މިއަދު ހެނދުނު ރަސްފަންނަށް މޫދަށް އެރި އުޅުނު ބައެއްގެ އަތް ދަބަސް ގަހެއްގެ ދަށުގައި ހުއްޓައި ވަގަށް ނެގި ދެ މީހަކު ފުލުހުން ހައްޔަރު ކޮށްފި އެވެ.
މީޑިއާތަކަށް ފުލުހުން ފޮނުވި މެސެޖެއްގައި ބުނީ އެ ދެމީހުން ހައްޔަރު ކުރީ އެ ސަރަހައްދުގެ ސީސީޓީވީ ފުޓޭޖު ބަލައި އެ މީހުން ދެނެގަނެގެން ކަމަށެވެ.
އެ މައްސަލަ ފުލުހުންނަށް ރިޕޯޓު ކުރީ މާފަންނު ފުލުސް އޮފީހުގެ އޮފިސަރުން ޕްޓްރޯލު ކުރަމުން ދަނިކޮށް ހެނދުނު 10:50 ހާއިރު ކަމަށް ވެސް ފުލުހުން ބުންޏެވެ.
އެ މައްސަލައިގައި ހައްޔަރު ކުރީ ތ. ތިމަރަފުށި، ލަކީ ހައުސް، ސޮފްވާން އަލީ އާއި ގއ. ވިލިނގިލި، ޒިއުރިކް ވިލާ، ހަސަން ތައުފީގް އެވެ.
ފުލުހުން ބުނީ އެ މީހުން ހައްޔަރު ކުރީ މަޖީދީ މަގާއި ދިލްބަހާރު މަގު ގުޅޭ ހިސާބުން، މައްސަލަ ރިޕޯޓު ކުރިތާ ގަޑިއެއްހާއިރު ތެރޭގައި ކަމަށާއި ވަގަށް ނެގި އަތް ދަބަސް އެ މީހުންގެ އަތުން ހޯދާފައިވާ ކަމަށެވެ.
އެ ދަބަހުގައި އޮތް ދެ ފޯނާއި އެހެނިހެން ތަކެއްޗާއެކު ވެރި ފަރާތާ މިހާރު ހަވާލު ކޮށްފައިވާ ކަމަށް ވެސް ފުލުހުންގެ މެސެޖުގައި ބުންޏެވެ.
