ބާޒާރުގައި ފިޔާގެ އަގު ބޮޑުވެ، ކިލޯއެއްގެ އަގު 60ރ. އަށް އަރައިފި އެވެ.
ބާޒާރުގައި އެކި ތަންތަނުގައި މިއަދު ފިޔާ ކިލޯއެއްގެ އަގު 50ރ. އާއި 60ރ. އާ ދެމެދު ހުރިއިރު، 25 ކިލޯގެ ބަސްތާއެއްގެ އަގު ހުރީ 900ރ. އަށްވުރެ މަތީގަ އެވެ.
ބާޒާރުން ވާހަކަ ދެއްކި މީހަކު "އަދަދު" އަށް ބުނީ ފިޔާ ބަސްތާތައް ހޯލްސޭލްކުރާ ގިނަ ތަންތަނުން ހުސްވަމުންދާ ކަމަށާއި ބައެއް ތަންތަނުން ބަސްތާ ނުލިބުމުގެ ސަބަބުން ފިޔާގެ އަގު އިތުރަށް ބޮޑުވާނެ ކަމަށް ވެސް ބެލެވޭ ކަމަށެވެ.
"ފިޔާގެ އަގު ބޮޑުވެގެން އުޅެނީ އިންޑިއާއިން ފިޔާ ލިބޭ އަގު ބޮޑުވީމަ. ކުރިއަށް އޮތް ދުވަސްތަކުގައި ވެސް އަގު އުފުލޭނެ ކަމަށް ބެލެވޭ،" ބާޒާރުން ވާހަކަ ދެއްކި ވިޔަފާރިވެރިޔަކު ބުންޏެވެ.
ބާޒާރުގައި ފިޔާ ކިލޯއެއްގެ އަގު މީގެ ދެ ހަފްތާއެއްހާ ދުވަސް ކުރިން 25ރ. އާއި 30ރ. އާ ދެމެދު ހުރިއިރު ފިޔާ ބަސްތާއެއްގެ އަގު ހުރީ 500ރ. އަށްވުރެ މަތީގަ އެވެ.
ބާޒާރުން ވާހަކަ ދެއްކި އިތުރު ވިޔަފާރިވެރިޔަކު "އަދަދު" އަށް ބުނީ ތަކެތީގެ އަގު އެވްރެޖުކޮށް ބޮޑުވެފައިވާ ކަމަށާއި މިހާރު ބައެއް ތަކެތީގެ އަގު ހުރީ ރޯދަ މަހު ވެސް ނުއުފުލޭ ވަރަށްވުރެ ބޮޑުވެފައި ކަމަށެވެ.
ބާޒާރުގައި ލުނބޯ އަދި ލޮނުމެދު ކިލޯއެއްގެ އަގު 60ރ. އަށް ހުރިއިރު އިނގުރު ކިލޯއެއްގެ އަގު ހުރީ 50ރ. އަށެވެ. އަދި ކެރެޓް ކިލޯއެއްގެ އަގު 30ރ. އަށް ހުރިއިރު ކެބެޖް ކިލޯއެއްގެ އަގު ހުރީ 40ރ. އަށެވެ.
އޭގެއިތުރުން ބީންސް ކިލޯއެއްގެ އަގު 80ރ. އަށް ހުރިއިރު ކެޕްސިކަމް ކިލޯއެއްގެ އަގު ހުރީ 75ރ. އަށެވެ. އަދި ލީކްސް ކިލޯއެއްގެ އަގު ހުރީ 90ރ. އަށެވެ.
ފަތްޕިލާވެއްޔަށް ބަލާއިރު ލެޓިއުސްގެ އަގު 100ރ. އަށްވުރެ މަތީގައި ހުރިއިރު ކޮޕީފަތް ހަތަރު ފަތުގެ ބޮނޑިއެއް ލިބެން ހުރީ 10ރ. އަށެވެ. އަދި ކަންކުން ދެ ބޮނޑި ލިބެން ހުރީ 15ރ. އަށެވެ.
މޭވާއަށް ބަލާއިރު ކަރާ ކިލޯއެއްގެ އަގު 25ރ. އާއި 30ރ. އާ ދެމެދު ހުރިއިރު މެންޑަރިން ކިލޯއެއްގެ އަގު ހުރީ 70ރ. އަށެވެ. ފަޅޯ އަދި ދޮންކެޔޮ ކިލޯއެއް ލިބެން ހުރީ 50ރ. އާއި 60ރ. އަށެވެ.
