ސައިކަލެއްގެ މަޑި ދަށުން 442،275ރ. ވަގަށް ނެގި ބިދޭސީއަކު ފުލުހުންގެ ބެލުމުގެ ދަށަށް ގެނެސްފި އެވެ.
ބަންގްލަދޭޝްއަށް ނިސްބަތްވާ ޖަހަންގިރު އާލަމް 45، ފުލުހުން ބުނި ގޮތުގައި މިދިޔަ ބުރާސްފަތި ދުވަހު ހައްޔަރުކުރީ ކޯޓު އަމުރެއްގެ ދަށުންނެވެ.
އެ މައްސަލައާ ގުޅިގެން ހުކުރު ދުވަހު ކްރިމިނަލް ކޯޓުން ވަނީ އޭނާގެ ބަންދަށް 15 ދުވަސް ޖަހައިދީފަ އެވެ.
ކްރިމިނަލް ކޯޓުގެ އަމުރުގައިވާ ގޮތުން ތުހުމަތު ކުރެވޭ ކޮންމެ ވެސް މިންވަރަކަށް ހެކި ގަރީނާ ފުލުހުން ހުށަހަޅާފައިވެ އެވެ. އެގޮތުން އަނިޔާ ލިބުނު ފަރާތުގެ ބަޔާނާއި، ސީސީޓީވީ ފުޓޭޖާއި އެއާގުޅޭ ސްނެޕްޝޮޓް ހުށަހަޅާފައިވާ ކަމަށް ވެސް ކޯޓު އަމުރުގައި އޮތެވެ.
ފުލުހުން ގެންދަނީ އެ މައްސަލަ އިތުރަށް ތަހުގީގު ކުރަމުންނެވެ.
ގަވާއިދާ ހިލާފަށް އުޅޭ ބިދޭސީންނާ ދެކޮޅަށް ފުލުހުންނާއި އިމިގްރޭޝަން އަދި ކަމާ ބެހޭ އިދާރާތައް ގުޅިގެން އަންނަނީ ބޮޑު އޮޕަރޭޝަނެއް ހިންގަމުންނެވެ.
އެ އޮޕަރޭޝަނުގެ ދަށުން ގަވާއިދާ ހިލާފަށް އެކި އަމަލުތައް ހިންގާ ބިދޭސީ އަންނަނީ ވަގުތުން ޑީޕޯޓް ކުރަމުންނެވެ.
