ކުޑަކުއްޖެއް ގައިގާ ޖަހައި މާރާމާރީ ހިންގި މައްސަލައެއްގައި އަންހެނަކު ހޯދަން ފުލުހުން އިއުލާންކޮށްފި އެވެ.
ފުލުހުން ބުނީ ގދ. ގައްދޫ ޕޮލިސް ސްޓޭޝަނުން ތަހުގީގު ކުރަމުންދާ އެ މައްސަލައިގައި ތަހުގީގަށް ފުލުހުން ހޯދަން އިއުލާންކުރީ ޝަފުރާ އަބްދުﷲ އާދަމް، ދިލާވަރުގެ، ގދ. ގައްދޫ އެވެ.
"އުޅޭ ވަކި ތަނެއް ނޭނގުމުގެ ސަބަބުން ތަހުގީގަށް ހާޒިރުވުމަށް ޗިޓު ރައްދު ކުރެވިފައި ނުވާތީ، ޖިނާއީ މައްސަލަތައް ތަހުގީގުކުރުމުގައި ފުލުހުން އަމަލުކުރާނެ އިޖުރާއަތުގެ ގަވާއިދުގެ 27 ވަނަ މާއްދާގައިވާ ގޮތުގެ މަތިން ތަހުގީގަށް ހާޒިރު ކުރަނީ،" ފުލުހުން ބުންޏެވެ.
ފުލުހުން އެދިފައި ވަނީ ސެޕްޓެމްބަރު، 2 ގެ ހެނދުނު 10:00 ޖަހާއިރަށް ސާޖަންޓް އާދަމް ހަލީލް ކްރިމިނަލް އިންވެސްޓިގޭޝަން ބިލްޑިން ނުވަތަ ގދ. ޕޮލިސް ސްޓޭޝަނަށް އޭނާ ހާޒިރުވުމަށެވެ.
ޝަރުފާ ހޯދަން އިއުލާންކުރީ ސީދާ ކޮން ކުއްޖަކަށް އަނިޔާކުރި މައްސަލައަކާ ގުޅިގެން ކަމެއް މިހާތަނަށް އެނގިފައެއް ނުވެ އެވެ.
ސޯޝަލް މީޑިއާގައި ދޭތެރެ ދޭތެރެއިން ކުޑަކުދިންނަށް އަނިޔާ ކުރުމުގެ މައްސަލަ ފެންމަތިވެ އެވެ. އެ މައްސަލަތައް ފުލުހުން ތަހުގީގު ވެސް ކުރެ އެވެ.
