ރައީސުލްޖުމްހޫރިއްޔާގެ ނައިބުގެ މަގާމުގައި ހުންނެވި ހުސައިން މުހައްމަދު ލަތީފު އެ މަގާމުން ވަކިކުރަން އުޅޭ ކަމަށް ބުނެ ދެކެވެމުންދާ ވާހަކައިގައި އެއްވެސް ހަގީގަތެއް ނެތް ކަމަށް ވިދާޅުވެ އެ ވާހަކަތައް ރައީސް މުހައްމަދު މުއިއްޒު ދޮގު ކުރައްވައިފި އެވެ.
އިއްޔެ ރައީސް އޮފީހުގައި ބޭއްވި ނޫސްވެރިންގެ ބައްދަލުވުމެއްގައި ނޫސްވެރިޔަކު ސުވާލު އަމާޒުކުރީ މަޖިލީހުގެ ނައިބު ރައީސްގެ މަގާމުން އަހުމަދު ނާޒިމް ވަކިކުރުމަށް ފަހު ރައީސުލްޖުމްހޫރިއްޔާގެ ނައިބުގެ މަގާމުން ވަކިކުރަން އުޅޭ ކަމަށް ބުނެ ޕީޕަލްސް ނެޝަނަލް ފްރޮންޓް (ޕީއެންއެފް) ގެ ޕޯޑިއަމްގައި ދެއްކި ވާހަކައަކާ ގުޅޭގޮތުންނެވެ.
"ވީޕީ ހުސައިން މުހައްމަދު ލަތީފު ވަކިކުރާ ވާހަކައަކީ އެ ލެވެލްގެ ވާހަކައެއް. ދެން ކޮބާތޯ ކޯއްޗެއް ކްރިއޭޓް ކުރަންތޯ މި އުޅެނީ. މިއީ ޕޮލިޓިކްސްއެއް ވެސް ނޫނެއްނު، ޑާޓީ ޕޮލިޓިކްސްއެއް ވެސް ނޫނެއްނު މިއީ، މުޅިން އެހެން ލެވެލްއެއްގެ ޕޮލިޓިކްސްއެއް، ޑެސްޕަރޭޓްނެސް ޓު ދަ މެކްސިމަމް،" މުއިއްޒު ވިދާޅުވި އެވެ.
އެއަށްފަހު މުއިއްޒު ވަނީ ދޮގު ހެދުމާ ގުޅޭގޮތުން ވާހަތަކެއް ދައްކަވައި އިދިކޮޅުގައި ޒިންމާދާރު ބަޔަކު ނެތް ކަމަށް ވިދާޅުވެފަ އެވެ. އިދިކޮޅުގައި ތިބި މީހުން ކުރަނީ "ގޮސިޕް" ކަމަށާއި މޫނަށް ރުލެއް ނާރުވައި ދޮގު ވާހަކަ ދެއްކޭނީ ވަރަށް ކުޅަދާނަވެގެން ކަމަށް މުއިއްޒު ވިދާޅުވި އެވެ.
"ގޮސިޕްގެ ވެސް އެއްވެސް ތާކުންތާކު ނުޖެހޭ، ބޭސްލެސް، އެއްވެސް ވަރެއްގެ ބޭސްއެއް ނެތް ވާހަކަ ދެއްކުން. އެ ލެވެލްގައި މި ތިބީ އަޅުގަނޑުމެން ގައުމު،" މުއިއްޒު ވިދާޅުވި އެވެ.
ދައުަލަތުގެ މަތީ މަގާމުތައް ފުރުއްވާފައިވާ ބޭފުޅުން ރެއާއި ދުވާލު ކުރާ ކަމަކީ އެފަދަ ވާހަކަތައް ފެތުރުން ކަމަށް މުއިއްޒު ވިދާޅުވި އެވެ.
"އަޅުގަނޑުމެން ގައުމަކު ނެތް އޮޕޮޒިޝަނެއް، އެއީ ޔަގީންކަމެއް. އޮޕިޒިޝަނަކީ ޒިންމާދާރު ބަޔަކަށް ނުވަންޏާ އެއީ އޮޕޮޒިޝަނެއް ނޫން. އެހެންވީމާ ތި ވާހަކައިގައި ތެދު ވާހަކައެއް ނެތީމާ ތިއަށް ނެތް އިތުރަށް ދަންނަވާނެ ވާހަކައެއް."
މިހާރު ޕީއެންސީގެ އިސް ސަފުގައި ތިއްބެވި ގިނަ ބޭފުޅުންނަކީ މީގެކުރިން ކުރީގެ ރައީސް އަބްދުالله ޔާމީނާއެކު ސިޔާސީ މަސައްކަތް ކުރެއްވި ބޭފުޅުންނެވެ. އޭގެ ތެރޭގައި ނައިބު ރައީސް ހުސައިން އާއި މިހާރުގެ މަޖިލިސް ރައީސް އަބްދުއްރަހީމް އަދި ގިނަ ވަޒީރުން ހިމެނެ އެވެ.
ނަމަވެސް، މި ސަރުކާރާއެކު އެ ބޭފުޅުން މިހާރު ސިޔާސީ މަސައްކަތް ކުރައްވަނީ މުއިއްޒު އާއެކު އެވެ. ޔާމީންގެ ޕީއެންއެފް ހަރަކާތްތެރިވަނީ އިދިކޮޅު ޕާޓީއެއްގެ ގޮތުގަ އެވެ.
މި ސަރުކާރުގެ ތެރޭގައި ހިނގާ ކަންކަމުގެ ވާހަކަ އެންމެ ގަދައަށް ދެކެވެނީ ޕީއެންއެފްގެ ޕޯޑިއަމްތަކުގަ އެވެ. މަޖިލީހުގެ ނައިބު ރައީސްކަމުން ދިއްގަރު ދާއިރާގެ މެންބަރު އަހުމަދު ނާޒިމް ވަކިކުރަން އުޅޭ ވާހަކަތައް ވެސް އެންމެ ފުރަތަމަ ދެކެވުނީ ޕީއެންއެފްގެ ޕޯޑިއަމްތަކުގަ އެވެ.
އެ ވާހަކަތަކާ އެއްގޮތަށް ނާޒިމް ވެސް ވަނީ މަގާމުން ވަކިކޮށްފަ އެވެ. ނާޒިމްއާ ދައްކާނެ ވާހަކައެއް އަދި ކުރައްވާނެ މަޝްވަރާއެއް ވެސް ނެތް ކަމަށް މުއިއްޒު އިއްޔެ ވިދާޅުވި އެވެ.
