ރާއްޖެ އާއި އިންޑިއާއާ ދެމެދު މިއަދު ސޮއި ކުރި ކަރަންސީ ސްވޮޕް އެއްބަސްވުމުގެ ދަށުން ރާއްޖެއަށް 400 މިލިއަން ޑޮލަރު ނުވަތަ ޔޫރޯގެ އިތުރުން 30 ބިލިއަން އިންޑިއަން ރުޕީސް ލިބޭނެ ކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބުނެފި އެވެ.
އެމްއެމްއޭއިން ބުނީ އިންޑިއާއެކު ސޮއިކުރީ 400 މިލިއަން ޑޮލަރު/ޔޫރޯ އަދި 30 ބިލިއަން އިންޑިއަން ރުޕީސްގެ ކަރަންސީ ސްވޮޕް ފެސިލިޓީ އެއްބަސްވުމެއްގައި ކަމަށެވެ. އެ އެއްބަސްވުމުގެ ދަށުން ދެ ކަރަންސީ ވިންޑޯއަކުން އެމްއެމްއޭއަށް ސްވޮޕް ނެގުމަށް މަގުފަހިވާނެ ކަމަށް އެމްއެމްއޭއިން ބުނެ އެވެ.
އެމްއެމްއޭއިން ބުނީ އެ އެއްބަސްވުމުގެ ދަށުން އެކި ފަހަރު މަތިން ފައިސާ ނެގުމުގެ ފުރުސަތު ދިވެހިރާއްޖެއަށް އޮންނާނެ ކަމަށެވެ.
"ޑޮލަރު/ޔޫރޯ ސްވޮޕް ފެސިލިޓީއަކީ ކުރުމުއްދަތުގެ ފޮރިން އެކްސްޗޭންޖް ބޭނުންތަކަށް އެހީތެރިވާނެ ފިޔަވަޅަކަށް ވާހިނދު، އިންޑިއަން ރުޕީސް ސްވޮޕް ފެސިލިޓީ މެދުވެރިކޮށް އިންޑިއާ އާއި ދިވެހިރާއްޖެއާ ދެމެދު ކުރެވޭ ވިޔަފާރީގެ މުއާމަލާތްތައް އެގައުމަކަށް ނިސްބަތްވާ ފައިސާއިން ކުރުމަށް މަގުފަހިވެގެންދާނެ،" އެމްއެމްއޭއިން ބުނެފައިވެ އެވެ.
ކަރަންސީ ސްވޮޕް އެގްރިމެންޓުގައި މިއަދު ސޮއި ކުރީ ރައީސް ޑރ. މުހައްމަދު މުއިއްޒު މިވަގުތު އިންޑިއާއަށް ކުރައްވާ ދަތުރުގެ ތެރެއިންނެވެ. އިންޑިއާއަށް ފުރާވަޑައިގަތުމުގެ ކުރިން ވެސް، މާލީ އެހީތެރިކަން ލިބޭނެކަމުގެ އިތުބާރު އޮތް ކަމަށް ރައީސް ވަނީ ވިދާޅުވެފަ އެވެ.
އިންޑިއާގެ ބޮޑުވަޒީރު ނަރެންދުރަ މޯދީއާއެކު ބޭއްވި ރަސްމީ ވާހަކަތަކަށްފަހު ދެއްވި ސްޓޭޓްމަންޓުގައި ރައީސް މުއިއްޒު ވިދާޅުވީ، އިންޑިއާގެ ކަނޑުގެ ސަލާމަތަށް ރާއްޖޭގެ ހަމަޖެހުން ވެސް މުހިންމު ކަމަށާއި ހަމަ އެގޮތަށް އިންޑިއާއަކީ ވެސް އެ ކަނޑުގެ ސަލާމަތަށް މުހިންމު ގައުމެއް ކަމަށެވެ.
އޭގެ އިތުރުން ދެ ގައުމުން "ވިޝަން ޑޮކިއުމެންޓް" އަކަށް އެއްބަސްވެފައިވާ ކަމަށް ރައީސް މުއިއްޒު ވިދާޅުވި އެވެ. އޭގެ ބޭނުމަކީ އިގްތިސާދީ ގޮތުން ގުޅުން ބަދަހި ކުރުމާއި މެރިޓައިމް ސެކިއުރިޓީގެ ދާއިރާއިން ގުޅުން ބަދަހި ކުރުން ކަމަށް ރައީސް ވިދާޅުވި އެވެ.
"އޭގެ ތެރޭގައި ތަރައްގީއަށް ކުރާ މަސައްކަތްތަކަށް އެއްބާރުލުން ދިނުމާއި ވިޔަފާރި އަދި އިގްތިސާދީ ގޮތުން ގުޅުން ބަދަހި ކުރުމާއި ޑިޖިޓަލް އާދީ މާލީ އިނިޝިއޭޓިވްސްތަކާއި އެނާޖީ ޕްރިޖެކްޓްސްތަކާއި ހެލްތުގެ ދާއިރާއިން ގުޅުން ބަދަހި ކުރުމާއި މެރިޓައިމް އަދި ސެކިއުރިޓީގެ ދާއިރާއިން ގުޅުން ބަދަހި ކުރުން ހިމެނޭ،" ރައީސް ވިދާޅުވި އެވެ.
އިންޑިއާއާއެކު އިތުރަށް ގުޅުން ބަދަހި ކުރަން މަސައްކަތް ކުރަމުންދާކަން ފާހަގަ ކުރައްވައި، ރައީސް މުއިއްޒު ވިދާޅުވީ، އެ މަސައްކަތުގެ ތެރޭގައި ދެ ގައުމުގެ ވެރިން އެއް ގައުމު އަނެއް ގައުމަށް ޒިޔާރަތް ކުރުން ވެސް ހިމެނޭ ކަމަށެވެ.
ރައީސްގެ ވާހަކައިގައި އިތުރަށް ވިދާޅުވީ، އިންޑިއާއަކީ ރާއްޖޭގެ ތަރައްގީއަށް ވަރަށް މުހިންމު ގައުމެއް ކަމަށެވެ. އަދި ރާއްޖެއިން ބޭނުންވާ ކޮންމެ ކަމެއްގައި ވެސް އިންޑިއާއިން އޮންނަނީ އެހީތެރިވާން ތައްޔާރަށް ކަމަށް ވެސް ރައީސް މުއިއްޒު ވިދާޅުވި އެވެ.
ފަތުރުވެރިކަމަކީ ރާއްޖެއަށް މުހިންމު ސިނާއަތެއްކަން ފާހަގަ ކުރައްވައި ރައީސް ވިދާޅުވީ، އިންޑިއާގެ ފަތުރުވެރިން ރާއްޖެ އަންނަ އަދަދު އިތުރުވާނެ ކަމަށް އެމަނިކުފާނު އުއްމީދު ކުރައްވާ ކަމަށެވެ. އޭގެ ސަބަބުން ވެސް ދެ ގައުމުގެ ދެމެދުގައި އޮތް ގުޅުން ބަދަހިވާނެ ކަމަށް ރައީސް ވިދާޅުވި އެވެ.
