މިނިސްޓްރީ އޮފް ދިވެހި ލެންގުއޭޖް، ކަލްޗާ އެންޑް ހެރިޓޭޖަށް ޑެޕިއުޓީ މިނިސްޓަރަކާއި ޕޮލިޓިކަލް ޑިރެކްޓަރެއް މިދިޔަ ހަފްތާގައި އައްޔަނުކޮށްފި އެވެ.
"އަދަދު" އަށް އެނގިފައިވާ ގޮތުގައި އެ މިނިސްޓްރީގެ ޑެޕިއުޓީ މިނިސްޓަރަކަށް އައްޔަނުކުރީ ކުރިން ޓީޗަރަކަށް މަސައްކަތް ކުރި ށ. ފޯކައިދޫ، ދޫވެހި އިބްރާހިމް ރަޝީދު އިދުރީސް އެވެ. އަދި ޕޮލިޓިކަލް ޑިރެކްޓަރަކަށް އައްޔަނު ކުރީ ކުރީގެ މަޝްހޫރު ލަވަ ކިޔުންތެރިޔާ ދަފްތަރު، ނަންބަރު ރސ 7771، މާލެ، މުމްތާޒް މޫސާ އެވެ.
މައުލޫމާތު ލިބޭ ގޮތުގައި އެ ދެ މީހުން ވެސް މިހާރު ވަނީ ވަޒީފާއަށް ނިކުންނަން ފަށާފަ އެވެ.
ގައުމިއްޔަތު މިނިސްޓްރީއަށް އިތުރު ދެ ސިޔާސީ މުވައްޒަފުން ނަގާފައި ވަނީ ދައުލަތުގެ ހަރަދުތައް ކުޑަކޮށް ސިޔާސީ މުވައްޒަފުންގެ އަދަދު މަދު ކުރުމުގެ އިތުރުން ސިޔާސީ މުވައްޒަފުންގެ މުސާރައިން 10 ޕަސަންޓު އުނި ކުރަން ނިންމާފައިވާ ދަނޑިވަޅެއްގަ އެވެ.
ސިޔާސީ މުވައްޒަފުން އައްޔަނު ކުރަނީ ގާނޫނު އަސާސީގެ 115 ވަނަ މާއްދާގެ ދަށުން ރައީސުލްޖުމްހޫރިއްޔާއަށް ލިބިދޭ ބާރުގެ ދަށުންނެވެ.
ސަރުކާރުގައި ތިބި ސިޔާސީ މުވައްޒަފުންގެ ޖުމްލަ އަދަދު ހާމަ ނުކުރައްވައި، ރައީސް ޑރ. މުހައްމަދު މުއިއްޒު ވަނީ ސިޔާސީ މަގާމުތަކުން 228 މުވައްޒަފުން ވަރަށް އަވަހަށް ވަކި ކުރައްވާނެކަން އިއުލާން ކުރައްވާފަ އެވެ.
މި ސަރުކާރު ވެރިކަމަށް އައީ 700 އަށްވުރެ ސިޔާސީ މުވައްޒަފުންގެ އަދަދު ގިނަ ނުކުރާނެ ކަމުގެ ވައުދާއެކު އެވެ. ނަމަވެސް, އެ އަދަދު 2,000 އާ ގާތްކުރާނެ ކަމަށް އެކި މަސްދަރުތަކުން ހޯދި މައުލޫމާތުތަކުން އެނގެ އެވެ.
