ފިޗު ރޭޓިންސްއިން ރާއްޖޭގެ ކްރެޑިޓު ރޭޓިން ދަށްކުރުމާ ގުޅިގެން ރާއްޖޭން ވިއްކާފައިވާ 500 މިލިއަން ޑޮލަރުގެ ސުކޫކުން އިންވެސްޓަރުން އަތްދޫކޮށްލައި، މުޅި ދުނިޔޭގައި ވެސް ސުކޫކެއް ޑީފޯލްޓުވާ ފުރަތަމަ ގައުމަކަށް ރާއްޖެ ވުމުގެ ބިރު ބޮޑުވެއްޖެ އެވެ.
މާލީ ދާއިރާގެ ހަބަރުތައް ގެނެސްދޭ ބްލޫމްބާގާއި ފައިނޭންޝަލް ޓައިމްސްގައި ރިޕޯޓުކޮށްފައިވާ ގޮތުގައި މި ވަގުތު ރާއްޖޭގެ ސުކޫކު ޓްރޭޑު ކުރަމުންދަނީ ޑޮލަރަކަށް 66 ސެންޓު ރޭޓުގަ އެވެ. މި ސުކޫކު އޮގަސްޓު މަހުގައި ޓްރޭޑު ކުރަމުން ދިޔައީ 80 ސެންޓުން މަތީގަ އެވެ.
އިންވެސްޓަރުންގެ އިތުބާރު ގެއްލި މި މަހުގެ ތެރޭގައި މި ވަރަށް ސުކޫކުގެ އަގު ވެއްޓުމާ ގުޅިގެން މި ވަގުތު އެންމެ ދަށްކޮށް ޓްރޭޑު ކުރަމުންދާ ސުކޫކަކީ ރާއްޖޭގެ ސުކޫކު ކަމަށް، ބްލޫމްބާގުގެ އިމާޖިން މާކެޓްސް ސޮވަރިން ޓޯޓަލް ރިޓާން އިންޑެކްސްއާ ހަވާލާދީ އެ ނޫހުގައި ވެ އެވެ.
ފިޗުން ރާއްޖޭގެ ރޭޓިން "ސީސީސީ ޕްލަސް" އިން "ސީސީ" އަށް ދަށްކުރީ މިދިޔަ ހަފުތާގެ ތެރޭގަ އެވެ. މިއީ ފިޗުން ރާއްޖޭގެ ރޭޓިން ދެ މަސް ދުވަހުގެ ތެރޭގައި ދަށްކުރި ދެވަނަ ފަހަރެވެ. އަދި މިހާ ކައިރިކައިރީގައި ރޭޓިން ޑައުންގްރޭޑެއް ގެނައި ފުރަތަމަ ފަހަރެވެ.
ރާއްޖޭގެ ސުކޫކު ޓްރޭޑުކުރަމުންދާ އަގު: އަހަރު މެދުތެރޭގައި ސުކޫކުގެ އަގު ރަނގަޅުވުމަށް ފަހު ދަށްވީ ފިޗުގެ ރޭޓިންއާއެކީ -- ޗާޓު: ފްރެންފާޓު ސްޓޮކް އެކްސްޗޭންޖު
ފިޗުން ރާއްޖޭގެ ރޭޓިން ދަށް ކުރީ ދަރަނި ނުދެއްކުމުގެ ހިރާސް އިންތިހާއަށް ބޮޑުވެ، ޑިފޯލްޓު ވެދާނެ ކަމަށް ލަފާކޮށްފަ އެވެ. އޭގެ ފަހަތުގައި ފިޗުން ފާހަގަކުރި ސަބަބުތަކަކީ ބޭރު ފައިސާގެ ރިޒާވުތައް އިންތިހާއަށް ދަށްވުމާއި ކުރިއަށް އޮތް އަހަރުތަކުގައި ދައްކަން ޖެހޭ ބޮޑު ދަރަންޏެވެ.
މިހާރު ދަށް ރޭޓުގައި ޓްރޭޑު ކުރަމުންދާ ސުކޫކާ ގުޅުވާ، ފިޗުގެ ރޭޓިން ރިވިޝަންގައި ސަރުކާރުން މިހާރު ވިސްނާ ގޮތަށް މި ސުކޫކު ރީފައިނޭންސް ކުރެވިދާނެ ކަމާ މެދު ސުވާލު އުފައްދާފައިވެ އެވެ. ސަރުކާރުން ވިސްނަނީ މީގެން 200 މިލިއަން ރީފައިނޭންސް ކޮށްފައި، ބާކީ ސޮވަރިން ޑިވެލޮޕްމަންޓު ފަންޑުގައި ހުރި ފައިސާ ބޭނުންކޮށްގެން ދަައްކާށެވެ.
ފިނޭންސް މިނިސްޓްރީން އެންމެ ފަހުން އާންމުކޮށްފައިވާ ތަފާސްހިސާބުތަކުގައިވާ ގޮތުން، މިދިޔަ އަހަރުގެ ނިޔަލަށް ދައުލަތުގެ ދަރަނި، ގެރެންޓީ ދީފައިވާ ދަރަނި ހިމަނައިގެން ހުރީ ޖީޑީޕީގެ 122 ޕަސެންޓުގަ އެވެ. އެއީ އަށް ބިލިއަން ޑޮލަރެވެ. މީގެ ތެރޭގައި އެތެރެ އާއި ބޭރުގެ ބާޒާރަށް ސެކުއިރިޓީސް ވިއްކައިގެން ހޯދި ފައިސާ އާއި ބޭރުގެ މާލީ އިދާރާތަކުން ނަގާފައިވާ ލޯނުތައް ހިމެނެ އެވެ.
ރާއްޖޭން ދަރާފައިވާ ފައިސާގެ ބޮޑު އިންސައްތައެއް ހިއްސާކުރަނީ ޗައިނާ އާއި އިންޑިއާއިން ނަގާފައިވާ ދަރަންޏެވެ. ސަރުކާރުން އަންނަނީ މި ދެ ގައުމާ އެކީ ވެސް ދަރަނި ދެއްކުން ފަސްކޮށްދިނުމުގެ މަޝްވަރާތައް ކުރަމުންނެވެ.
މި ހުރިހާ ކަންބޮޑުވުންތަކެއް ހުރި ނަމަވެސް، ސަރުކާރުން ބުނަނީ ދައުލަތުގެ ހަރަދު ކުޑަކުރުމުގެ ސިޔާސަތުތައް ތަންފީޒުކުރަން ފަށައި، އާމްދަނީ އިތުރުކުރަން ފަށާފައިވާ މަސައްކަތްތައް ކޮޅެއް ޖެހުމުގައި ޖެހުމުުން ރޭޓިން މަތި ވާނެ ކަމަށެވެ. މަރުކަޒީ ބޭންކު، އެމްއެމްއޭއިން ވެސް ވަނީ މި މަހުގެ ތެރޭގައި ރިޒާވުގެ ހާލަތު ރަނގަޅު ވާނެ ކަމަށް ބުނެފަ އެވެ.
