ދިވެހި ބަސް ކުރިއަރުވައި ދިވެހީންގެ ހިތްތަކުގައި ގައުމިއްޔަތުގެ ލޯބި އާލާ ކުރުމުގެ މަގުސަދުގައި ރައީސް މުހައްމަދު މުއިއްޒު އަލަށް އުފެއްދެވި، ދިވެހި ބަހާއި ސަގާފަތާއި ތަރިކައާ ބެހޭ މިނިސްޓްރީ އުވާލައިފި އެވެ.
ދިވެހި ބަހާއި ސަގާފަތާއި ތަރިކައާ ބެހޭ މިނިސްޓަރުގެ މަގާމުގައި ހުންނެވި އާދަމް ނަސީރު އިސްތިއުފާ ދެއްވީ މިއަދު ކެބިނެޓުން ވަކިވެވަޑައިގެންނެވި 10 ބޭފުޅުންނާއެކު އެވެ.
އާދަމް ނަސީރު އިސްތިއުފާދެއްވުމާއެކު، އެ މިނިސްޓްރީއަށް ބޭފުޅަކު އައްޔަނުކުރުމުގެ ބަދަލުގައި، މިރޭ ވަނީ ދިވެހި ބަހުގެ މެންޑޭޓު އުނިކުރުމަށްފަހު، މީގެ ކުރީގެ ސަރުކާރުތަކުން ވެސް ހިންގި ނަމުގައި ކަލްޗާ އެންޑް ހެރިޓޭޖް މިނިސްޓަރުގެ މަގާމަށް ހީނާ ވަލީދު އައްޔަނުކޮށްފަ އެވެ.
މީގެ ކުރީގެ ސަރުކާރުތަކުން ވެސް ކަލްޗާ އެންޑް ހެރިޓޭޖްގެ މެންޑޭޓު ދީގެން މިނިސްޓްރީ ހިންގި އެވެ. ނަމަވެސް، މުއިއްޒު ވެރިކަމަށް ވަޑައިގަތުމަށްފަހު ދިވެހި ބަހާއި ސަގާފަތާއި ތަރިކައާ ބެހޭ މިނިސްޓްރީގެ ނަމުގައި މިނިސްޓްރީއެއް އުފެއްދެވީ ދިވެހި ގައުމިއްޔަތު ދިރުވައި އާލާކުރުމަށާއި ދިވެހީންގެ ސިކުނޑިތައް ބިނާ ކުރުމަށް ކަމަށް ބުނެ އެވެ.
"އަޅުގަނޑުމެން މި ފަށަނީ، ދިވެހި ގައުމިއްޔަތު ދިރުވައި އާލާކުރުމުގެ ގައުމީ މަޝްރޫއު. މިއީ، ދިވެހީންގެ ސިކުނޑިތައް ބިނާކުރުމުގެ މަޝްރޫއު. ދިވެހީންގެ ކެރުމާއި އަޒުމާއި ހިތްވަރާއި އިސްލާމީ ރިވެތި ސިފަތަކަށް ހޭނުމުގެ މަޝްރޫއު. ދިވެހީންގެ ގޮތާ ފޮތާ ދިމާޔަށް އުފަލުން އެނބުރިލާނެ މަޝްރޫއު. އިރާދަކުރެއްވިއްޔާ، ދިވެހި ގައުމިއްޔަތު ދިރުވައި އާލާކުރުމުގެ މި މަޝްރޫއުން ދިވެހި ދަރީންގެ ނަފުސާނީ، ރޫހާނީ އަދި މާނަވީ ވެށި ހެޔޮގޮތުގައި ބިނާކޮށް ފައްކާކުރާނަން،" ވެރިކަމާ ހަވާލުވެވަޑައިގެން ނޮވެމްބަރު 17، 2023، ގައި ދެއްވި ތަގުރީރުގައި ރައީސް ވިދާޅުވި އެވެ.
އޭގެ ފަހުން ދިވެހި ބަހާއި ސަގާފަތާއި ތަރިކައާ ބެހޭ މިނިސްޓަރުކަމާ އާދަމް ނަސީރު ހަވާލުވެވަޑައިގަތުމަށްފަހު، މީޑިއާއަކަށް ދެއްވި ފުރަތަމަ އިންޓަވިއުގައި، އަދަދު ނޫހަށް ވިދާޅުވީ އުމްރާނީ ތަރައްގީއާ އެއްވަރަށް ގައުމުގެ ސިކުނޑިތައް ބިނާކުރުމަކީ ވެސް ރައީސް އިސްކަންދެއްވާ ކަމެއް ކަމަށެވެ. އެކަމުގެ ޒިންމާ އޮތީ ތައުލީމީ ވުޒާރާ އާއި ދިވެހި ބަހުގެ މިނިސްޓްރީގައި ކަމަށެވެ.
ނަސީރު ވިދާޅުވީ އެ ޒިންމާގެ ދަށުން އެ މިނިސްޓްރީ އަށް އޮތީ ގައުމާ މެދު ހޭލުންތެރިކުރުވުމާއި ގައުމަށް ރައްކާތެރިކުރާނެ، ގައުމު ދެނެގަނެ ގައުމު ސަލާމަތްކުރާނެ ގޮތްތަކާ މެދު ވިސްނާ ފިކުރުކުރާނެ ބަޔަކު އުފެއްދުން ކަމަށެވެ.
ގައުމިއްޔަތުގެ އެންމެ މުހިންމު އެއް ބަހާއަކީ ދިވެހި ބަސްކަން ފާހަގަކުރައްވައި، ނަސީރު ވިދާޅުވީ، "މަހެއް ދިރެނީ ފެނުގައި" ކަމަށާއި ހަމަ އެގޮތަށް "ބަހެއް ދިރެނީ ސަގާފަތުގައި" ކަމަށެވެ. އެގޮތުން ދިވެހި ބަހަށް ހީނަރުކަން އައީ ދިވެހިން އުޅެމުން އައި ގޮތް ނުވަތަ ސަގާފަތަށް ބަދަލުތަކެއް އައުމުން ކަމަށް އޭނާ ވިދާޅުވި އެވެ.
އެކަމަކު އޭނާ ވިދާޅުވީ ސަގާފަތް ބަދަލުވި ނަމަވެސް، ބަސްކޮށާރު މުއްސަނދިކޮށް، ބަހަށް ލޯބި ޖައްސާނެ އިލްމީ ގޮތްތައް ދުނިޔޭގައި އެބަހުރި ކަމަށެވެ. އެގޮތުން ކުދިންގެ ސިކުނޑި އާއި ތަނާއި ވަސީލަތާ ގުޅޭ ގޮތަށް އެކަން ކުރެވޭނެ އިލްމީ ގޮތް އެބަހުރި ކަމަށާއި ރައީސްގެ ވިސްނުންފުޅަކީ ވެސް އިލްމީކޮށް އެކަންކަން ހާސިލްކުރުން ކަމަށެވެ.
"އިލްމީ ހަގީގަތްތަކާ އެކު އެކަމާ ކުރިމަތިލައިގެން ނަތީޖާ ނެރެވޭނެ،" ނަސީރު ވިދާޅުވި އެވެ.
ނަމަވެސް، މިއަދު އެ މިނިސްޓްރީ އުވައިލުމާއެކު، ދިވެހި ބަސް އާލާކޮށް ދިރުވުމުގެ މެންޑޭޓު ހަމައެކަނި އޮންނާނީ ދިވެހި ބަހުގެ އެކަޑެމީއަށެވެ.
