ވިޔަފާރިތައް ރަޖިސްޓްރީކުރުމާއި، މުދާތައް އެތެރެކުރުމާއި އަދި އެހެނިހެން ހިދުމަތްތައްް އެއްް ފުރާޅެއްގެ ދަށުންކުރަން މަގުފަހިކޮށްދޭ ޓްރޭޑިއަން މިއަދު އިފްތިތާހުކޮށްފި އެވެ.
ހޮޓެލް ޖެންގައި ބޭއްވި ރަސްމިއްޔާތުގައި ޓްރޭޑިއަން އިފްތިތާހުކޮށްދެއްވީ ނައިބު ރައީސް ހުސައިން މުހައްމަދު ލަތީފެވެ.
ޓްރޭޑިއަންއަކީ ހުރިހާ ވިޔަފާރިވެރިންނަށް ބޭނުންވާ ހިދުމަތްތައްް އެއް ވިއުގައެއް ދަށުން ފޯރުކޮށްދިނުމަށް ތައްޔާރުކުރި ޕޯޓަލްއެކެވެ. މި ޕޯޓަލް މެދުވެރިކޮށް އެކިއެކި އިދާރާތަކުން ފޯރުކޮށްދެމުން އަންނަ ހިދުމަތްތައް ފަސޭހަކަމާއި އަވަސްކޮށް ވިޔަފާރިވެރިންނަށް ލިބިގެންދާނެ އެވެ.
މި ޕޯޓަލް މެދުވެރިކޮށް ހިދުމަތްތަކުން ގުޅޫވާލެވުނު އިދާރާތަކުގެ ތެރޭގައި މޯލްޑިވްސް ކަސްޓަމްސް ސާވިސް، މޯލްޑިވްސް ޕޯޓްސް ލިމިޓެޑްގެ އިތުރުން މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަން ހިމެނެ އެވެ. އަންނަ ނޮވެމްބަރުން ފެށިގެން މި ޕޯޓަލް ބޭނުންކުރަން ފަށާނެ އެވެ.
ޓްރޭޑިއަން ޕޯޓަލްގެ ސަބަބުން ވިޔަފާރިވެރިންނަށް ކުރިމަތިވާ ދަތިތަކަށް ހައްލު ލިބުމުގެ އިތުރުން އެ މީހުންގެ ވަގުތުތައް ސަލާމަތްވެ އަދި ހަރަދުތައް ވެސް ކުޑަވެގެން ދާނެ ކަމަށް މި ރަސްމިއްޔާތުގައި ވާހަކަދައްކަވަމުން ޓްރޭޑްނެޓް މޯލްޑިވްސްގެ މެނޭޖިން ޑިރެކްޓަރު ސައީދާ އުމަރު ވިދާޅުވި އެވެ.
ޓްރޭޑްނެޓް މޯލްޑިވްސްގެ ބްރޭންޑް އާކިޓެކްޓް ޝިނާޒް ސައީދު ޓްރޭޑިއަން އާއި ބެހޭގޮތުން ވާހަކަދައްކަމުން ވިދާޅުވީ މިކަމުގެ ސަބަބުން މަސައްކަތަށް ކުރިއެރުންތަކެއް ލިބިގެން ދާނެ ކަމަށެވެ. އަދި އަށް ދުވަހުން ފުރިހަމަ ވާ ޕްރޮސެސް ދެން ހަ ދުވަހުން ފުރިހަމަ ވާނެކަން ފާހަގަކޮށް އޭނާ އިތުރަށް ވިދާޅުވީ މިކަމުގައި 19 އެޖެންސީއަކާއި 17 ސިސްޓަމް އިންޓެގްރޭޓުކޮށްފައިވާ ކަމަށެވެ.
ޓްރޭޑިއަން އިފްތިތާހުކުރި ރަސްމިއްޔާތުގައި އިކޮނޮމިކް މިނިސްޓަރު މުހައްމަދު ސައީދާއި، ސިންގަލް ވިންޑޯ މަޝްރޫއަށް ފަންޑުކުރި އޭޝިއަން ޑިވެލޮޕްމެންޓް ބޭންކުގެ އިސްވެރިން ވެސް ބައިވެރިވެވަޑައިގެންނެވި އެވެ.
