އޮގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ)ގެ އިންޓަރނޭޝަނަލް އިސްލާމިކް ފިގުހު އެކަޑަމީގެ މެމްބަރަކަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު އައްޔަންކުރައްވައިފި އެވެ.
މީގެ ކުރިން އޯއައިސީގެ ސެކްރެޓަރީ ޖެނެރަލްގެ އެޑްވައިޒަރު ކަން ވެސް ކުރައްވާފައިވާ ޝަހީމް އެ ޖަމިއްޔާގެ ފިގުހު އެކަޑަމީގެ މެންބަރަކަށް އައްްޔަންކުރަން ނިންމީ މި މަހުގެ އަށްވަނަ ދުވަހު ބޭއްވި އެ އެކަޑަމީގެ އިދާރީ ބައްދަލުވުމެއްގަ އެވެ.
އޯއައިސީއަށް ވެސް ގިނަ ހިދުމަތްތަކެއް ކުރައްވާފައިވާ ޝަހީމަކީ ދުނިޔޭގެ އެންމެ ނުފޫޒު ގަދަ 500 މުސްލިމު ލީޑަރުންގެ ލިސްޓުގައި ވެސް ހިމެނޭ ބޭފުޅެކެވެ.
އިސްލާމިކް މިނިސްޓަރުގެ މަގާމު އެންމެ ގިނަ ސަރުކާރުގައި ފުރުއްވި ބޭފުޅަކަށް ޝަހީމް ވާނެ އެވެ. ރައީސް ޑރ. މުހައްމަދު މުއިއްޒުގެ މި ސަރުކާރުގެ އިތުރުން ކުރީގެ ރައީސް އަބްދުﷲ ޔާމީނާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި ވެސް އިސްލާމިކް މިނިސްޓަރު ކަން ކުރެއްވި އެވެ.
އަދި ކުރީގެ ރައީސް މުހައްމަދު ނަޝީދުގެ ވެރިކަމުގައި ފުރަތަމަ ފަހަރަށް ރާއްޖޭގައި އިސްލާމިކް މިނިސްޓްރީއެއް އެކުލަވައިލެވުނު އިރު އެ މިިނިސްޓްރީގެ ސްޓޭޓް މިނިސްޓަރަކަށް ޝަހީމް ހުންނެވި އެވެ.
މަދީނާ ޔުނިވާސިޓީން ތައުލީމު ހާސިލްކުރެއްވި ޝަހީމް ވަނީ ރާއްޖޭގެ މަތީ ތައުލީމުގެ ހިދުމަތް ފޯރުކޮށްދޭ ގިނަ މަރުކަޒުތަކުގައި ވެސް އިސް މަގާމުތައް ފުރުއްވައިފަ އެވެ. އެ ގޮތުން އިސްލާމިކް ޔުނިވާސިޓީގެ ޗާންސެލަރު ކަމާއި، ވިލާ ކޮލެޖުގެ ފެކަލްޓީ އޮފް ޝަރީއާގެ ޑީން ކަމުގެ އިތުރަށް ކީރިތި ޤުރްއާނާ ބެހޭ މަރުކަޒުގެ މުޝްރިފް މުސާއިދުގެ މަގާމު ވެސް އަދާ ކުރެއްވި އެވެ.
