ޓެލެގުރާމު ޗެނަލްތަކެއް މެދުވެރިކޮށް ބަރަހަނާ މަންޒަރުތައް ފެންނަ ފޮޓޯތަކާއި ވީޑިއޯތައް ދައުރުކޮށް، އެކަމުން ދެމިލިޔަން ރުފިޔާ ހޯދި ބަޔަކު ހައްޔަރުކޮށްފި އެވެ.
ފުލުހުން ބުނި ގޮތުގައި އެ މީހުން ހައްޔަރުކުރީ ފުލުހުންގެ ސައިބާ ކްރައިމް ސެންޓަރުން ހިންގި އޮޕަރޭޝަނެއްގަ އެވެ. އެ މައްސަލާގައި ހައްޔަރުކުރީ ޒުބައިރު އަލީ 45އ، ބަހާރުގެ، އދ.މަހިބަދޫ އާއި ނާސިފް އަލީ 46އ، ދަފްތަރު ނަންބަރު ރސ14751، ކ.މާލެ އަދި އިސްމާއިލް ރަބީހު 29އ، ސިލިންކޯ، ކ.ކާށިދޫ އެވެ.
އެމީހުން ހިންގި ޓެލެގްރާމް ޗެނަލްތަކަށް އެޅި ފޮޓޯތަކާއި ވީޑިއޯތައް ބަލަން 3468 މީހުން ސަބްސްކްރައިބް ކޮށްފައިވާ ކަމަށް ވެސް ފުލުހުުން ބުންޏެވެ.
އެ މީހުން ޖުމުލަ ނުވަ އެކައުންޓެއް ހަދައިފައިވާއިރު ، އެ އެކައުުންޓްތައް ހިމެނޭ ގޮތުން، ބަރަހަނާ ފޮޓޯތަކާއި ވީޑިއޯތައް ދައުރުކުރި 571 ޗެނަލެއް ވަނީ ފުލުހުންގެ ބެލުމުގެ ދަށަށް ގެނެސްފަ އެވެ. އެ ޗެންލަތަކުން 241،651 ފޮޓޯއާއި 86،618 ވީޑިއޯ ދައުރުކޮށްފައި ވާއިރު އޭގެ ތެރޭގައި 18 އަހަރުން ދަށުގެ ކުޑަކުދިންގެ ފޮޓޯ އާއި ވީޑިއޯ ވެސް ހިމެނެ އެވެ.
ފުލުހުން ބުނި ގޮތުގައި ހައްޔަރުކުރި ތިން މީހުންނަކީ ވެސް އެކިފަހަރު މަތިން ބަންދުކުރުމަށް ކޯޓަށް ގެންގޮސްފައިވާ މީހުންނެވެ. އޮގަސްޓް 30، ގައި ޒުބައިރު އަލީ ކޯޓަށް ހާޒިރުކުރުމުން އޭނާގެ ބަންދަށް ވަނީ 15 ދުވަސް ޖަހައިފަ އެވެ. ނާސިފް އަލީ އާއި އިސްމާއިލް ރަބީހު ސެޕްޓެންބަރު 5 ގައި ކޯޓަށް ހާޒިރުކުރުމުން އެމީހުންގެ ބަންދަށް ވެސް ވަނީ 15 ދުވަސް ޖަހައިފަ އެވެ.
އެ މީހުންގެ އަތުން 14 އިލެކްޓްރޯނިކް އާލާތް ފެނުނު ކަމަށާއި އެ ތަކެތި ބަލައި ފާސް ކޮށްފާނެވާ ކަމަށް ވެސް ފުލުހުން ބުންޏެވެ.
މީސްމީޑިއާގައި މިގޮތަށް ފޮޓޯ އާއި ވީޑިއޯ ލީކްވެ ބްލެކްމޭލެގެ ޝިކާރައަކަށް ވެފައިވާ ފަރާތްތަކުން ފުލުހުންގެ ސައިބާ ކްރައިމް ސެންޓަރު ނަންބަރު 9136262 އަށް ގުޅާ މައުލޫމާތު ހިއްސާކުރުމަށް ފުލުހުން އެދެ އެވެ.
