އަދަދު ނޫހުން ގެނެސްދޭ ސިޔާސީ ކާޓޫން ސެގްމަންޓް ހުއްޓާލަން ބްރޯޑްކާސްޓިން ކޮމިޝަން (ކޮންޓްރޯލް ކޮމިޝަން) އިން އަނެއްކާވެސް މިއަދު އަންގައިފި އެވެ.
ކޮންޓްރޯލް ކޮމިޝަނުން އަދަދު ނޫހަށް ފޮނުވި ސިޓީއެއްގައި ބުނީ މައްސަލަ ބެލުމުގެ މަރުހަލާގެ ބޭނުމަށްޓަކައި މައްސަލަ ބަލައި ނިމެންދެން ޖެނުއަރީ 22، ގައި މި ނޫހުން ޝާއިއުކުރި ސިޔާސީ ކާޓޫން ވަގުތީ ގޮތުން ރިމޫވްކޮށް، ސިޔާސީ ކާޓޫން ސެގަމްނޓް މެދުކަނޑާލަން ތަކުރާރުކޮށް އަންގާ ކަމަށެވެ.
"މައްސަލަ ބެލުމުގެ މަރުހަލާގެ ބޭނުމަށްޓަކައި މައްސަލަ ބަލައި ނިމެންދެން 2026 ޖެނުއަރީ 22 ވަނަ ދުވަހު ސިޔާސީ ކާޓޫނު ވޮލިއުމް 22 ގަިއ ތިޔަފަރާތުން ޝާއިއުކޮށްފައިވާ ކޮންޓެންޓް، ވަގުތީ ގޮތުން ރިމޫވްކުރައްވާ، ސެގްމަންޓް މެދުކަނޑާލުމަށް ތަކުރާރުކޮށް އަންގަން،" ކޮމިޝަނުން ބުންޏެވެ.
އެ ކޮމިޝަނުން ބުނީ އަދަދުގެ ސިޔާސީ ކާޓޫނުގެ މައްސަލަ ބަލަމުންދަނީ މޯލްޑިވްސް ބްރޯޑްކާސްޓިން ރެގިއުލޭޝަންގެ ގާނޫނުގައި ހިމެނޭ މައްސަލަ ބެލުމުގެ ބާރުގައި ވަކި ކަންކަމާ ގުޅޭގޮތުން ހާއްސަ މައުލޫމާތެއް ދެވިދާނެ ކަމަށް ކޮމިޝަނަށް ފެންނަ ފަރާތްތަކުން، އެ މައުލޫމާތެއް ކޮމިޝަނަށް ދިނުމަށް އެންގިދާނެ ކަމަށް ބަޔާންކޮށްފައިވާތީ ކަމަށެވެ.
އަދަދު ނޫހުގެ ސިޔާސީ ކާޓޫނާ މެދު ގޮތެއް ނިމިގެންދާނީ، މައްސަލައާ ގުޅުންހުރި އެންމެހައި ފަރާތްތަކުން ހުށަހަޅާފައިވާ ލިޔެކިޔުންތަކާއި މައުލޫމާތުތަކުގެ މައްޗަށް ރިޔާޔަތްކޮށް ކަމަށް ކޮމިޝަނުން ބުންޏެވެ.
ނަމަވެސް އަދަދު އިން ގެނެސްދިން ސިޔާސީ ކާޓޫނުގެ ކޮންޓެންޓު އިސްލާމް ދީނުގެ އަސްލަކާ ހިލާފު ކަމަށް 'ތުހުމަތު ކުރެވި' އެ ގޮތަށް ނިންމި ގާނޫނީ ސަބަބުތައް ސާފުކޮށްދޭން އަދަދު ނޫހުން އެދިފައިވެ އެވެ.
އިންޓަނެޓުގައި ޝާއިއު ކުރާ ކޮންޓެންޓަށް އަމުރު ފޯރުވުމުގެ ބާރު ކޮމިޝަނަށް ނުލިބޭނެ ކަމަށް މީގެ ކުރިން ސަރުކާރުން ދިޔައީ ބުނަމުންނެވެ. އެކަމަކު، ނޫސްވެރިންގެ ޖަމިއްޔާ އާއި ނޫސްވެރިން އެއިރު ވެސް ބުނަމުންދިޔައީ ގާނޫނު ފަރުމާކޮށްފައި އޮތް ގޮތުން އިންޓަނެޓުގައި ޝާއިއު ކުރާ ކޮންޓެންޓަށް ވެސް ކޮމިޝަނަށް ބާރު ފޯރުވޭނެ ކަމަށެވެ.
ކޮންޓްރޯލް ކޮމިޝަނުން ވަނީ އަދަދު ނޫހުން ގެނެސްދިން ސިޔާސީ ކާޓޫނު ދައުރު ނުކުރުމަށް މީޑިއާތަކަށް އަންގާފަ އެވެ. އެގޮތަށް އެންގުމުގެ ކުރިން އާންމުން ވެސް އެ ކާޓޫނު ދައުރު ނުކުރަން ކޮމިޝަނުން އެންގިއިރު، ފާޑުކިޔުން އަމާޒުވުން އެ އެންގުން ފަހުން ބާތިލުކުރި އެވެ.
މިއީ އަދަދު ނޫހުގައި ޝާއިއުކުރި ކޮންޓެންޓެއް ނެގުމަށް މީޑިއާ ނެތިކޮށްލާ ގާނޫނުގެ ދަށުން ކޮންޓްރޯލް ކޮމިޝަނުން އެންގި ފުރަތަމަ ފަހަރެވެ. އޭގެއިތުރުން މިއީ އާންމުން ކޮންޓެންޓެއް ދައުރު ނުކުރުމަށް ކޮމިޝަނުން އެންގި ވެސް ފުރަތަމަ ފަހަރެވެ.
