ތައިލެންޑުގެ ވެރިރަށް ބެންކޮކްގައި އޯގަސްޓް، 4 ގައި މަރުވެފައި އޮއްވާ ފެނުނު ތ. ތިމަރަފުއްޓަށް ނިސްބަތްވާ މުއާވިޔަތު މޫސާގެ މަރާ ގުޅިގެން އާއިލާއިން ތުހުމަތުތަކެއް ކޮށްފި އެވެ.
މުއާވިޔަތުގެ އާއިލާއިން "އަދަދު" އާ ވާހަކަދެއްކި މީހަކު ބުނީ ހަށިގަނޑާ ހަވާލުވެ ފޮރިން މިނިސްޓްރީން އާއިލާއާ ހިއްސާކުރި މުއާވިޔަތުގެ ތިން ފޮޓޯއިން ފެންނަ ގޮތުގައި ޒަހަމްތަކެއް ހުރި ކަމަށާއި އެއް ފައި ނެތް ކަން ވެސް ފެނުނު މަންޒަރުތަކުން ފާހަގަކުރެވުނު ކަމަށެވެ.
"ބޮޑީ ހޮސްޕިޓަލުގެ ހޯލު ތެރެއަށް ނެރެފައި ހުއްޓާ ފޮނުވި ތިން ފޮޓޯއެއް މިނިސްޓްރީން. ފުރަތަމަ ފޮޓޯ ފޮނުވިއިރު އެއްވެސް ކަމެއް ފާހަގަ ނުވޭ. ނަމަވެސް ފޮޓޯތައް ފަހުން ރަނގަޅަށް ބަލާލިއިރު ވައަތު ފައެއް ނެތް. ދެން އިން ފޮޓޯ ފޮނުވާފައި އިނީ މޫނާ ވަރަށް ކައިރިން. މޫނާއި ކަރަށް ތޫނު އެއްޗަކުން ހަމަލާދީފައި ހުރިކަން ޔަގީން،" އެ މީހާ ބުންޏެވެ.
އެ ޝަކުވާތައް ފޮރިން މިނިސްޓްރީއާ ހިއްސާކުރުމުން އެއީ ޕޯސްޓްމޯޓަމް ހެދި ވަގުތު ލިބިފައި ހުރި ޒަހަމްތައް ކަމަށް ބެލެވޭ ކަމަށް ބުނެފައިވާ ކަމަށާއި ނަމަވެސް ޕޯސްޓްމޯޓަމް ހަދާއިރު ފައި ބުރިކޮށް މޫނާއި ކަރަށް އެގޮތަށް ޒަހަމްތައް ނުލިބޭނެ ކަމަށް އާއިލާއިން ތުހުމަތުކުރެ އެވެ.
ޕޯސްޓްމޯޓަމް ހަދާނީ މޭ ފަޅައިގެން އެތެރޭގައި ހުންނަ ގުނަވަންތައް ނަގައިގެންނެވެ. އެގޮތުން ޕޯސްޓްމޯޓަމް ރިޕޯޓްތައް ތައްޔާރުކުރާނީ އެ ގުނަވަންތައް ތަހުލީލުކޮށްގެންނެވެ.
މުއާވިޔަތުގެ ހަށިގަނޑު ފުރަތަމަ ފެނިގެން ނަގާފައިވާ ސީނުގެ ފޮޓޯ ތައިލެންޑް ފުލުހުން ފޮރިން މިނިސްޓްރީއާ ހިއްސާކުރި ނަމަވެސް، އެ ފޮޓޯ އާއިލާއާ ހިއްސާ ނުކުރާތީ އެކަމާ ވެސް އާއިލާއިން ޝަކުވާކުރި އެވެ. ފަހުން ފުލުހުން ގާތު އެދިގެން، އިތުރު ބަޔަކާ ހިއްސާނުކުރާ ގޮތަށް އާއިލާއަށް އެ ފޮޓޯ ދީފައިވެ އެވެ.
މިކަމާ ގުޅިގެން ފުލުހުން ބުނީ އެއީ ރާއްޖެއިން ބޭރުގައި ހިނގާފައިވާ މަރަކަށްވާތީ އެ މައްސަލަ ތަހުގީގު ކުރާނީ އެ ގައުމަކުން ކަމަށާއި ނަމަވެސް އާއިލާގެ ކަންބޮޑުވުންތަކެއް ހުރުމުން އެކަން ފުލުހުން ސާފުކުރަމުންދާ ކަމަށެވެ.
މުއާވިޔަތުގެ އާއިލާއިން ބުނާ ގޮތުގައި އޭނާ ތައިލެންޑަށް ދިޔައީ ނާންގައި އާއިލާއިން ޕާސްޕޯޓު ވެސް ފޮރުވާފައި އޮއްވާ މިދިޔަ މަހު ފަހުކޮޅު ކަމަށާއި ޕާސްޕޯޓު ހެއްދީ ވެސް ނޭގި ކައެވެ.
ޕާސްޕޯޓު ގެއްލިއްޖެނަމަ އާ ޕާސްޕޯޓެއް ހެއްދޭނީ ފުލުހުންނަށް މައްސަލަ ހުށަހަޅައި އެކަން ތަހުގީގު ކުރުމަށްފަހު، ފުލުހުން ދޭ ލިޔުމެއް އިމިގްރޭޝަނަށް ހުށަހަޅައިގެން ޖޫރިމަނާ ފައިސާ ވެސް ދައްކައިގެންނެވެ.
"ވަރަށް ކަންބޮޑުވޭ އެ ގޮތަށް މުއާވިޔަތު ގޮސް އެކަމެއް ހިނގީމަ. އާއިލާއިން ބޭނުންވޭ މުއާވިޔަތު އެތަނަށް ގެންދިޔަ ބައެއް ވެސް އެނގެން. ވަޒީފާއަކަށް ނުގޮސް ރަށުގައި އޭނާ އުޅުނީ. ޕާސްޕޯޓް ފޮރުވީ ގައުމުން ބޭރަށް ދާން އުޅޭ ވާހަކަ ދެއްކުމުން،" އާއިލާއިން ބުންޏެވެ.
މުއާވިޔަތުގެ ހަށިގަނޑު ޕޯސްޓްމޯޓަމް ހެދުމަށްފަހު ވަޅުލާފައި ވަނީ އޯގަސްޓް، 7 ގަ އެވެ. އެ މައްސަލަ ތައިލެންޑުގެ ފުލުހުން ދަނީ ތަހުގީގު ކުރަމުންނެވެ.
