ދިވެހިބަހާއި ސަގާފަތާއި ތަރިކައާ ބެހޭ ވުޒާރާގެ އާ ވަޒީރު ހީނާ ވަލީދަށް މަރުހަބާ ދަންނަވައި، އެ ވުޒާރާގެ ހިންގުމާ ގުޅޭ ގޮތުން ކުރީގެ ސްޓޭޓް މިނިސްޓަރު މުހައްމަދު ތޯރިގު ގިނަ ސުވާލުތަކެއް ކުރިމަތިކުރައްވައިފި އެވެ.
ސޯޝަލް މީޑިއާގައި ކުރެއްވި ޕޯސްޓެއްގައި ތޯރިގު ވަނީ ކުރީގެ ވަޒީރު އާދަމް ނަސީރު އިބްރާހީމްގެ ދައުރުގައި ހިނގާފައިވާ ކަންކަމާ ގުޅޭ ގޮތުން ސާފުކުރަން ބޭނުންވާ 14 ކަމެއް ފާހަގަކުރައްވާފަ އެވެ.
ތޯރިގު ވަނީ ހީނާ ވަލީދަށް މަރުހަބާ ދަންނަވަމުން، މާދަމާވެސް މޭޒުގެ އަނެއް ފަރާތުގައި އިންނަވަން ޖެހިވަޑައިގެންފާނެ ކަމަށް ބައްލަވައިގެން މަސައްކަތް ކުރެއްވުމަށް ނަސޭހަތްތެރިވެފަ އެވެ. އޭނާ ކުރެއްވި ސުވާލުތަކުގެ ތެރޭގައި ގައުމީ ޗާޕްހާނާގެ މަސައްކަތްތަކާއި، އެތަނުން މިހާތަނަށް ހިލޭ ސާބަހަށް ޗާޕުކޮށްދިން ފޮތްތަކުގެ އަދަދު ސާފުކޮށްދިނުމަށް އެދިވަޑައިގެންފައި ވެ އެވެ.
މީގެ އިތުރުން އުސްގެކޮޅުގައި ގާއިމުކުރި ދާރުލްއާސާރާއި، ކަޅުވަކަރު މިސްކިތް ހިމެނޭ ސަރަހައްދު ޒަމާނީ ފެންވަރަށް ތަރައްގީކުރި ގޮތުގެ ތަފްސީލަށް ވެސް ވަނީ އެދިވަޑައިގެންފަ އެވެ.
ގައުމިއްޔަތު އިއާދަކުރުމުގެ ނަމުގައި ހިންގި ބޮޑެތި މަޝްރޫއުތަކާ ގުޅޭ ގޮތުން ސުވާލު އުފައްދަވަމުން ތޯރިގު ވަނީ، ހއ. އުތީމާއި ބާރަށާއި ތަކަންދޫ އަދި އިހަވަންދޫ ހިމެނޭހެން ހިންގި ބޮޑުތަކުރުފާނުގެ ހަނދާންތައް ދިރުވުމުގެ މަޝްރޫއުގެ އަދާހަމައެއް ހޯދުމަށް އެދިވަޑައިގެންފަ އެވެ.
އުތީމުގައި ތަރައްގީކުރި ދިވެހި ބޭސްވެރިކަމުގެ ފަތްޕިލާވެލީގެ ދަނޑުގެ ހާލަތާއި، އަލަށް އުފެއްދި ކޮލެޖުން ދަސްވެނިވި ދަރިވަރުންގެ އަދަދު ހާމަކުރުމަށް ވެސް އޭނާ ގޮވާލެއްވި އެވެ.
ތޯރިގުގެ ޕޯސްޓުގައި އެންމެ ބޮޑަށް ފާހަގަކުރައްވާފައިވަނީ އާސާރީ ތަންތަނަށް ލިބިފައިވާ ގެއްލުންތަކުގެ ވާހަކަ އެވެ. އެގޮތުން މާލޭ ހުކުރު މިސްކިތުގެ އާބާތުރަ ފިލުވުމުގައި ކުރީ ސަރުކާރުން ބޭނުންކުރި ކެމިކަލްތަކުގެ ސަބަބުން ގެއްލުންވި ކަމަށް ކުރީގެ ވަޒީރު ވިދާޅުވެފައިވާތީ، އެއީ ކޮން ކެމިކަލެއްކަން ސާފުކޮށްދިނުމަށް ވަނީ އެދިވަޑައިގެންފަ އެވެ. އަދި ކަޅުއޮށްފުންމީގެ ނަކަލު ފަނިބޮއި ހަލާކުވަމުންދާ ކަމަށް ވިދާޅުވެ، އެކަމަށް ދީފައިވާ ފަރުވާގެ ތަފްސީލު ހޯދުމަށް ވެސް ވަނީ ހުށަހަޅުއްވާފަ އެވެ.
ރައީސް ޑރ. މުހައްމަދު މުއިއްޒަށް އޮޅުވާލައިގެން ސަގާފީ ތަރިކަ ދިރާސާކުރާ ގައުމީ މަރުކަޒެއް އުފައްދާފައިވާ ކަމަށް ތުހުމަތުކުރައްވައި، އެތަނުން ކުރި ދިރާސާތަކުގެ ތަފްސީލު ދިނުމަށް ވެސް ތޯރިގު ވަނީ އެދިވަޑައިގެންފަ އެވެ. މީގެ އިތުރުން އިންޑިއާ ސަރުކާރުގެ އެހީގައި ހިންގާ ތަރިކަ ރައްކާތެރިކުރުމުގެ މަޝްރޫއުތަކުގެ އަދާހަމަ ހޯދުމަށް ވެސް އޭނާ ވަނީ ސުވާލު ކުރައްވާފަ އެވެ.
މުހައްމަދު ތޯރިގަކީ ކުރީގެ ރައްޔިތުންގެ މަޖިލީހުގެ މެންބަރުކަން ކުރެއްވުމުގެ އިތުރުން، ކުރީގެ ސަރުކާރުގައި ހެރިޓޭޖް މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވާފައިވާ ބޭފުޅެކެވެ. އޭނާ ވިދާޅުވީ މިއީ ސާފުކުރަން ބޭނުންވާ ކަންކަމުގެ ކުޑަ މިންވަރެއް ކަމަށާއި، މީގެ ކުރިން މަޖިލީހަށާއި މައުލޫމާތު ހޯދައި ލިބިގަތުމުގެ ހައްގުގެ ދަށުން ހުށަހެޅި ކަންކަމަށް ދީފައިވާ ޖަވާބުތައް ބައްލަވާލެއްވުމަށް އާ ވަޒީރުގެ ކިބައިން އެދިވަޑައިގަންނަވާ ކަމަށެވެ.
