މީގެ ގާތްގަނޑަކަށް ހަ އަހަރު ކުރިން، ރޭގަނޑުގެ ނާސްތާއަށް ބިސްގަނޑެއް އަޅައިނުދިނުމުން ހިނގައިދިޔަ ޒުވާބެއްގެ ތެރެއިން އދ. އެއްލައިދޫ ރިސޯޓުގެ ކައްކާއަކަށް ވަޅިން ހަމަލާދީ މަރާލި މައްސަލައިގައި ދައުލަތުން ހުށަހެޅި ގިނަ ހެކިވެރިން ތިބި ތަނެއް ނޭނގި މައްސަލަ ކުރިއަށް ގެންދިއުމުގައި ދަތިތަކެއް ކުރިމަތިވެއްޖެ އެވެ.
އެ މައްސަލައިގައި ދައުވާ ކުރަނީ ރިސޯޓުގައި މަސައްކަތް ކުރި ސްރީ ލަންކާގެ މުވައްޒަފެއް ކަމަށްވާ ޖަޔަލަތު ކޮޑިއާޗިގެ ޖަނަކަ ޕްރަސަންނަ ޕެރޭރާ، 42، ގެ މައްޗަށެވެ. އެ މާރާމާރީގައި މަރުވީ ހަމަ ސްރީ ލަންކާއަށް ނިސްބަތްވާ ޕަތުމް ދިލްޝަން ޑި ސިލްވާ އަގަމްޕޮޑި، 24، އެވެ. ހާދިސާ ހިނގީ މީގެ ތިން އަހަރު ކުރިން ޖެނުއަރީ 10، 2019 ގަ އެވެ.
މައްސަލަ މީގެ ކުރިން ވެސް އެކި ސަބަބުތަކާ ހުރެ ލަސްވަމުން ގޮސް، މިހާރު މައްސަލަ ހަވާލުކޮށްފައި ވަނީ މިދިޔަ އަހަރު ކްރިމިނަލް ކޯޓަށް އައްޔަންކުރި ގާޒީ އިބްރާހީމް އިހުސާންގެ ސެކްޝަނަށެވެ. އާ ގާޒީ ހަވާލުވި ފަހުން މައްސަލައިގެ ހެކިބަސް ނެގުމުުގެ މަރުހަލާ ފެށި ނަމަވެސް ގިނަ ހެކިން މިހާރު ތިބި ތަން ވެސް ސާފުނުވާތީ މައްސަލަ ލަސްވަމުންދާ ކަން ގާޒީ މިއަދުގެ އަޑުއެހުމުގައި ފާހަގަ ކުރެއްވި އެވެ.
މިހާތަނަށް ހެކިބަސް ނަގާފައިވަނީ ތަހުގީގުގައި ބައިވެރިވި ބައެއް ފުލުހުންގެ ހެކިބަހެވެ. މިއަދުގެ އަޑުއެހުމުގައި ވެސް ފުރަތަމަ ކުރިއަށް ގެންދިޔައީ ފޮރެންސިކް ތަހުލީލުގެ ތިން ރިޕޯޓެއް ތައްޔާރުކުރި ފުލުހެއްގެ ހެކިބަސް ނެގުމެވެ.
ހެކިބަސް ނަގައި ނިމުމުން، ގާޒީ އިހުސާން ވިދާޅުވީ ހުށަހެޅިފައިވާ ހެކިވެރިންގެ ތެރެއިން ހެކިބަސް ނެގެން ދެން އޮތީ އެންމެ ހެއްކެއްގެ ހެކިބަސް ކަމަށެވެ. އެއީ މައްސަލައިގެ ތަހުގީގުގައި ބައިވެރިވި ފުލުހެކެވެ. ދެން ހިމެނެނީ ރާއްޖޭން ބޭރު ބަޔަކަށް ވާއިރު އެ މީހުން ތިބި ތަނެއް ސާފުނުވާ ކަމަށް ގާޒީ ވިދާޅުވި އެވެ.
އޭގެ ތެރޭގައި ހިމެނެނީ އެއްލައިދޫ ރިސޯޓުގައި މަސައްކަތް ކުރި ސްރީލަންކާގެ ހަ މީހަކާއި އެއްލައިދޫ ރިސޯޓުގައި އެއިރު މަސައްކަތްކުރި އަދި މައްސަލައިގެ ތަހުގީގަށް މެޑިކަލް އެގްޒަމިން ރިޕޯޓް ތައްޔާރުކުރި ޑޮކްޓަރެވެ. ޑޮކްޓަރު ފިޔަވައި ދެން ހިމެނޭ ހަ މީހުން ރާއްޖޭން ފުރައިގެން ލަންކާއަށް ދިޔަ ކަން އެނގެން އޮތް ނަމަވެސް ލަންކާގައި ތިބި ކަމާއި ތިބިނަމަ ދިރިއުޅޭ އެޑްރެސް ނޭނގެ އެވެ.
ގާޒީ މި ކަންކަން ފާހަގަ ކުރެއްވުމުން ދިފާއީ ވަކީލު ޝިޔާމް ވިދާޅުވީ އޭނާގެ މުވައްކިލު "ވާނުވާ" ބަންދެއްގައި ހުންނަތާ ފަސް އަހަރަށް ވުރެ ގިނަ ދުވަސް ވެގެން ދިޔައިރު ދައުލަތުން ހާޒިރުކުރަން ބޭނުންވާ ހެކިން ހާޒިރުކުރުމަށް ވަކި މުހުލަތެއް އަދި ދެވޭނެ ފުރުސަތުތަކުގެ "ހައްދެއް" ކަނޑައަޅަން ޖެހޭ ކަމަށެވެ. އަދި ފުރުސަތު ދިނުމުގައި ކުރިއާލާ ތާވަލެއް ކަނޑައަޅައިދިނުމަށް ވެސް އެދުނެވެ.
ދައުލަތުގެ ވަކީލު އަޝްވާގު ނައީމް ދެން ވިދާޅުވީ މައްސަލައިގެ އަޑުއެހުންތައް ފުރަތަމަކޮޅު ކޯޓުގެ އިދާރީ ކަންކަމުގެ ސަބަބުން ނުބޭއްވި ގޮސްފައިވާ ކަމަށެވެ. ހެކިވެރިން ރާއްޖޭގައި ތިބި ވަގުތު ހެކިބަސް ނަގައި ނިންމައިދިނުމަށް ދައުލަތުން ކޯޓަށް އެކި ފަހަރު މަތިން ސިޓީ ފޮނުވި ކަން ވެސް ވަކީލު ފާހަގަ ކުރެއްވި އެވެ. އެހެންވެ މުއްދަތެއް ދިނުމުގައިި އެ ކަމަށް ވެސް ރިއާޔަތް ކުރަން ވާނެ ކަމަށް ވިދާޅުވި އެވެ.
ދައުލަތުގެ ފަރާތުން ވެސް ދެއްކި ވާހަކައަށް އެއްބަސްވެ ގާޒީ ވިދާޅުވީ، ދެ ފަރާތަށް ވެސް ގަބޫލުކުރެވޭ މުއްދަތެއް ކަނޑައަޅުއްވާނެ ކަމަށެވެ. އަންނަ މަހުގެ ކުރީކޮޅަށް އަޑުއެހުމެއް ތާވަލު ކުރާނެ ކަން ފާހަގަ ކުރެއްވުމަށް ފަހު ގާޒީ އެންގެވީ އެ އަޑުއެހުމަށް ނުނެގި ހުރި ހެކިވެރިންގެ މައުލޫމާތުތައް ދައުލަތުން ސާފުކުރަން ވާނެ ކަމަށެވެ. އަދި އެ އަޑުއެހުމުގައި މުއްދަތެއް ދެއްވާނެ ކަމަށް ގާޒީ ވިދާޅުވި އެވެ.
ކުރިން ކޯޓުގެ ސަބަބުން އަޑުއެހުންތަކެއް ނުބޭއްވި ދިޔަ ނަމަވެސް މިހާރު ހުރި ހާލަތުން މައްސަލަ ކޮޅެއްގައި ޖައްސަން ޖެހޭ ކަމަށް ވިދާޅުވުމަށް ފަހު ގާޒީ މިއަދުގެ އަޑުއެހުން ނިންމަވައިލެއްވި އެވެ.
