ހައުސިން މިނިސްޓްރީގެ ޑެޕިއުޓީ މިނިސްޓަރުކަމުން އެމްއެންޕީގެ ކުރީގެ ސެކްރެޓަރީ ޖެނެރަލް، ޝިނާޒު އަހުމަދު ވަކިކޮށްފި އެވެ.
މަގާމުން ވަކި ކުރިކަން ޝިނާޒު "އަދަދު" ނޫހަށް ކަށަވަރުކޮށްދެއްވި އެވެ. އޭނާ މަގާމުން ވަކި ކުރީ މިދިޔަ ހަފުތާގަ އެވެ.
ޝިނާޒް ވަކި ކުރި ސަބަބެއް ނޭނގެ އެވެ. ޝިނާޒް މަގާމުން ވަކި ކޮށްފައި މިވަނީ، ދައުލަތުގެ ހަރަދު ކުޑަ ކުރުމަށް މަސައްކަތްތަކެއް ކުރަމުން އަންނަ ކަމަށް ސަރުކާރުން ބުނެފައި ވަނިކޮށެވެ.
ސިޔާސީ މުވައްޒަފުންގެ ގޮތުގައި އައްޔަނު ކޮށްފައި ތިބި މުވައްޒަފުންގެ ސީދާ އަދަދު ސަރުކާރުން ހަމަ ނުކުރާއިރު، މިހާތަނަށް 2000 އަށްވުރެ ގިނަ މީހުން ސިޔާސީ މަގާމުތަކަށް އައްޔަނު ކޮށްފައިވާ ކަމަށް އެކިއެކި މަސްދަރުތަކުން "އަދަދު" އަށް ކަށަވަރު ކޮށްދީފައިވެ އެވެ.
ދައުލަތުގެ ހަރަދު ކުޑަ ކުރުމަށް މަސައްކަތް ކުރަމުންދާ ކަމަށް ސަރުކާރުން ބުނި ނަމަވެސް އިންޑިއާއަށް ފުރައްސާރަ ކުރި މައްސަލައިގައި ސަސްޕެންޑު ކޮށްފައި ތިބި ޔޫތު މިނިސްޓަރީގެ ތިން ނައިބު ވަޒީރުންނަށް ގޭގައި ބައިތިއްބައިގެން އެއްވެސް ރަސްމީ މަސައްކަތެއް ނުކުރުވައި ސަރުކާރުން މުސާރަ ދޭތީ އާންމުންގެ ފާޑުކިޔުން އަމާޒުވެފައިވެ އެވެ.
އެ ތިން ނައިބު ވަޒީރުންނަށް ފާއިތުވި ހަތް މަސްދުވަހުގެ ތެރޭގައި މުސާރަ އާއި އިނާތްތަކުގެ ގޮތުގައި 661،500ރ. ދީފައިވެ އެވެ.
