އެފްއޭއެމްގެ ކުރީގެ ޓެކްނިކަލް ޑިރެކްޓަރު އަދި ފީފާ/އޭއެފްސީގެ އިންސްޓްރަކްޓަރު، އަހުމަދު ޝަރީފް (ޑުންގާ)އާ އެކު، ތިމަރަފުށީގެ އެންމެ އެކްޓިވް އެކެޑަމީ، ފުޓްބޯލް އެންހޭންސް އެކެޑަމީ އޮފް ތިމަރަފުށި (ފީޓް) އިން ގްރާސްރޫޓް އެންޑް އެލީޓް ކޯޗިން ކްލިނިކެއް ކުރިއަށްގެންގޮސްފި އެވެ.
މިދިޔަ މަހުގެ 24 ވަަނަ ދުވަހުން ފެށިގެން މި މަހު ތިން ވަނަ ދުވަހުގެ ނިިޔަލަށް، ތިމަރަފުށީގައި ކުރިއަށްދިޔަ މި ކޯޗިން ކްލިނިކަކީ ތ، އަތޮޅުގެ ރަށްތަކަށް ހުޅުވާލައިގެން ފީޓުން ކުރިއަށްގެންދިޔަ ޕްރޮގްރާމެކެވެ.
ރާއްޖޭގައި ހުރި އެންމެ ތަޖުރިބާކާރު އެއް އިންސްޓްރަކްޓަރު އަދި އައްޑޫގެ ފުޓްބޯޅަ ކުޅުންތެރިން، ރާއްޖޭގެ މަތީ ފަންތިއާ ހަމައަށް ގެނެސްދިނުމުގައި ފާހަގަކުރެވޭ މަސައްކަތެއް ކޮށްފައިވާ، ޑުންގާގެ ބެލުމުގެ ދަށުން ދިޔަ، މި ކޯޗިން ކްލިނިކްގައި ޖުމްލަ އެކު، ތ. އަތޮޅުގެ ހަތަރު ރަށަކުން ދެ ޖިންސުން، 16 ފަރާތަކުން ވަނީ ބައިވެރިވެފަ އެވެ.
އެ ގޮތުުން، ތިމަރަފުށްޓާއި ވޭމަންޑޫ، ކިނބިދޫ އަދި ހިރިލަންދޫ އިން ފުޓްބޯޅަ އަށް ޝައުގުވެރިވާ ފަރާތްތަކުން ބައިވެރިވި މި ކްލިނިކްގައި ހިމެނެނީ، 11 ފިރިހެން އަދި ފަސް އަންހެން ބައިވެރިންނެވެ.
ރާއްޖޭގައި ފުޓްބޯޅަ އާއި ފުޓްސަލް އަށް ކާމިޔާބު ރަށެއްގެ ގޮތުގައި މަޝްހޫރުކަން ހޯދާފައިވާ ތިމަރަފުށީގައި ފުޓްބޯޅައިގެ ކަންކަން ޕްލޭނެއްގެ ތެރެއިން ގެންދިއުމަށް އިސްނަގައި، ފީޓުން މަސައްކަތް ފެށީ މި އަހަރު އެވެ.
އެ ގޮތުން، ތިމަރަފުށީގައި ގްރާސްރޫޓު ލެވަލުން ފެށިގެން ކުޅުންތެރިންނަށް ދޭން ޖެހޭ ޓްރެއިނިންތައް ރަނގަޅަށް ގެންދިއުމާއި ދީނީ އަދި އަހުލާގީ ގޮތުން ރަނގަޅު ޖީލެއް ބިނާކުރުމަށް ބާރު އަޅައި މަސައްކަތްކުރާ އެކެޑަމީއެއްގެ ގޮތުގައި ކުރިއަށްގެންދާ ފީޓް ލޯންޗްކޮށްދިނީ ގައުމީ ފުޓްބޯޅަ ޓީމުގެ ކެޕްޓަން، ސަމޫހު އަލީ (ސަމުއްޓެ) އެވެ.
ދިވެހި ފުޓްބޯޅަ އަށް އެކި ގޮތްގޮތުން ހިދުމަތްކޮށްދީފައިވާ ޑުންގާއާ އެކު، ފީޓުން މި ކުރިއަށްގެންދިޔަ، ކޯޗިން ކްލިނިކަށް ގިނަ ފަރާތްތަކެއްގެ އެހީތެރިކަން ލިބިފައިވެ އެވެ. އެ ގޮތުން، ފީޓުން ވަނީ ތ. އަތޮޅު ކައުންސިލާއި ތ. އަތޮޅު ތައުލީމީ މަރުކަޒު، ތިމަރަފުށީ ކައުންސިލް، ތިމަރަފުށީ ސިއްހީ މަރުކަޒު އަދި ތ. އަތޮޅު ޕޮލިހުން ދިން އެއްބާރުލުން ފާހަގަކޮށްފަ އެވެ.
