އެސިސްޓެންޓް ކޮމިޝަނާ އޮފް ޕޮލިސް އަހުމަދު ޝިފާންގެ މަގާމަށް ބަދަލު ގެނައީ މައްސަލައެއް އޮވެގެން ނޫން ކަމަށާއި ފުލުހުންގެ ތަރުޖަމާނުގެ މަގާމު ނުގެއްލޭ ކަމަށް އޭނާ ވިދާޅުވެއްޖެ އެވެ.
އޮނިގަނޑަށް ގެނައި ބަދަލެއްގެ ދަށުން ހެޑް އޮފް ދަ އޮފީސް އޮފް ދަ ކޮމިޝަނާގެ މަގާމުން، ހެޑް އޮފް ސާވިސް ޑިވެލޮޕްމަންޓް ޑައިރެކްޓަރޭޓުގެ މަގާމަށް ޝިފާން ބަދަލު ކޮށްފައިވާކަމަށް ފުލުހުން ބުނީ މިއަދު އެވެ.
ނަމަވެސް، މި ބަދަލަކީ މެސެޖިން ޕްލެޓްފޯމެއްގައި ހަދާފައި އިން ގްރޫޕެއްގައި ކުރި މުއާމަލާތަކާ ގުޅިގެން ޝިފާން އާމެދު ކޮމިޝަނާ އޮފް ޕޮލިސް އަލީ ޝުޖާއު ހިތްހަމަނުޖެހިގެން ގެންނެވި ބަދަލެއް ކަމަށް "އަދަދު" އަށް ވަނީ މައުލޫމާތު ލިބިފަ އެވެ. އެ ހަބަރު މި ނޫހުން ވާނީ ގެނެސްދީފަ އެވެ.
އެކަމަށް ރައްދު ދެއްވާ ޝިފާން ފޮނުއްވި މެސެޖެއްގައި ވިދާޅުވީ، އޭނާ މިހާރު ހުންނެވީ ކޯހެއް ފުރިހަމަ ކުރުމަށް އިނގިރޭސިވިލާތުގައި ކަމަށާއި މިކަން ހިނގި ގޮތް ސާފުކޮށްދޭން ބޭނުންވާ ކަމަށެވެ. އެގޮތުން ފުލުހުންގެ އޮނިގަނޑަށް ބަދަލު ގެނައުމަކީ އާންމު ކަމެއް ކަމަށާއި އޭނާގެ މަގާމަށް ބަދަލު ގެނައީ އެއްވެސް މައްސަލައެއް އޮވެގެން ނޫން ކަމަށެވެ.
އަދި، ފުލުހުންގެ ތަރުޖަމާނުގެ މަގާމު އަދިވެސް އަދާކުރައްވާނީ އޭނާ ކަމަށް ވެސް ޝިފާން ވިދާޅުވި އެވެ.
މިކަމާ ގުޅިގެން މިއަދު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި ހޯމް މިނިސްޓަރު އަލީ އިހުސާން އާ ވަނީ ސުވާލުވެސް ކޮށްފަ އެވެ. ޖަވާބުގަައި އޭނާވެސް ވިދާޅުވީ ޝިފާނާ ގުޅޭ އެއްވެސް މައްސަލައެއް ނެތް ކަމަށެވެ.
