަށާއި މައްސަލަ ބަލައި ނިމެންދެން އެ ސެގްމަންޓު ހުއްޓާލަން އަދަދު ނޫހަށް އަންގާފައިވެ އެވެ.
އެކަމާ ގުޅިގެން އާންމުން ހިތްހަމަ ނުޖެހި، އެ ކާޓޫނުން ދީނަށް ފުރައްސާރަކޮށްފައި ނެތްކަމަށް ބުނެ އާންމުން މި ކާޓޫން ވަރަށް ބޮޑަށް ދައުރުކުރަން ފެށުމުން އެކަން ހުއްޓުވަން މީޑިއާ ކޮމިޝަނުން އިއްޔެ ބަޔާނެއް ނެރުނެވެ. ނަމަވެސް އެ ބަޔާނަށް އިންތިހާ އަށް ފާޑުކިޔުން އަމާޒުވެ، ކާޓޫނު އިތުރަށް ފަތުރަން ފެށުމުން، މީޑިއާތަކުން ފެތުރުން މަނާކަމަށް ބަޔާން ބަދަލުކުރި އެވެ.
ކާޓޫނުގެ މައްސަލައިގައި އަދަދު ނޫހުން މިއަދު ކޮމިޝަނަށް ޖަވާބެއް ފޮނުވަން ޖެހޭނެ ކަމަށް އަންގާފައިވެ އެވެ.
