ވައިގެ މަގުން ރާއްޖެއަށް އެތެރެ ކުރި ކެނެބިސް ވޭޕް ޝިޕްމަންޓް މައްސަލައިގައި މިހާތަނަށް ވެސް މީހަކު ހައްޔަރު ނުކުރާ ކަމަށް ފުލުހުން މިއަދު ބުނެފި އެވެ.
ފުލުހުންގެ މީޑިއާ އޮފިޝަލް "އަދަދު" އަށް ވިދާޅުވީ މަސްތުވާތަކެތީގެ ބާވަތެއް ކަމަށްވާ "ޓީއެޗްސީ" އެކުލެވޭ އެ ވޭޕް އޮއިލް ރާއްޖެ އެތެރެ ކުރި މައްސަލަ ތަހުގީގު ކުރަމުން އަންނަ ކަމަށެވެ.
"އަދަދު" އަށް އެނގިފައިވާ ގޮތުގައި އެ ވޭޕް އޮއިލްތައް ބަލައި އެއާޕޯޓަށް ދިޔައީ ރާއްޖޭގައި ވޭޕް ވިއްކާ ފިހާރައެއްގެ ބިދޭސީ މުވައްޒަފެކެވެ. އަދި ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެއްގައި އެ ވޭޕް ފްލޭވާތައް ފިހާރައާ ހިސާބަށް ގެންދިޔުމަށްފަހު ވަނީ އަނބުރާ ފުލުހުންގެ ބެލުމުގެ ދަށަށް ގެންގޮސްފަ އެވެ.
ފުލުހުން ވޭޕް ވިއްކާ ފިހާރައާ ހިސާބަށް ވޭޕް އޮއިލްތައް ގެންދިޔައީ އެ ތަކެތި ގެނައި ފިހާރަ ކަށަވަރު ކުރުމަށް ކަމަށް ވެސް ވަނީ މައުލޫމާތު ލިބިފައިވެ އެވެ.
ވޭޕް އޮއިލްގެ އެ ޝިޕްމަންޓް އޮކްޓޯބަރު 14، ގައި ރާއްޖެ ގެނައުމުން އެތަކެތި ހިފެހެއްޓީ ވެލާނާ އިންޓަނޭޝަނަލް އެއާޕޯޓުން ކަސްޓަމުގެ އޮފިސަރުންނެވެ. މިގޮތުން، ކަސްޓަމުގެ އިތުރުން ފުލުހުން ހެދި ޓެސްޓުތަކުން އޭގައި ހުރި ވޭޕް އޮއިލްތައް ވަނީ ޓީއެޗްސީއަށް ޕޮޒިޓިވްވެފަ އެވެ.
މީގެކުރިން ފުލުހުން ހިންގާ އެފަދަ އޮޕަރޭޝަންތަކުގައި މަސްތުވާތަކެތި ކަމަށް ޝައްކު ކުރެވޭ ތަކެތި ބަލައި އެއާޕޯޓަށް ދާ މީހާ ނުވަތަ އެ ޝިޕްމަންޓަށް އޯޑަރު ކުރާ ފަރާތް ހޯދައި، މައްސަލަ ތަހުގީގު ކުރުމަށް ފުލުހުންގެ ބެލުމުގެ ދަށަށް ގެންދެ އެވެ.
ރާއްޖެއަށް ވޭޕްކުރުމަށް ބޭނުންކުރާ ތަކެއްޗާއި، އެ ތަކެތީގެ ވަކިވަކި ބައިތައް ނޮވެމްބަރު 15، އިން ފެށިގެން އެތެރެ ކުރުން މަނާކޮށް، ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، ރާއްޖޭގައި އިސްތިހާރު ކުރުމާއި ހިލޭބެހުން ޑިސެމްބަރު 15، އިން ފެށިގެން މަނާ ކުރުމަށް ރައީސް ޑރ. މުހައްމަދު މުއިއްޒު ވަނީ ނިންމަވާފަ އެވެ.
