ދިރުވާލައިގެން 108 ކޮކެއިން ބުލެޓް ރާއްޖެ އެތެރެކުރި ގާނާ މީހަކު 12 އަހަރަށް ޖަލަށް ލުމަށް ކްރިމިނަލް ކޯޓުން ބުދަ ދުވަހު ހުކުމް ކޮށްފި އެވެ.
އައްޕިއަހް ޖޭމްސް ނަމަކަށް ކިޔާ އެ މީހާގެ މައްޗަށް ދައުވާ ކުރީ ޖަދުވަލު އެކެއްގައިވާ މަސްތުވާއެއްޗެއް ރާއްޖެއަށް އެތެރެ ކުރުމުގެ ކުށުގެ ދައުވާ އެވެ.
ގަތަރު އެއާވޭސްގެ ފްލައިޓަކުން ޖޫން 12، ގައި ރާއްޖެ އައި އެ މީހާ ހައްޔަރުކުރީ ކަސްޓަމު އޮފިސަރުންނަށް ޝައްކު ކުރެވޭ ކަންތައްތަކެއް ފާހަގަ ކުރެވިގެން ސްކޭން ކުރިއިރު ދިރުވާލައިގެން މަސްތުވާތަކެތި އެތެރެ ކޮށްފައިވާ ކަމަށް ޝައްކު ކުރެވިގެން، އައިޖީއެމްއެޗްއަށް ގޮސް ހެދި އިތުރު ސްކޭންތަކަށްފަހު އެވެ.
ފުލުހުންގެ ބެލުމުގެ ދަށުގައި އައްޕިއަހް ޖޭމްސް ހުއްޓައި އެކި ފަހަރު މަތިން ބޮޑު ކަމު ދިޔަ ތަކެތިން ފެނިފައިވާ 108 ބުލެޓުގެ ބަރުދަނުގައި 1.4 ކިލޯގެ ކޮކެއިން ހުރި ކަމަށް ތަހުލީލު ރިޕޯޓްތަކުން ދެއްކި އެވެ.
ދައުލަތުގެ ފަރާތުން އައްޕިއަހް ޖޭމްސްގެ މައްޗަށް ކުރި މަސްތުވާއެއްޗެއް ރާއްޖެއަށް އެތެރެކުރި ކަމުގެ ދައުވާއަށް އޭނާ އިއުތިރާފުވުމުން، ދައުލަތާ އެކު އޭނާ ވަނީ އިއުތިރާފްގެ އެއްބަސްވުމެއް ހަދައިފަ އެވެ.
އިއުތިރާފް އެއްބަސްވުމުގެ ދަށުން އޭނާގެ މައްޗަށް އަދަބެއްގެ ގޮތުގައި ކަނޑައެޅީ 12 އަހަރާއި ހަ މަސް ދުވަހަށް ޖަލަށް ލުމަށް ހުކުމްކޮށް، 100،000ރ. އިން ޖޫރިމަނާ ކުރުމެވެ.
އައްޕިއަހް ޖޭމްސް ތަހުގީގުގެ މުއްދަތަށް ބަންދުގައި ހުރި ހަތަރު މަހާއި 10 ދުވަސް އުނި ކުރުމަށްފަހު އޭނާގެ މައްޗަށް އިއްވީ 12 އަހަރާއި އެއް މަހާއި 20 ދުވަހުގެ ޖަލު ހުކުމެކެވެ.
