ޖަލުގައި ބަންދުކޮށްފައި ތިބޭ މީހުން މަރުވުމުގެ ހާދިސާތައް ތަކުރާރުވަމުން ދާތީ އިދިކޮޅު އެމްޑީޕީން ކަންބޮޑުވުން ފާޅުކޮށްފި އެވެ.
އެ ޕާޓީން މިއަދު ނެރުނު ނޫސްބަޔާނެއްގައި ބުނީ މާފުށީ ޖަލުގައި 62 އަހަރުގެ މީހަކު އަމިއްލައަށް މަރުވީ، އަންހެނެއްގެ ކަރުގައި ވަޅި ޖައްސައިގެން ބިރު ދެއްކި އާދަމް އަތުހަރު، 32, ފުލުހުންގެ ބެލުމުގައި ދަށުގައި ހުއްޓައި އަމިއްލައަށް މަރުވި މައްސަލައިގެ ފުރިހަމަ ތަހުގީގެއް ހިންގުމަށާއި އެފަދަ ކަމެއް ތަކުރާރު ވިޔަ ނުދިނުމަށްޓަކައި ފިޔަވަޅުތައް އެޅުމަށް ގޮވާލާފައި އޮއްވައި ކަމަށް ވާތީ އިންތިހާއަށް ކަންބޮޑުވާ ކަމަށެވެ.
އެމްޑީޕީގެ ބަޔާނުގައި ބުނީ މާފުށީ ޖަލުގައި ހުއްޓައި މިއަދު އަމިއްލައަށް މަރުވި މީހާގެ، މަރުގައި ވެސް ޖަލު ބެލެހެއްޓުމާއި އެކަށީގެންވާ ފިޔަވަޅު އެޅުމުގައި އިހުމާލުވެފައިވާ ކަމަށް ގަބޫލު ކުރެވޭ ކަމަށެވެ.
"ދައުލަތުގެ ބެލުމުގެ ދަށުން ބަންދުގައި ހުންނަ ކޮންމެ މީހެއްގެ ސަލާމަތާއި ރައްކާތެރިކަން ކަށަވަރު ކުރުމަކީ ގާނޫނީ ގޮތުން ސަރުކާރުގެ މައްޗަށް ލާޒިމު ކަމެއް ކަމަށްވާއިރު، އަދި ދާދިފަހުން މި ބާވަތުގެ އެހެން ހާދިސާއެއް ހިނގާފައިވާއިރު، މި ގައިދީ (މިއަދު މަރުވި މީހާ) ޖަލު ގޮޅީގައި ހަރަކާތްތެރިވަމުން ދިޔަ ގޮތް ރަނގަޅަށް ބަލައި އެކަށީގެންވާ ވަގުތުގައި ފިޔަވަޅު އެޅުމުގައި އިހުމާލުތަކެއް އޮތް ކަމަށް މި ޕާޓީއަށް ގަބޫލު ކުރެވޭ،" އެމްޑީޕީގެ ބަޔާނުގައި ބުންޏެވެ.
މާފުށީ ޖަލުގައި ބަންދުކޮށްފައި ހުއްޓައި މިއަދު އަމިއްލައަށް މަރުވީ ޖިންސީ ގޯނާގެ މައްސަލައެއްގައި ޝަރީއަތް ނިމެންދެން ބަންދުކޮށްފައި ހުރި މީހެކެވެ. އޭނާ މަރުވީ ބެޑްޝީޓެއް ބޭނުން ކޮށްގެން ދަންޖެހިގެން ކަމަށް ސަރުކާރުގެ އޮފިޝަލަކު "އަދަދު" އަށް ކަށަވަރު ކޮށްދިނެވެ.
އޭނާ މަރުވިއިރު، އެ ގޮޅީގައި އިތުރު މީހަކު ނެތް ކަމަށް އެ އޮފިޝަލް މައުލޫމާތު ދިނެވެ. އެ މައްސަލަ ފުލުހުން ގެންދަނީ ތަހުގީގު ކުރަމުންނެވެ.
އެމްޑީޕީން ނެރުނު ބަޔާނުގައި ބުނީ ޖަލު ބަންދުގައި ހުރި މީހަކު އަމިއްލައަށް މަރުވުމުގައި ދައުލަތުގެ މުއައްސަސާތަކުގް އިހުމާލު އޮތް ކަމަށް ގަބޫލު ކުރުމުގެ ޖާގަ އޮތްއިރު، މިކަމުގައި މިނިވަން ތަހުގީގެއް ހިންގައި އެ ތަހުގީގު އާންމު ކުރަން ގޮވައިލާ ކަމަށެވެ.
އެ ތަހުގީގުގެ މައްޗަށް ބިނާކޮށް އެފަދަ ހާދިސާތައް ތަކުރާރު ނުވާނެ ފަދަ ގޮތަކަށް ފިޔަވަޅުތައް އެޅުމަށް ހުރިހާ އިދާރާއަކަށް އެމްޑީޕީން ގޮވާލާފައިވެ އެވެ.
މިމަހުގެ ކުރީކޮޅު، އާދަމް އަތުހަރު ދަންޖެހި އަމިއްލައަށް މަރުވީ ފުލުހުން ބަލަހައްޓަމުންދާ ދޫނިދޫ ޖަލުގައި ހުއްޓަ އެވެ. އޭނާ ދަން ޖެހެން ބޭނުން ކުރީ ލައިގެން ހުރި ސޯޓުގެ ނާޑުވަ އެވެ. ނާޑުވާ ފަދަ ތަކެތި ޖަލު ގޮޅިއަށް ވެއްދުމަކީ ގަވާއިދުގައި މަނާ ކަމެކެވެ.
އަތުހަރުގެ ޖަލު ގޮޅިއަށް ނާޑުވާއެއް ވެއްދި ގޮތެއް ފުލުހުން އަދިވެސް ހާމައެއް ނުކުރެ އެވެ. އަންހެނެއްގެ ކަރުގައި ވަޅި ޖައްސައިގެން ހުއްޓާ މުގުރަކުން ބޮލުގައި ޖެހުމުން އަތުހަރަށް ލިބުނު އަނިޔާތަކަށް އެކަށީގެންވާ ފަރުވާއެއް ނުލިބެނީސް އޭނާ ޖަލު ގޮޅީގައި ބަންދު ކޮށްފައި ހުރި މައްސަލައިގައި ވެސް ފުލުހުންނަށް ފާޑުކިޔުން އަމާޒުވެފައިވެ އެވެ.
އަތުހަރުގެ މަރުގެ މައްސަލައިގައި ފުލުހުންގެ އިހުމާލެއް އޮތްތޯ ބެލުމަށް އެޗްއާރުސީއެމުން ގެންދަނީ ތަހުގީގެއް ހިންގަމުންނެވެ.
