މިދިޔަ އޮގަސްޓު މަސް ނިމުނުއިރު ބޭރު ފައިސާ ރިޒާވުގައި ހުރި ފައިސާ އިތުރުވުމަށް ފަހު، މި ނިމުނު މަހު ޖުމްލަ ރިޒާވާއި ބޭނުންކުރެވޭ ރިޒާވުގައި ހުރި ފައިސާ ވެސް ދަށަށް ގޮސްފައިވާ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ތަފާސްހިސާބުތަކުން ދައްކައިފި އެވެ.
މަރުކަޒީ ބޭންކު، އެމްއެމްއޭ އިން އާންމުކޮށްފައިވާ ތަފާސްހިސާބުތަކުން ދައްކާފައިވާ ގޮތުގައި މިދިޔަ މަހުގެ ނިޔަލަށް ގްރޮސް އިންޓަނޭޝަނަލް ރިޒާވުގައި ހުރީ 322 މިލިއަން ޑޮލަރެވެ. މިއީ އޭގެ ކުރީ މަހަށް ވުރެ 72 މިލިއަން ޑޮލަރު މަދު އަދަދެކެވެ.
ޖުމްލަ ރިޒާވުގައި ހުރި އަދަދުގެ ތެރެއިން ކަނޑަންޖެހޭ ބައިތައް ކެނޑުމުން ބޭނުންކުރެވޭ ރިޒާވުގައި ހުރީ 49 މިލިއަން ޑޮލަރެވެ. މިއީ އޮގަސްޓު ނިމުނުއިރު ބޭނުންކުރެވޭ ރިޒާވުގައި ހުރި 61 މިލިއަން ޑޮލަރަށް ވުރެ 12 މިލިއަން ޑޮލަރު މަދު އަދަދެކެވެ. މިއީ މަހެއްގެ ޒަރޫރީ އިމްޕޯޓަށް ބޭނުންވާ ވަރަށް ވުރެ މަދު، ކިރިޔާ ފަރުޖައްސައިލެވޭ ވަރުގެ ފައިސާ އެވެ.
މިދިޔަ މަސް ނިމުނުއިރު ރިޒާވު ދަށްވީ ނަމަވެސް، މި ހިނގާ މަހުގެ ތެރޭގައި ރިޒާވުގެ ހާލަތު ރަނގަޅު ކުރެވޭނެ ކަމަށް ބެލެވެ އެވެ. ސަބަބަކީ އެމްއެމްއޭ އިން ކުރިން ބުނި ގޮތަށް އިންޑިއާގެ ސެންޓްރަލް ބޭންކު، ރިޒާވު ބޭންކު އޮފް އިންޑިއާ (އާރުބީއައި) އިން ހަމަޖައްސަން އުޅުނު 400 މިލިއަން ޑޮލަރުގެ ކަރަންސީ ސްވޮޕް ފެސިލިޓީގައި އިއްޔެ ސޮއިކުރުމުންނެވެ.
ޑޮލަރު ސްވޮޕް ފެސިލިޓީގެ އިތުރުން ސާކުގެ ކަރަންސީ ސްވޮޕް ފްރޭމްވޯކްގެ ތެރެއިން އިންޑިއަން ރުޕީސް ފެސިލިޓީއެއްގައި ވެސް އިއްޔެ ސޮއިކޮށްފައިވެ އެވެ. އެއީ 30 ބިލިއަން އިންޑިއަން ރުޕީސްގެ ފެސިލިޓީއެކެވެ. އެމްއެމްއޭ އިން ބުނީ މި ފެސިލިޓީގެ ސަބަބުން ރާއްޖެ އާއި އިންޑިއާއާ ދެމެދު ކުރެވޭ ވިޔަފާރީގެ މުއާމަލާތްތައް އެ ގައުމަކަށް ނިސްބަތްވާ ފައިސާއިން ކުރުމަށް މަގުފަހިވެގެންދާނެ ކަމަށެވެ.
ރިޒާވުގެ ހާލަތު ރަނގަޅު ނުވާ ކަމުގައި ވަނީ ނަމަ، ރާއްޖެއިން އަދާކުރަން ޖެހޭ ދަރަނި އަދާނުކުރެވުމުގެ ހިރާސް ބޮޑު ކަމަށް ނިންމައި، ބޭރުގެ ރޭޓިން އެޖެންސީތަކުން ވަނީ ރާއްޖޭގެ ސޮވަރިން ކްރެޑިޓު ރޭޓިން ދަށްކޮށްފަ އެވެ.
