ހުޅުމާލެ ދެވަނަ ފިޔަވަހީގެ ވިނަރެސް ފުލެޓުތައް ކައިރީ ޖުލައި 31، ގައި ހިނގި ނުރައްކާތެރި އެކްސިޑެންޓުގައި ކާރު ދުއްވި މީހާގެ މައްޗަށް ދައުލަތުން ހަ ދައުވާއެއް އުފުލައިފި އެވެ.
މި މައްސަލައިގައި ތިން މީހެއްގެ މައްޗަށް ދައުވާކުރުމަށް ފުލުހުންގެ ފަރާތުން ޕްރޮސެކިއުޓާ ޖެނެރަލް އޮފީހަށް ފޮނުވާފައިވެ އެވެ. އެއީ ހ. ނޫރަންމާގެ، އިކްރާމުއްރަހުމާން އާއި މ. ލޭންޑް އޮފް ގާޑަން އިބްރާހިމް އިކްރާމްގެ އިތުރުން ގއ. ކަނޑުހުޅުދޫ، އާޒާދުގެ، ޖިނާހު އިސްމާއީލް އެވެ.
ކާރު ދުއްވަން އިން އިބްރާހިމް އިކްރާމްގެ މައްޗަށް ދައުލަތުން ކުރާ ދައުވާތަކަކީ؛
- އަނިޔާއެއް ދިނުން
- މީހަކު ފަރުވާލެއްނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުން
- މުދަލަށް ގެއްލުން ދިނުން
- މުދަލަށް ގެއްލުން ދިނުން
- އެކްސިޑެންޓްވުމުން އެކަމުގެ ރިޕޯޓު ނުކުރުން
- އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުން
އޭގެއިތުރުން މި މައްސަލައިގައި އިކްރާމުއްރަހްމާންގެ މައްޗަށް ދައުލަތުން ކުރާ ދައުވާތަކަކީ:
- އެކްސިޑެންޓްވުމުން އެކަމުގެ ރިޕޯޓު ނުކުރުން
- އެހީއަށް ބޭނުންވެފައިވާ މީހާއަށް އެކަށީގެންވާ ސަބަބެއްނެތި އެހީތެރިކަން ފޯރުކޮށްނުދިނުން
- އަނިޔާއެއް ދިނުމުގައި ބައިވެރިވުން
- މީހަކު ފަރުވާލެއް ނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެ ކަމުގެ ބިރެއް ކުރިމަތިކުރުވުމުގައި ބައިވެރިވުން
- މުދަލަށް ގެއްލުން ދިނުމުގައި ބައިވެރިވުން.
- މުދަލަށް ގެއްލުން ދިނުމުގައި ބައިވެރިވުން.
މި މައްސަލައިގައި ދެން ދައުވާކުރާ ޖިނާހު އިސްމާއިލަށް ދައުލަތުން ކުރާ ދައުވާތަކަކީ:
- އަނިޔާއެއް ދިނުމުގައި ބައިވެރިވުން.
- މީހަކު ފަރުވާލެއްނެތި ކުރާ އަމަލެއްގެ ސަބަބުން މީހަކަށް އޭނާގެ ހަށިގަނޑަށް ބޮޑު އަނިޔާއެއް ލިބިދާނެކަމުގެ ބިރެއް ކުރިމަތިކުރުވުމުގައި ބައިވެރިވުން.
- މުދަލަށް ގެއްލުން ދިނުމުގައި ބައިވެރިވުން.
- މުދަލަށް ގެއްލުން ދިނުމުގައި ބައިވެރިވުން.
އެ އެކްސިޑެންޓް ހިނގައިފައިވަނީ ކާރު ކޮންޓްރޯލުން ނެެއްޓިގެން ގޮސް، މަގުގެ އެއްފަރާތެއްގައި ސައިކަލެއްގައި މަޑުކޮށްގެން އިން މީހެއްގެ ގައިގައި ޖެހިގެންނެވެ. އެވަގުތު ސައިކަލުގައި އިން މީހާ ވިއްސައިގެން ދާ މަންޒަރު ސޯޝަލް މީޑިއާގައި އާންމުވި ވީޑިއޯއިން ފެނެ އެވެ
މި ދައުވާތަށް ކުރުމަށް ފުލުހުންގެ ފަރާތުން ޕީޖީ އޮފީހަށް ފޮނުވާފައިވަނީ ސެޕްޓެމްބަރު 14 ގަ އެެވެ.
މި މައްސަލައިގެ އަޑުއެހުމެއް މިއަދު ތާވަލުކުރި ނަމަވެސް ފަހުން އިދާރާއިން ވަނީ އެ އަޑުއެހުން ކެންސަލްވެފައިވާ ކަމަށް އަންގައިފަ އެވެ. ނަމަވެސް, ކެންސަލް ކުރި ސަބަބެއް އިދާރާއަކުން ހާމައެއް ނުކުރެ އެވެ.
